“எல்லை மீறிப் போறீங்க”.. வங்கதேச வீரர்களை வம்பிழுத்த ஸ்டீவ் ஸ்மித்.. அம்பயர்கள் எச்சரிக்கை

மெக்காய்: ஆஸ்திரேலியா மற்றும் வங்கதேசம் அணிகளுக்கு இடையிலான இரண்டாவது டெஸ்ட் கிரிக்கெட் போட்டியில், ஆஸ்திரேலிய பேட்ஸ்மேன் ஸ்டீவ் ஸ்மித் வங்கதேச வீரர்களை வம்பிழுத்த சம்பவம் மைதானத்தில் பரபரப்பை ஏற்படுத்தியது. இதனால் அம்பயர்கள் ஸ்டீவ் ஸ்மித்தை எச்சரித்தனர்.

மெக்காய் நகரில் சனிக்கிழமை நடைபெற்ற இந்தப் போட்டியின் முதல் இன்னிங்ஸில், ஆஸ்திரேலிய அணி பேட்டிங் செய்த போது 9 வது ஓவரில் இந்த சம்பவம் நிகழ்ந்தது. வங்கதேச வேகப்பந்து வீச்சாளர் தஸ்கின் அகமது வீசிய பந்து ஸ்டீவ் ஸ்மித்தின் பேடில் பட்டது. இதற்கு வங்கதேச வீரர்கள் எல்.பி.டபிள்யூ கேட்டு அப்பீல் செய்தனர். ஆனால் கள அம்பயர் நிதின் மேனன் அதை அவுட் இல்லை என்று மறுத்துவிட்டார்.

இதனால் வங்கதேச அணியின் கேப்டன் நஜ்முல் ஹொசைன் சாண்டோ மற்றும் பந்துவீச்சாளர் தஸ்கின் அகமது ஆகியோர் டிஆர்எஸ் ரிவ்யூ எடுப்பது குறித்து மைதானத்தில் தீவிரமாக ஆலோசித்து வந்தனர். அப்போது குறுக்கிட்ட ஸ்டீவ் ஸ்மித், வங்கதேச வீரர்களை நோக்கி கேலி செய்யும் வகையில் பேசத் தொடங்கினார்.

"நான் ஆடுகளத்தின் பாதியைக் கடந்து வந்து விளையாடியுள்ளேன். பந்து விக்கெட்டுக்கு மேலே தான் செல்லும். முடிந்தால் ரிவியூ எடுத்துப் பாருங்கள்" என்று சைகை செய்து சவால் விட்டார். ஸ்மித்தின் இந்த சீண்டலால் மைதானத்தில் சிறிது நேரம் சலசலப்பு ஏற்பட்டது. இதை அடுத்து இரண்டு அம்பயர்களும் உடனடியாக ஸ்மித்தை அணுகி, அவரது நடத்தைக்காகக் கடுமையான எச்சரிக்கை விடுத்தனர்.

இந்த தொடரின் முதல் டெஸ்ட் போட்டியின் இரண்டாவது இன்னிங்ஸிலும் இதே போன்ற ஒரு சர்ச்சை அரங்கேறியது. சுழற்பந்து வீச்சாளர் தைஜுல் இஸ்லாம் வீசிய பந்தை ஸ்மித் லெக் திசையில் தட்டிவிட்ட போது, அது பேட்டில் பட்டதாக வங்கதேசம் வீரர்கள் கருதினர். அப்போதும் ஸ்மித், "ரிவியூவை பயன்படுத்துங்கள்... மற்றொரு ரிவியூவையும் வீணாக்குங்கள்... உங்களுக்கு என்ன தோன்றுகிறதோ அதைச் செய்யுங்கள்" என்று வங்கதேச வீரர்களை நோக்கி வம்பிழுத்தார்.

முதல் டெஸ்ட் போட்டியின் போது லிட்டன் தாஸுடன் ஸ்மித் வாக்குவாதத்தில் ஈடுபட்டது குறிப்பிடத்தக்கது. வங்கதேச வீரர்களைத் தொடர்ந்து வம்பிழுத்து வந்த ஸ்டீவ் ஸ்மித், இந்தப் போட்டியில் 42 ரன்கள் எடுத்திருந்த போது ஷோரிபுல் இஸ்லாம் பந்துவீச்சில் ஆட்டமிழந்தார்.

AUS vs BAN: ஆஸ்திரேலியா 165க்கு 8 விக்கெட் காலி.. பவுலிங்கில் கலக்கிய வங்கதேச வீரர் ஷோரிபுல் இஸ்லாம்

ஸ்டீவ் ஸ்மித்தின் இந்தச் சர்ச்சைக்குரிய செயல்பாடு குறித்து வர்ணனையாளர் கெர்ரி ஓ'கீஃப் பேசுகையில், "1970 களில் யாராவது இதுபோல் செய்திருந்தால் மைதானத்திலேயே பெரிய அளவில் கைகலப்பு வெடித்திருக்கும்" என்று கருத்து தெரிவித்துள்ளார். ஸ்டீவ் ஸ்மித் மீது ஐசிசி நடவடிக்கை பாயுமா? என்ற கேள்வியும் எழுந்துள்ளது.