தைரியம் இருந்தால், என்னுடன் பாக்சிங் ரிங்கில் சண்டைக்கு வாங்க.. ஹர்பஜனுக்கு ஸ்ரீசாந்த் சவால்

திருவனந்தபுரம்: 2008-ஆம் ஆண்டு ஐபிஎல் தொடரில் நடந்த பிரபல 'ஸ்லாப்கேட்' (slapgate) சம்பவத்தை அடிப்படையாகக் கொண்டு, முன்னாள் சுழற்பந்து வீச்சாளர் ஹர்பஜன் சிங் அண்மையில் ஒரு விளம்பரத்தில் நடித்திருந்தார். இதனால், அவருக்கும் முன்னாள் இந்திய வேகப்பந்து வீச்சாளர் ஸ்ரீசாந்திற்கும் இடையிலான பழைய பகை மீண்டும் விஸ்வரூபம் எடுத்துள்ளது.

ஒரு காலத்தில் கிரிக்கெட் உலகின் பெரும் சர்ச்சையாக வெடித்த இந்த சர்ச்சை காலப்போக்கில் மாறியது போல் தோன்றினாலும், ஹர்பஜனின் இந்த விளம்பரம் மீண்டும் கிளறியுள்ளது. சமீபத்தில் 'தி லல்லன்தொப்' (Lallantop) ஊடகத்திற்கு அளித்த நேர்காணலின் போது, ஸ்ரீசாந்திடம் அவரும் ஹர்பஜனும் பாக்ஸிங் உடையில் இருக்கும் ஒரு பழைய புகைப்படம் காட்டப்பட்டது.

விளம்பரம் வேண்டாம், நேரடி மோதலுக்கு வாருங்கள்: ஸ்ரீசாந்த் சவால்

அதைப் பார்த்த ஸ்ரீசாந்த், ஹர்பஜனுக்கு நேரடியாக சவால் விடுத்ததுடன், பாக்ஸிங் ரிங்கில் மோதி தங்களது கணக்கைத் தீர்த்துக் கொள்ளத் தயார் என்றும் அறிவித்தார். நேர்காணலில் பேசிய அவர் "இதே காட்சியை நிஜத்தில் செய்ய உங்களுக்கு தைரியம் இருக்கிறதா? என்னுடன் பாக்ஸிங் ரிங்குக்குள் வர உங்களுக்கு துணிச்சல் உள்ளதா? ஒப்பந்தத்தில் கையெழுத்திட்டு உங்களால் வர முடியுமா?

பிராட் தேர்வு செய்த சிறந்த டெஸ்ட் லெவன்: சச்சின், பும்ராவுக்கு இடமில்லையா? அதிர்ச்சியில் ரசிகர்கள்!

ஹர்பஜனிடம் தான் நான் இதைக் கேட்கிறேன். அதே கையுறைகளை அணிந்து என்னுடன் மோத உங்களுக்கு தைரியம் இருக்கிறதா? இது நடிப்பு அல்ல, நான் நிஜமாகவே சிரிக்கிறேன். உங்களால் சிரிக்க கூட முடியவில்லை, நீங்கள் அங்கே என்ன செய்கிறீர்கள் என்றே எனக்குத் தெரியவில்லை. யார் என்று பார்த்துவிடுவோம், இது உங்களுக்கு நான் விடுக்கும் நேரடி சவால்!" என்று ஸ்ரீசாந்த் கூறினார்.

மேலும் பேசிய அவர், "நான் தற்போது 'பேயர் நக்கிள் ஃபைட் லீக்' (Bare Knuckle Fight League) தொடரில் இணைந்துள்ளேன். கோனார் மெக்கிரேகரின் வீடியோவின் முக்கிய ஸ்பான்சர்களில் ஒருவரான எனது நெருங்கிய நண்பர் மூலம் இதன் விளம்பரப் பணிகளும் நடந்துள்ளன. பாஜி, நான் உங்களைத்தான் சவாலுக்கு அழைக்கிறேன்," என்று கூறினார்.

ஸ்ரீசாந்த் இதோடு நிறுத்தாமல், ஹர்பஜனை ரிங்கிற்குள் நேரடியாக எதிர்கொள்ளுமாறு ஆவேசமாக அழைப்பு விடுத்தார். "பாஜி, நான் உங்களுக்கு சவால் விடுகிறேன். அந்த அறைந்த சம்பவத்தாலும் என்னாலும் உங்களுக்கு இவ்வளவு பிரச்சனை இருக்கிறது என்றால், அதன் மூலம் நீங்கள் இவ்வளவு சம்பாதிக்கிறீர்கள் என்றால்... நானும் கொஞ்சம் சம்பாதிக்கிறேன், ரிங்குக்குள் வாருங்கள்.

அகர்கர், கம்பீருக்கு கிரிக்கெட்டே தெரியாது என்பது போல் பேசாதீர்கள்.. அஸ்வின் அறிவுரை

என் உண்மையான உணர்வோடு உங்களை அழைக்கிறேன். நமக்கு சுயமரியாதை இருந்தால், விளம்பரங்கள் செய்வதைத் தவிர்த்துவிட்டு களத்திற்கு வாருங்கள். அனைத்து மலையாளிகள் மற்றும் சர்தார்களின் சார்பாக நான் உங்களுக்காகக் காத்திருக்கிறேன்" என்று அவர் கூறினார்.