55 மீட்டர், 60 மீட்டர் பவுண்டரி தூரம் வைத்தால் வெளிநாடுகளில் தோல்வி தான்.. கவாஸ்கர் சாடல்

மும்பை: இந்தியாவின் உள்நாட்டுப் போட்டிகள் மற்றும் ஐபிஎல் போட்டிகளில் மைதானத்தின் எல்லைக் கோட்டின் தூரத்தை அதிகரிக்குமாறு பிசிசிஐக்கு சுனில் கவாஸ்கர் கோரிக்கை விடுத்துள்ளார். இந்தியாவில் உள்ள மிகக் குறுகிய எல்லைக் கோடுகளே, இந்திய பேட்டர்கள் வெளிநாட்டு மைதானங்களில் தடுமாறுவதற்கு ஒரு முக்கிய காரணமாக அமைவதாக அவர் குற்றம்சாட்டியுள்ளார்.

அண்மையில் இங்கிலாந்து மற்றும் அயர்லாந்து நாடுகளுக்கு சுற்றுப்பயணம் மேற்கொண்ட இந்திய அணி அங்கு கடுமையான தோல்விகளைச் சந்தித்தது. அயர்லாந்துக்கு எதிரான டி20 தொடரை 2-0 என்ற கணக்கிலும், இங்கிலாந்துக்கு எதிரான டி20 தொடரை 4-0 என்ற கணக்கிலும் இழந்ததுடன், ஒருநாள் தொடரையும் 2-1 என்ற கணக்கில் இங்கிலாந்திடம் இழந்தது.

இது குறித்து கருத்து தெரிவித்துள்ள கவாஸ்கர், "இந்தியாவில் பிளாட் பிட்ச்கள் இருப்பது உண்மைதான். ஆனால், மிகவும் குறுகியதாக இருக்கும் எல்லைக் கோடுகள்தான் பேட்டர்களுக்கு சாதகமாக அமைந்துவிடுகின்றன. தவறான ஷாட்கள் கூட இங்கு சிக்ஸர்களாக மாறுகின்றன. ஆனால், பெரிய எல்லைக் கோடுகளைக் கொண்ட வெளிநாட்டு மைதானங்களில் அதே ஷாட்கள் எளிதாக கேட்ச் ஆகிவிடுகின்றன," என்று அவர் குறிப்பிட்டுள்ளார்.

ரசிகர்களிடம் மன்னிப்பு கேட்ட அபிஷேக் சர்மா.. மனம் தளர வேண்டாம் என சூர்யகுமார் அட்வைஸ்

"அடுத்த ஆண்டு உலகக் கோப்பை தொடங்குவதற்கு முன்பாக, நமது பேட்டர்கள் பெரிய மைதானங்களுக்குப் பழகும் வகையில், புதிய இந்திய உள்நாட்டு சீசன் தொடங்கும் போதே எல்லைக் கோடுகளின் அளவை அதிகரிப்பது மிகவும் அவசியமாகும். கிட்டத்தட்ட அனைத்து மைதானங்களிலும் எல்இடி விளம்பரப் பலகைகளுக்குப் பின்னால் மக்கள் நடப்பதற்குப் போதிய இடம் உள்ளது. இந்த இடத்தை சரியாகப் பயன்படுத்திக் கொண்டாலே எல்லைக் கோட்டின் அளவை தானாகவே அதிகரிக்க முடியும்," என்று கவாஸ்கர் விளக்கியுள்ளார்.

இந்த ஆர்சிபி வீரர் முன்பு திலக் வர்மா எல்லாம் ஒன்றுமே இல்லை.. ஸ்ரீகாந்த் கோபம்

"இது நமது சுழற்பந்து வீச்சாளர்களுக்கும் சற்று மெதுவாக பந்து வீச வாய்ப்பளிக்கும். இதனால் அவர்கள் பந்தை நன்றாகத் திருப்பி வீச முடியும். தற்போது குறுகிய எல்லைக் கோடுகள் காரணமாக அவர்கள் வேகமாக வீசும் பந்துகள், பேட்டர்களுக்கு சாதகமாக அமைந்து, எளிதாக சிக்ஸருக்குப் பறக்கின்றன," என்றும் அவர் விரிவாகக் கூறியுள்ளார்.