"சுப்மன் கில்லிடம் என் கேப்டன் பதவி பறிபோய்விடுமோ என்ற பயம் இருக்கிறது" - சூர்யகுமார் யாதவ்

மும்பை: இந்திய கிரிக்கெட்டில் சுப்மன் கில், டெஸ்ட் மற்றும் ஒருநாள் அணிகளின் கேப்டனாக உருவெடுத்துள்ள நிலையில், டி20 அணியின் கேப்டனாக இருக்கும் சூர்யகுமார் யாதவ், தனது எதிர்காலம் குறித்து முதல் முறையாக வெளிப்படையாகப் பேசியுள்ளார். "சுப்மன் கில்லின் இந்த அபாரமான வளர்ச்சி, எனது டி20 கேப்டன் பதவி பறிபோய்விடுமோ என்ற பயத்தை ஏற்படுத்துகிறது" என்று அவர் கூறி இருக்கிறார்.

இது பற்றி பேசுகையில் சூர்யகுமார் யாதவ், தனது மனதிலுள்ள அச்சத்தை மறைக்காமல் பேசினார். "சுப்மன் கில் இரண்டு வடிவங்களில் கேப்டனாகியிருப்பது எனக்கு மிகவும் மகிழ்ச்சி. அவர் சிறப்பாகச் செயல்பட்டு வருகிறார்" என்று பாராட்டிய சூர்யா, தனது பதவி குறித்த அச்சத்தைப் பற்றிப் பேசும்போது, "நான் பொய் சொல்ல மாட்டேன், அந்தப் பயம் எல்லோருக்கும் இருக்கும். ஆனால், அது ஒருவிதத்தில் உங்களை உத்வேகப்படுத்தும் பயம்," என்றார்.

கில்லுடனான தனது நட்புறவு குறித்துப் பேசிய அவர், "எனக்கும் அவருக்கும் (சுப்மன் கில்) களத்திற்கு உள்ளேயும், வெளியேயும் ஒரு அற்புதமான நட்பு இருக்கிறது. அவர் சிறந்த வீரர், சிறந்த மனிதர் என்பது எனக்குத் தெரியும். அதனால், அவரது வளர்ச்சி, என்னை இன்னும் சிறப்பாகச் செயல்படத் தூண்டுகிறது. அவருக்காக நான் மகிழ்ச்சியடைகிறேன்" என்று தனது முதிர்ச்சியான கருத்தைப் பதிவு செய்தார்.

"அந்தப் பயத்தை நான் அன்றே விட்டுவிட்டேன்!"

சூர்யகுமார் யாதவின் சர்வதேச கிரிக்கெட் பயணம், 31 வயதில் தாமதமாகவே தொடங்கியது. ஆனால், அவர் தனது முதல் பந்தையே சிக்ஸருக்குப் பறக்கவிட்டு, தனது வருகையை உலகிற்கு அறிவித்தார். அந்தத் தருணத்தை நினைவு கூர்ந்த அவர், "நான் இதுபோன்ற விஷயங்களால் பாதிக்கப்பட்டு, எனது எதிர்காலம் குறித்து அதிகம் சிந்திக்கும் ஒருவராக இருந்திருந்தால், சர்வதேச கிரிக்கெட்டில் எனது முதல் பந்தை நான் அப்படி ஆடியிருக்கவே முடியாது. அதனால், அந்தப் பயத்தை நான் வெகு காலத்திற்கு முன்பே விட்டுவிட்டேன். நான் என் மீது கடினமாக உழைத்து, நேர்மையாக இருந்தால், மற்றவை தானாக நடக்கும் என்று நான் நம்புகிறேன்" என்று தனது தன்னம்பிக்கையை வெளிப்படுத்தினார்.

தலைமுறை மாற்றம்

ரோஹித் சர்மா, டி20 மற்றும் டெஸ்ட் கிரிக்கெட்டிலிருந்து ஓய்வு பெற்ற பிறகு, இந்திய கிரிக்கெட்டில் ஒரு பெரிய தலைமுறை மாற்றம் நிகழ்ந்து வருகிறது. ரோஹித் விலகிய பிறகு, டி20 கேப்டனாகப் பொறுப்பேற்ற சூர்யகுமார் யாதவ், 2025 ஆசிய கோப்பையை வென்று கொடுத்து, தனது தலைமையின் கீழ் இந்தியாவை ஒரு அசைக்க முடியாத சக்தியாக மாற்றியுள்ளார்.

ரோஹித் டெஸ்ட்டிலிருந்து ஓய்வு பெற்ற பிறகு, டெஸ்ட் கேப்டனாக நியமிக்கப்பட்ட சுப்மன் கில், கடினமான இங்கிலாந்து மண்ணில் தொடரை 2-2 என சமன் செய்து, தனது தலைமைப் பண்பை நிரூபித்தார். தற்போது, ஒருநாள் கேப்டனாகவும் நியமிக்கப்பட்டுள்ளார். மேலும், டி20 அணியின் துணை கேப்டனாகவும் அவர் இருப்பது, சூர்யாவுக்கு ஒருவித அழுத்தத்தை ஏற்படுத்தியுள்ளது. ஒரு வீரராகத் தனது இடத்தைத் தக்கவைத்துக் கொள்வதே ஒரு பெரிய சவால் என்ற நிலையில், கேப்டன் பதவியைத் தக்கவைத்துக் கொள்ள வேண்டிய கூடுதல் அழுத்தம் சூர்யகுமார் யாதவிற்கு உள்ளது.