SRH vs PBKS: டாஸ் வென்ற பஞ்சாப் பந்துவீச்சு தேர்வு.. கம்மின்ஸ் படையை சமாளிக்குமா ஸ்ரேயாஸ் அணி?

ஹைதராபாத்: 2026 ஐபிஎல் தொடரின் 49-வது லீக் ஆட்டத்தில் சன்ரைசர்ஸ் ஹைதராபாத் மற்றும் பஞ்சாப் கிங்ஸ் அணிகள் பலப்பரீட்சை நடத்துகின்றன. ஹைதராபாத் ராஜிவ் காந்தி சர்வதேச மைதானத்தில் நடைபெறும் இந்தப் போட்டியில் டாஸ் வென்ற பஞ்சாப் கிங்ஸ் அணியின் கேப்டன் ஸ்ரேயாஸ் ஐயர் முதலில் பந்துவீச்சைத் தேர்வு செய்துள்ளார். ஏற்கனவே இந்த மைதானத்தில் பலமுறை 245 ரன்களுக்கு மேல் குவிக்கப்பட்டுள்ள நிலையில், இந்தப் போட்டியில் டிராவிஸ் ஹெட் மற்றும் அபிஷேக் சர்மா கூட்டணி மீண்டும் ஒரு அதிரடி ரன் மழையைப் பொழியுமா என்ற மிகப்பெரிய எதிர்பார்ப்பு ரசிகர்கள் மத்தியில் எழுந்துள்ளது.

இந்தப் போட்டியில் டாஸ் வென்ற பிறகு பேசிய பஞ்சாப் கேப்டன் ஸ்ரேயாஸ் ஐயர், கடந்த சில போட்டிகளில் தங்களது அணி பல முக்கியமான பாடங்களைக் கற்றுக்கொண்டுள்ளதாகத் தெரிவித்தார். ஹைதராபாத் அணி கடந்த போட்டிகளில் இலக்கை வெற்றிகரமாகத் துரத்தியதால், இந்தப் போட்டியில் அவர்களை முதலில் பேட்டிங் செய்ய வைத்து ரன்களைக் கட்டுப்படுத்தத் திட்டமிட்டுள்ளதாகக் கூறினார். பஞ்சாப் அணியில் நட்சத்திர வீரர் ஷஷாங்க் சிங் மீண்டும் இணைந்துள்ளது அந்த அணிக்குக் கூடுதல் பலத்தைச் சேர்த்துள்ளது. தொடர்ச்சியான பயணங்கள் இருந்தாலும், வீரர்கள் அனைவரும் தொழில்முறை ஆட்டத்தை வெளிப்படுத்தத் தயாராக இருப்பதாக ஸ்ரேயாஸ் உறுதியளித்தார்.

மறுபுறம் சன்ரைசர்ஸ் ஹைதராபாத் கேப்டன் பேட் கம்மின்ஸ் கூறுகையில், தானும் முதலில் பந்துவீசவே விரும்பியதாகத் தெரிவித்தார். இருப்பினும், இந்த மைதானத்தில் தங்களுக்குக் கிடைக்கும் ரசிகர்களின் ஆதரவு மிகப்பெரிய பலம் என்றும், முதலில் பேட்டிங் செய்து ஒரு இமாலய இலக்கை நிர்ணயிக்கப் போவதாகவும் அவர் கூறினார். ஆடுகளத்தின் தன்மையைத் துல்லியமாகக் கணிக்க முடியாவிட்டாலும், பேட்டிங்கிற்குச் சாதகமாக இருக்கும் என்பதால் ரன்களைக் குவிப்பதில் கவனம் செலுத்தப் போவதாகக் குறிப்பிட்டார். ஹைதராபாத் அணியில் நிதிஷ் குமார் ரெட்டி மீண்டும் களம் இறங்குகிறார்.

இந்தப் போட்டியில் பயன்படுத்தப்படும் 2-வது எண் ஆடுகளம் பேட்ஸ்மேன்களுக்குச் சொர்க்கமாகத் திகழும் என ஆடுகள ஆய்வில் தெரிவிக்கப்பட்டுள்ளது. ஆடுகளம் மிகவும் கடினமாகவும், புற்கள் ஏதுமின்றியும் இருப்பதால் பந்து பேட்டிற்கு நன்கு வரும். மைதானத்தின் பக்கவாட்டு எல்லைகள் 62 மற்றும் 68 மீட்டராக உள்ளன. பவர் பிளே ஓவர்களில் பந்து ஸ்கிட் ஆகி வரும் என்பதால், ஆரம்பத்திலேயே அதிரடி காட்ட வாய்ப்புள்ளது. போட்டியின் கடைசி 4 ஓவர்களில் பந்து சற்று ரிவர்ஸ் ஸ்விங் ஆகவும் வாய்ப்புள்ளது.

ஹைதராபாத் அணியில் அபிஷேக் சர்மா, டிராவிஸ் ஹெட் மற்றும் ஹென்ரிச் கிளாசன் போன்ற அதிரடி வீரர்கள் வரிசையாக இருப்பதால், பஞ்சாப் பந்துவீச்சாளர்களுக்கு இந்தப் போட்டி ஒரு மிகப்பெரிய சவாலாக இருக்கும். பஞ்சாப் அணி பந்துவீச்சில் சற்றுச் சறுக்கல்களைச் சந்தித்து வரும் நிலையில், அதனை ஹைதராபாத் பேட்ஸ்மேன்கள் எப்படிப் பயன்படுத்திக் கொள்வார்கள் என்பதே ஆட்டத்தின் சுவாரசியமான கட்டமாக இருக்கும்.

அணிகள்:

பஞ்சாப் கிங்ஸ் (Playing XI):

பிரப்சிம்ரன் சிங் (விக்கெட் கீப்பர்), கூப்பர் கோனோலி, ஸ்ரேயஸ் ஐயர் (கேப்டன்), ஷஷாங்க் சிங், சூர்யான்ஷ் ஷெட்ஜ், மார்கஸ் ஸ்டோய்னிஸ், மார்கோ யான்சன், லோகி பெர்குசன், விஜய்குமார் வைஷாக், அர்ஷ்தீப் சிங், யுஸ்வேந்திர சஹால்

பஞ்சாப் கிங்ஸ் (Impact Subs):

பிரியான்ஷ் ஆர்யா, ஹர்ப்ரீத் ப்ரார், சேவியர் பார்ட்லெட், விஷ்ணு வினோத், முஷீர் கான்.

சன்ரைசர்ஸ் ஹைதராபாத் (Playing XI):

அபிஷேக் சர்மா, டிராவிஸ் ஹெட், இஷான் கிஷன் (விக்கெட் கீப்பர்), ஹென்ரிச் கிளாசன், சலில் அரோரா, ஸ்மரன் ரவிச்சந்திரன், நிதிஷ் குமார் ரெட்டி, பாட் கம்மின்ஸ் (கேப்டன்), ஷிவாங் குமார், எஷன் மலிங்கா, சாகிப் உசேன்.

சன்ரைசர்ஸ் ஹைதராபாத் (Impact Subs):

அனிகேத் வர்மா, பிரபுல் ஹிங்கே, லியாம் லிவிங்ஸ்டோன், ஹர்ஷ் துபே, ஹர்ஷல் படேல்.