SRH vs RCB: ஆர்சிபி - சன்ரைசர்ஸ் மோதல்.. டாஸ் வென்ற கம்மின்ஸ் பேட்டிங் தேர்வு.. பிளேயிங் 11 என்ன?

ஹைதராபாத்: 2026 ஐபிஎல் தொடரின் 67-வது லீக் ஆட்டத்தில் சன்ரைசர்ஸ் ஹைதராபாத் மற்றும் ராயல் சேலஞ்சர்ஸ் பெங்களூரு அணிகள் மோதுகின்றன. ஹைதராபாத்தில் உள்ள ராஜீவ் காந்தி சர்வதேச மைதானத்தில் நடைபெறும் இந்தப் போட்டியில் டாஸ் வென்ற ஹைதராபாத் அணி கேப்டன் பேட் கம்மின்ஸ் முதலில் பேட்டிங் செய்யத் தீர்மானித்துள்ளார்.

ஏற்கனவே பிளே-ஆப் சுற்றுக்குத் தகுதி பெற்றுவிட்ட இவ்விரு அணிகளும், புள்ளிப்பட்டியலில் முதல் 2 இடங்களுக்குள் நுழைய இந்தப் போட்டியில் மல்லுக்கட்டுகின்றன. ஹைதராபாத் அணி தனது சொந்த மண்ணில் இந்த சீசன் முழுவதும் அபாரமாக விளையாடி வருகிறது. இது குறித்துப் பேசிய கம்மின்ஸ், "நாங்கள் முதலில் பேட்டிங் செய்கிறோம். புள்ளிப்பட்டியலில் முதல் 2 இடங்களைப் பிடிப்பது சவாலான காரியம் தான் என்றாலும், இன்று எங்களது முழுத் திறமையையும் வெளிப்படுத்துவோம். பிளே-ஆப் சுற்றுக்கு முன்னதாகப் புதிய விஷயங்களைச் சோதிக்க இது ஒரு நல்ல வாய்ப்பு," எனத் தெரிவித்தார். ஹைதராபாத் அணியில் எந்த மாற்றமும் செய்யப்படவில்லை.

ஆர்சிபி அணியில் மாற்றம்

பெங்களூரு அணியைப் பொறுத்தவரை, காயம் காரணமாகக் கடந்த போட்டியில் விளையாடாத கேப்டன் ரஜத் படிதார் மீண்டும் அணிக்குத் திரும்பியுள்ளார். அதே சமயம், அதிரடி வீரர் ஜேக்கப் பெத்தேல் விரலில் ஏற்பட்ட காயம் காரணமாக இந்தப் போட்டியில் விளையாடவில்லை. அவருக்குப் பதிலாகவே ரஜத் படிதார் அணியில் இணைந்துள்ளார்.

"நாங்கள் எங்கு விளையாடினாலும் அது எங்களுக்குச் சொந்த மைதானம் போலவே உணர்கிறோம். புள்ளிப்பட்டியலில் எந்த இடத்தில் இருந்தாலும் ஒவ்வொரு போட்டியிலும் எங்களது தரத்தை நிரூபிக்க வேண்டியது அவசியம்," என ரஜத் படிதார் கூறினார்.

ஆடுகளம் எப்படி?

ஆடுகளம் குறித்துப் பேசிய முரளி கார்த்திக் மற்றும் மைக்கேல் கிளார்க், இந்த மைதானம் பந்துவீச்சாளர்களுக்குச் கடினமாக இருக்கும் எனத் தெரிவித்தனர். ஆடுகளத்தில் ஒரு புல் கூட இல்லாமல் வறண்ட நிலையில் இருப்பதால், பேட்ஸ்மேன்கள் மைதானத்தின் நாலாபுறமும் பந்துகளைச் சிதறடிக்க வாய்ப்புள்ளது. கடந்த 2 சீசன்களில் இங்கு சராசரி ஸ்கோர் 218 ரன்களாக உள்ளது. பந்து நன்கு பவுன்ஸ் ஆகி பேட்டிற்கு வரும் என்பதால் ரன் மழை பொழிவது உறுதி. பந்துவீச்சாளர்கள் தங்களது வேகத்தில் மாறுபாடுகளைக் காட்டினால் மட்டுமே ரன் வேகத்தைக் கட்டுப்படுத்த முடியும்.

பிளே-ஆப் உறுதி செய்யப்பட்ட நிலையில், இரு அணிகளும் எவ்வித அழுத்தமுமின்றி விளையாடும் என்பதால் இன்றைய ஆட்டத்தில் விறுவிறுப்புக்குத் பஞ்சம் இருக்காது.

தோனி அடுத்த ஆண்டு ஐபிஎல்இல் விளையாடுவாரா? சிஎஸ்கே பயிற்சியாளர் எரிக் சைமன்ஸ் முக்கிய தகவல்

அணிகளின் விவரம்:

ராயல் சேலஞ்சர்ஸ் பெங்களூரு: விராட் கோலி, தேவ்தத் படிக்கல், ரஜத் படிதார் (கேப்டன்), வெங்கடேஷ் ஐயர், ஜித்தேஷ் சர்மா, குருணால் பாண்டியா, ரொமாரியோ ஷெப்பர்ட், புவனேஸ்வர் குமார், ஜோஷ் ஹேசில்வுட், சுயாஷ் சர்மா, ரசிக் சலாம்.

சன்ரைசர்ஸ் ஹைதராபாத்: அபிஷேக் சர்மா, டிராவிஸ் ஹெட், ஈஷான் கிஷன், ஹென்றிச் கிளாசன், சலில் அரோரா, ஸ்மரன் ரவிச்சந்திரன், நிதிஷ் குமார் ரெட்டி, பேட் கம்மின்ஸ் (கேப்டன்), ஷிவாங் குமார், ஈஷன் மலிங்கா, சாகிப் உசேன்.

ராயல் சேலஞ்சர்ஸ் பெங்களூரு இம்பாக்ட் வீரர்கள்: டிம் டேவிட், கனிஷ்க் சௌஹான், ஸ்வப்னில் சிங், அபிநந்தன் சிங், ஜோர்டான் காக்ஸ்

சன்ரைசர்ஸ் ஹைதராபாத் இம்பாக்ட் வீரர்கள்: பிரஃபுல் ஹிங்கே, அனிகேத் வர்மா, லியாம் லிவிங்ஸ்டோன், ஹர்ஷ் துபே, ஹர்ஷல் படேல்