டி20 உலககோப்பை: சூப்பர் 8 சுற்றிலிருந்து அரையிறுதிக்கு செல்லும் 4 அணிகள் எது? - தினேஷ் கார்த்திக்

அகமதாபாத்: 2026 ஆம் ஆண்டு டி20 உலகக் கோப்பையின் அரையிறுதிக்குத் தகுதிபெறும் 4 அணிகள் எது என்பதை முன்னாள் இந்திய விக்கெட் கீப்பர் பேட்ஸ்மேன் தினேஷ் கார்த்திக், கணித்துள்ளார். சூப்பர் 8 சுற்று ஆட்டங்கள் கொழும்பில் நியூசிலாந்து, பாகிஸ்தான் மோதும் போட்டியுடன் தொடங்கவுள்ளன.

தினேஷ் கார்த்திக்கின் கணிப்பின்படி, முதல் பிரிவில் (Group 1) நடப்பு சாம்பியன் இந்தியாவும், கடந்த முறை இறுதிப் போட்டியாளர் தென்னாப்பிரிக்காவும் இடம்பிடித்துள்ளன. இரண்டாவது பிரிவிலிருந்து (Group 2) இலங்கையையும், நியூசிலாந்தையும் அவர் தேர்வு செய்துள்ளார்.

"இந்தியா, தென்னாப்பிரிக்கா, மறுபிரிவில் இலங்கை, மற்றும் நியூசிலாந்து ஆகியவை. பாகிஸ்தான் அணியின் பேட்டிங் சற்று பலவீனமாக உள்ளது. இங்கிலாந்து நல்ல அணிதான், ஆனால் இதுவரை அவர்களின் ஆட்டம் தடுமாற்றமாகவே இருந்தது. இங்கிலாந்து ஏன் சிரமப்படும் என்று நான் நினைக்கிறேன் என்பதற்கு இவைதான் காரணங்கள்," என்று தினேஷ் கார்த்திக் கூறினார்.

டி20 உலகக் கோப்பையின் சூப்பர் 8 பிரிவுகளின்படி, இந்திய அணி, தென்னாப்பிரிக்கா, ஜிம்பாப்வே, மேற்கிந்தியத் தீவுகளுடன் முதல் பிரிவில் இடம்பெற்றுள்ளது. இரண்டாவது பிரிவில் நியூசிலாந்து, இங்கிலாந்து, இலங்கை மற்றும் பாகிஸ்தான் அணிகள் உள்ளன.

கார்த்திக் தேர்ந்தெடுத்த நான்கு அணிகளும், சூப்பர் 8 சுற்றுக்குத் தகுதிபெறும் வகையில் இதுவரை இந்தத் தொடரில் சிறப்பாகச் செயல்பட்டுள்ளன. இந்திய அணியைப் பொறுத்தவரை, ஆரம்பம் முதலே ஆதிக்கம் செலுத்தி, அடுத்த சுற்றுக்கு தோல்வியின்றி முன்னேறியுள்ளது.

அமெரிக்கா, நமீபியா, பாகிஸ்தான், நெதர்லாந்து ஆகிய அணிகளை வீழ்த்தி, குரூப் ஏ பிரிவில் நடந்த நான்கு ஆட்டங்களிலும் முழு வெற்றி பெற்று, இந்திய அணி புள்ளிப்பட்டியலில் முதலிடத்தைப் பிடித்தது.மறுபுறம், தென் ஆப்பிரிக்காவும் அதேபோல் ஆதிக்கம் செலுத்தி வருகிறது. சூப்பர் 8 சுற்றுக்கு தோல்வியின்றி, குரூப் டி பிரிவில் முதலிடம் பிடித்துள்ளது. கனடா, ஆப்கானிஸ்தான், நியூசிலாந்து மற்றும் ஐக்கிய அரபு அமீரகத்தை அவர்கள் வீழ்த்தினர்.

இலங்கையும் குரூப் பி பிரிவில் மூன்று வெற்றிகள் மற்றும் ஒரு தோல்வியுடன் இரண்டாவது இடத்தைப் பிடித்துள்ளது. ஜிம்பாப்வேயுடன் அவர்கள் அடைந்த ஒரே தோல்வி ஆகும். அயர்லாந்து, ஓமன், ஆஸ்திரேலியாவை வென்றுள்ளனர்.இறுதியாக, நியூசிலாந்து அணி குரூப் டி பிரிவில் இரண்டாவது இடத்தைப் பிடித்தது. ஒரு தோல்வியுடன் மூன்று ஆட்டங்களை வென்றது. ஆப்கானிஸ்தான் மற்றும் ஐக்கிய அரபு அமீரகத்தை வீழ்த்தி தொடங்கிய அவர்கள், தென் ஆப்பிரிக்காவிடம் தோற்றாலும், கனடாவுக்கு எதிராக ஒரு அபார வெற்றியுடன் மீண்டும் எழுச்சி பெற்றது.