ஆளாளுக்கு சதம்.. எடுபடாத பந்து வீச்சு - இப்படியும் ஒரு மேட்ச், இதுக்குப் பேரும் பிட்ச்!

கேலிக்கூத்து டெஸ்ட்

இந்த நிலையில் இலங்கையின் காலேவில் நடந்த இலங்கை, வங்கதேசத்திற்கு இடையிலான டெஸ்ட் போட்டி பெரும் கேலிக்கூத்தாக மாறி முடிந்துள்ளது. அதாவது இந்தப் போட்டியில் பந்து வீச்சை விட பேட்டிங்தான் மிகப் பெரிய அளவில் எடுபட்டது. இரு அணியினரும் சரமாரியாக மாறி மாறி ரன்களைக் குவித்தனர். விளைவு - போட்டி டிராவில் முடிந்து விட்டது.

இலங்கை போட்ட முதல் 3 சதம்

இரு அணிகளுக்கும் இடையே 2 டெஸ்ட் போட்டிகள் கொண்ட தொடர் தொடங்கியுள்ளது. முதல் போட்டிதான் காலேவில் நடந்தது. டாஸ் வென்று முதலில் இலங்கை ஆடியது. இதில் 4 விக்கெட் இழப்புக்கு 570 ரன்களை அது குவித்தது. இதில் திரிமன்னே, சங்கக்கரா, சண்டிமால் ஆகியோர் தலா ஒரு சதம் போட்டனர்.

மண்ணைப் போட்ட வங்கதேசம்

சரி பந்து வீச்சில் வங்கதேசத்தை சுருட்டி விடலாம் என்று எண்ணித்தான் இலங்கை தனது முதல் இன்னிங்ஸை டிக்ளேர் செய்தது. ஆனால் அதில் வங்கதேசம் மண்ணைப் போட்டு விட்டது.

முஷ்பிகுர் ரஹ்மானின் இரட்டைச் சதம்

வந்த பந்தையெல்லாம் அடித்து விரட்டிய வங்கதேச ஆட்டக்காரர்கள், இலங்கை பந்து வீச்சாளர்களை நையப்புடைத்து விட்டனர். அனைத்து விக்கெட்களையும் இழந்து 638 ரன்களைக் குவித்து விட்டுத்தான் ஓய்ந்தனர். இதில், வங்கதேச வீரர் முஷ்பிகுர் ரஹ்மான் இரட்டை சதம் போட்டார். இவர்தான் அணியின் கேப்டனாவார்.

அஷ்ரபுல் குவித்த 190 ரன்கள்

அதேபோல முகமது அஷ்ரபுல் 190 ரன்களையும், நசீர் உசேன் 100 ரன்களையும் எடுத்தனர்.

மறுபடியும் சதம் போட்ட இலங்கை

அடுத்து இலங்கை தனது 2வது இன்னிங்ஸை தொடங்கியது. மறுபடியும் ரன் குவித்தது. 4 விக்கெட் இழப்புக்கு 335 ரன்களைக் குவித்து டிக்ளேர் செய்தது. சங்கக்கரா மறுபடியும் சதம் போட்டார். அதேபோல தில்ஷானும் சதம் போட்டார்.

அம்புட்டுதான்.. போட்டி டிரா

வங்கதேசம் வெற்றி பெற 268 ரன்கள் இலக்கு நிர்ணயிக்கப்பட்டது. ஆனால் நேற்றைய ஆட்ட நேர இறுதியில் ஒரு விக்கெட் இழப்புக்கு 70 ரன்களை வங்கதேசம் எடுத்திருந்தபோது ஆட்டம் முடிவுக்கு வந்தது. இதனால் போட்டி டிராவில் முடிவடைந்தது.

இந்த டெஸ்ட் போட்டியில் இரு இன்னிங்ஸ்களிலும் சேர்த்து இரு தரப்பிலும் மொத்தமாக 8 சதங்கள் போடப்பட்டன என்பது குறிப்பிடத்தக்கது.

அடுத்த டெஸ்ட் போட்டி 16ம் தேதி கொழும்பில் தொடங்குகிறது.