"நானும் யுவராஜும் புறக்கணிக்கப்பட்டோம்..".. விராட் கோலி கேப்டன்சி குறித்து சுரேஷ் ரெய்னா ஆதங்கம்

மும்பை: இந்திய அணியின் முன்னாள் வீரர் சுரேஷ் ரெய்னா, தான் சர்வதேச கிரிக்கெட்டில் இருந்து முன்கூட்டியே ஓய்வு பெற்றதற்கான பின்னணி குறித்து மனம் திறந்துள்ளார். விராட் கோலி கேப்டனாக இருந்தபோது தனக்கு அணியில் ஏன் இடம் கிடைக்கவில்லை என்பது குறித்து முறையான விளக்கம் அளிக்கப்படவில்லை என்று அவர் ஆதங்கத்தை வெளிப்படுத்தியுள்ளார்.

முன்னாள் வீரர் ஆகாஷ் சோப்ரா உடனான நேர்காணலில் ரெய்னா இது குறித்துப் பேசினார். தோனி கேப்டனாக இருந்தபோது இந்திய அணியின் தவிர்க்க முடியாத வீரராக ரெய்னா இருந்தார். ஆனால் விராட் கோலி கேப்டனாக பொறுப்பேற்ற பிறகு, ரெய்னாவுக்கான வாய்ப்புகள் படிப்படியாகக் குறைந்தன.

இது குறித்துப் பேசிய சுரேஷ் ரெய்னா, "ஒவ்வொரு கேப்டனுக்கும் ஒரு தனிப்பட்ட விருப்பம் இருக்கும். அவர்களுக்குத் தகுந்த வீரர்களைத் தேர்வு செய்வார்கள். நானும் யுவராஜ் சிங்கும் ஒருமுறை யோ-யோ உடற்தகுதி தேர்வில் தோல்வியடைந்தோம். ஆனால் பின்னர் கடினமாக உழைத்து அந்த தேர்வில் தேர்ச்சி பெற்றோம். உள்நாட்டு கிரிக்கெட்டில் நிறைய ரன்களும் குவித்தோம். ஆனால் எங்களுக்கு மீண்டும் வாய்ப்பு கிடைக்கவில்லை" என்றார்.

மேலும், "நான் கேப்டன் மற்றும் பயிற்சியாளர்களிடம் ஏன் எனக்கு வாய்ப்பு தரப்படவில்லை என்று கேள்வி எழுப்பினேன். ஆனால் எனக்கு யாரிடமிருந்தும் தெளிவான பதில் கிடைக்கவில்லை. 2019 உலகக் கோப்பை தொடரில் அனுபவம் வாய்ந்த வீரர்கள் தேவைப்பட்டதால், நானும் யுவராஜ் சிங்கும் அணியில் இருந்திருந்தால் சிறப்பாக செயல்பட்டிருக்க முடியும். ஆனால் தேர்வாளர்கள் வேறு வீரர்களுக்கு முன்னுரிமை அளித்தனர்" என்று கூறினார்.

"நாங்க தான் பெஸ்ட்".. இந்தியாவிடம் அடிவாங்கிய பின்னும் அடங்காமல் பேசிய பாகிஸ்தான் கோச் வஹாப்

2011 உலகக் கோப்பை வென்ற இந்திய அணியில் முக்கியப் பங்கு வகித்த சுரேஷ் ரெய்னா, தனது 33 வயதில் சர்வதேச கிரிக்கெட்டில் இருந்து ஓய்வு பெற்றார். இவர் ஒருநாள் போட்டிகளில் 5615 ரன்களும், டி20 போட்டிகளில் 1605 ரன்களும், டெஸ்ட் போட்டிகளில் 768 ரன்களும் குவித்துள்ளது குறிப்பிடத்தக்கது.