ஆஷஸ் டெஸ்ட்: ஆஸ்திரேலிய வீரர் ஸ்மித் சதம்.. ராகுல் டிராவிட் சாதனை முறியடிப்பு

சிட்னி: ஆஸ்திரேலியாவின் நட்சத்திர வீரர் ஸ்டீவ் ஸ்மித், டெஸ்ட் கிரிக்கெட்டில் தனது 37வது சதத்தைப் பதிவு செய்து ராகுல் டிராவிட்டின் சாதனையை முறியடித்துள்ளார். ஆஷஸ் தொடரின் ஐந்தாவது மற்றும் இறுதி டெஸ்டில் அவர் இந்த மைல்கல்லை எட்டினார். இதன்மூலம், ஸ்டீவ் ஸ்மித் சர்வதேச டெஸ்ட் கிரிக்கெட்டில் அதிக சதம் அடித்தவர்கள் பட்டியலில் ஆறாவது இடத்திற்கு முன்னேறியுள்ளார்.

இந்திய அணியின் முன்னாள் கேப்டன் ராகுல் டிராவிட் 164 டெஸ்ட் போட்டிகளில் 36 சதங்கள் அடித்திருந்தார். ஆனால், 36 வயதான ஸ்மித், தனது 123வது டெஸ்ட் போட்டியிலேயே 37 சதங்களை அடித்து டிராவிட்டை முந்தியுள்ளார்.

ஆஸ்திரேலியாவின் முதல் இன்னிங்ஸின் 110வது ஓவரில், ஜேக்கப் பெத்தேல் வீசிய இரண்டாவது பந்தில் மூன்று ரன்கள் ஓடி ஸ்மித் தனது 37வது சதத்தை நிறைவு செய்தார். 166 பந்துகளில், 11 பவுண்டரிகள் மற்றும் ஒரு சிக்ஸர் விளாசி இந்த சதத்தை எட்டினார். 2025-26 ஆஷஸ் தொடரில் ஜோ ரூட், டிராவிஸ் ஹெட் ஆகியோருக்குப் பிறகு சதம் அடித்த மூன்றாவது வீரர் ஸ்மித் ஆவார்.

டெஸ்ட் கிரிக்கெட்டில் அதிக சதம் அடித்த வீரர்கள் பட்டியலில், ஸ்டீவ் ஸ்மித்துக்கு முன்னால் தற்போது ஐந்து பேர் மட்டுமே உள்ளனர். சச்சின் டெண்டுல்கர் (51), ஜாக் காலிஸ் (45), ஜோ ரூட் (41), ரிக்கி பாண்டிங் (41), மற்றும் குமார் சங்கக்காரா (39) ஆகியோர் அந்த ஜாம்பவான் பட்டியலில் இடம்பெற்றுள்ளனர்.

நடப்பு ஆஷஸ் தொடரில் ஸ்மித் அடித்த முதல் சதம், ஆஷஸ் வரலாற்றில் இரண்டாவது அதிக சதங்கள் அடித்த வீரர் என்ற பெருமையும் பெற்றுள்ளது. இங்கிலாந்து ஜாம்பவான் ஜாக் ஹோப்ஸுடன் முன்னதாக இணைந்திருந்த ஸ்மித், தனது 41வது ஆஷஸ் டெஸ்ட்டில் 13 சதங்களுடன் தற்போது தனித்து இரண்டாம் இடத்தைப் பிடித்துள்ளார். டான் பிராட்மேன் (19 சதங்கள்) மட்டுமே அவருக்கு முன்னால் உள்ளார்.

இந்த 37வது டெஸ்ட் சதத்தைப் பதிவு செய்வதற்கு முன்பே, ஆஷஸ் தொடரில் அதிக ரன்கள் குவித்த பேட்டர்கள் பட்டியலிலும் ஸ்மித் இரண்டாம் இடத்திற்கு முன்னேறியிருந்தார். ஜாக் ஹோப்ஸின் 3636 ரன்களைக் கடக்க 84 ரன்கள் தேவைப்பட்ட நிலையில், ஜேக்கப் பெத்தேல் வீசிய 100வது ஓவரின் இரண்டாவது பந்தில் ஒரு ரன் எடுத்து அந்த மைல்கல்லை ஸ்மித் எட்டினார்.