நியூசிலாந்து அணிக்கு விழுந்த அடி.. நட்சத்திர வேகப்பந்து வீச்சாளர் உலகக்கோப்பை அணியில் இருந்து விலகல்

மும்பை: இந்தியாவில் நடைபெறவுள்ள 2026 டி20 உலகக்கோப்பை கிரிக்கெட் தொடர் தொடங்குவதற்கு இன்னும் சில வாரங்களே உள்ள நிலையில், நியூசிலாந்து அணிக்கு ஒரு பெரும் பின்னடைவு ஏற்பட்டுள்ளது. அந்த அணியின் நட்சத்திர வேகப்பந்து வீச்சாளர் ஆடம் மில்னே காயம் காரணமாகத் தொடரிலிருந்து முழுமையாக விலகியுள்ளார்.

தென்னாப்பிரிக்காவில் நடைபெற்று வரும் எஸ்ஏ20 லீக் கிரிக்கெட் தொடரில் ஆடம் மில்னே விளையாடி வந்தார். கடந்த ஞாயிற்றுக்கிழமை சன்ரைசர்ஸ் ஈஸ்டர்ன் கேப் அணிக்காகப் பந்துவீசிக் கொண்டிருந்தபோது அவருக்குக் காலில் தசைப்பிடிப்பு ஏற்பட்டது. உடனடியாக எடுக்கப்பட்ட ஸ்கேன் பரிசோதனையில் காயம் தீவிரமாக இருப்பது தெரியவந்தது. இதனால் அவர் உலகக்கோப்பைத் தொடரில் பங்கேற்க முடியாத சூழல் உருவாகியுள்ளது.

மாற்று வீரராக கைல் ஜேமிசன்

ஆடம் மில்னே விலகியதைத் தொடர்ந்து, அவருக்குப் பதிலாக 31 வயதான வேகப்பந்து வீச்சாளர் கைல் ஜேமிசன் அணியில் சேர்க்கப்பட்டுள்ளார். ஜேமிசன் ஏற்கனவே நியூசிலாந்து அணியுடன் இந்தியாவில் சுற்றுப்பயணம் மேற்கொண்டு வருகிறார். மேலும், அவர் உலகக்கோப்பைக்கான மாற்று வீரர்களின் பட்டியலிலும் இடம் பெற்றிருந்தார் என்பது குறிப்பிடத்தக்கது.

இது குறித்து நியூசிலாந்து அணியின் தலைமைப் பயிற்சியாளர் ராப் வால்டர் கூறுகையில், "ஆடம் மில்னே உலகக்கோப்பைக்காகத் தன்னைத் தயார்படுத்தி வந்தார். கடைசி நேரத்தில் காயம் காரணமாக அவர் விலகியது அணிக்கு வருத்தத்தை அளிக்கிறது. அவர் விரைவில் குணமடைய வாழ்த்துகிறோம். கைல் ஜேமிசன் ஏற்கனவே அணியுடன் இந்தியாவில் இருப்பது நமக்குச் சாதகமான விஷயம். அவர் அணியின் வேகப்பந்து வீச்சுக்குக் கூடுதல் பலம் சேர்ப்பார்" என்று தெரிவித்தார்.

நியூசிலாந்து அணியின் அட்டவணை

2026 டி20 உலகக்கோப்பையில் நியூசிலாந்து அணி தனது முதல் பயிற்சி ஆட்டத்தில் பிப்ரவரி 6ஆம் தேதி மும்பையில் அமெரிக்காவை எதிர்கொள்கிறது. அதனைத் தொடர்ந்து பிப்ரவரி 8ஆம் தேதி சென்னையில் நடைபெறும் முதல் லீக் ஆட்டத்தில் ஆப்கானிஸ்தான் அணியுடன் மோதுகிறது.

பின்னர் பிப்ரவரி 10ஆம் தேதி ஐக்கிய அரபு அமீரகத்தையும், பிப்ரவரி 15ஆம் தேதி அகமதாபாத் மைதானத்தில் தென்னாப்பிரிக்காவையும் சந்திக்கிறது. தனது கடைசி லீக் ஆட்டத்தில் பிப்ரவரி 17ஆம் தேதி கனடாவை எதிர்கொள்ளவுள்ளது. கடந்த 2024 டி20 உலகக்கோப்பையில் நியூசிலாந்து அணி லீக் சுற்றுடன் வெளியேறி ஏமாற்றம் அளித்தது. எனவே, இம்முறை அரையிறுதிக்கு முன்னேற வேண்டிய கட்டாயத்தில் அந்த அணி உள்ளது.