டெல்லி டெஸ்ட் போட்டி... பதிவான வரலாற்று சாதனைகள்!

ஒரே நாளில் 16 விக்கெட்டுகள்

டெல்லி டெஸ்டில் நேற்று ஒரே நாளில் 16 விக்கெட்டுகள் வீழ்ந்தன. மேலும் 3வது நாளிலேயே போட்டியின் முடிவும் கிடைத்து விட்டது.

2-வது முறை

ஆஸ்திரேலியாவை 3 நாட்களுக்குள் இந்தியா தோற்கடித்து இருப்பது இது 2-வது முறையாகும். கடந்த 2004-ம் ஆண்டு மும்பை டெஸ்ட் போட்டியில் இதேபோல் சீக்கிரம் ஆஸ்திரேலியாவை வீழ்த்தியது இந்தியா.

கேப்டன் டோணியின் அதிக வெற்றி

ஆஸ்திரேலியாவுக்கு எதிராக அதிக வெற்றிகளை குவித்த ஒட்டுமொத்த கேப்டன்களின் பட்டியலில் இந்திய கேப்டன் டோணி 3-வது இடத்தில் இருக்கிறார். மேற்கிந்திய தீவுகள் அணி 12 முறையும் இங்கிலாந்தின் மைக் பிரியர்லி 11 முறையும் வென்றுள்ளனர். கேப்டன் டோணி, இங்கிலாந்தின் டபிள்யூ.ஜி.கிரேஸ் ஆகியோர் தலா 8 போட்டிகளில் ஆஸ்திரேலியாவுக்கு எதிராக தங்கள் அணிக்கு வெற்றியை தேடித்தந்துள்ளனர்.

4 போட்டியிலும் டாஸ் ஜெயித்த ஆஸி.

தற்போது முடிவடைந்த தொடரில் 4 டெஸ்ட் போட்டிகளிலுமே ஆஸ்திரேலிய அணி டாஸ் வென்றது. 136 ஆண்டு கால டெஸ்ட் வரலாற்றில் ஒரு தொடரில் ஒரே அணியே 4 மற்றும் அதற்கு மேல் டாஸில் வெற்றி பெற்றிருப்பது இது 2-வது முறையாகும். இதற்கு முன்பு 1978-79-ம் ஆண்டில் இங்கிலாந்துக்கு எதிரான ஆஷஸ் டெஸ்ட் தொடரின் போது ஆஸ்திரேலிய அணி 6 போட்டிகளில் 5-ல் டாஸ் வென்றது. ஆனால் அந்த தொடரிலும் 1-5 என்ற கணக்கில் ஆஸ்திரேலியா தோற்று போய் இருந்தது.

இந்தியாவில் 7-வது தோல்வி

இந்தியாவில் ஆஸ்திரேலிய அணி தொடர்ச்சியாக தழுவிய 7-வது தோல்வி (2008-ல் ஒன்று, 2010-ல் இரண்டு, 2013-ல் 4) இதுவாகும். இந்திய மண்ணில் தொடர்ந்து அதிக தோல்வியை சந்தித்த வெளிநாட்டு அணி ஆஸ்திரேலியா தான். ஆஸ்திரேலியா இதற்கு முன்பு 1967-1994-ம் ஆண்டு காலத்தில் தென்ஆப்பிரிக்காவில் தொடர்ந்து 6 டெஸ்ட் போட்டிகளில் தோற்றது அவர்களின் மோசமான பயணம்.