SA vs NZ: “லா ஆஃப் ஆவரேஜ்” சிக்கலில் தென்னாப்பிரிக்கா?.. நியூசிலாந்து வெற்றி பெற அதிக வாய்ப்பா?

கொல்கத்தா: 2026 டி20 உலகக் கோப்பை கிரிக்கெட் தொடரின் முதல் அரையிறுதிப் போட்டியில் தென்னாப்பிரிக்கா மற்றும் நியூசிலாந்து அணிகள் கொல்கத்தா ஈடன் கார்டன்ஸ் மைதானத்தில் மோதவுள்ளன. இந்தத் தொடரில் தென்னாப்பிரிக்க அணி இதுவரை தொடர்ச்சியாக ஏழு போட்டிகளில் வெற்றி பெற்று மிகவும் பலமான நிலையில் காணப்படுகிறது. லீக் சுற்றிலும் நியூசிலாந்து அணியை வீழ்த்தியிருப்பதால், அரையிறுதியிலும் அந்த அணியே வெற்றி பெற அதிக வாய்ப்புள்ளதாகக் கருதப்படுகிறது.

பொதுவாக விளையாட்டில் ஒரு அணி தொடர்ந்து பல வெற்றிகளைப் பெற்று வரும்போது, எப்போதாவது ஒரு போட்டியில் தோல்வியைச் சந்திக்கும் என ஒரு கணிப்பு உண்டு. இதனை விளையாட்டுத் துறையில் சராசரி விதி என்று கூறுவார்கள். இந்த விதி நியூசிலாந்துக்கு எதிரான அரையிறுதியில் தென்னாப்பிரிக்க அணிக்கு எதிராகத் திரும்புமா என்ற கேள்வி அணித் தலைவர் எய்டன் மார்க்ரமிடம் எழுப்பப்பட்டது.

மார்க்ரம் பதில்

செய்தியாளர் சந்திப்பில் இந்தக் கேள்விக்குப் புன்னகையுடன் பதிலளித்த மார்க்ரம், போட்டி நடைபெறும் நாளில் என்ன நடக்கும் என்பது யாருக்கும் தெரியாது என வெளிப்படையாகக் கூறினார். மேலும் அவர் பேசுகையில், "நாளைய போட்டியில் என்ன நடக்கும் என்பதை நம்மால் உறுதியாகக் கூற முடியாது. அரையிறுதிப் போட்டியை நீங்கள் பல்வேறு கோணங்களில் பார்க்கலாம். ஆனால், இப்படி ஒரு தோல்வி குறித்து சிந்திப்பது எங்கள் அணியின் ஓய்வறையில் உள்ள யாருக்கும் சிறப்பான ஒரு விஷயமாக இருக்காது. நாங்கள் இந்த முக்கியமான போட்டிக்கு மிகுந்த நம்பிக்கையுடன்தான் தயாராகி வருகிறோம். இதுவரை எங்களுக்குக் கைகொடுத்த திட்டங்கள் மற்றும் எங்கள் செயல்பாடுகள் மீது எங்களுக்கு முழு நம்பிக்கை உள்ளது," என்று தெரிவித்தார்.

தென்னாப்பிரிக்கா அதிக வெற்றி

டி20 உலகக் கோப்பை வரலாற்றைப் பொறுத்தவரை, தென்னாப்பிரிக்க அணிக்குச் சாதகமான புள்ளிவிவரங்களே உள்ளன. டி20 உலகக் கோப்பையில் நியூசிலாந்துக்கு எதிராக விளையாடிய ஐந்து போட்டிகளிலும் தென்னாப்பிரிக்கா தோல்வியைச் சந்திக்கவில்லை. கடந்த பிப்ரவரி 14ஆம் தேதி நடந்த லீக் போட்டியிலும் தென்னாப்பிரிக்கா ஏழு விக்கெட்டுகள் வித்தியாசத்தில் எளிதாக வென்றது.

T20 WC: அரையிறுதியில் இந்திய அணியை எதிர்கொள்ள வேண்டும் என்பதே ஆசை.. இங்கிலாந்து கேப்டன் புரூக்

நாக் அவுட்டில் நியூசிலாந்து

எனினும், நாக் அவுட் போட்டிகள் என்று வரும்போது புள்ளிவிவரங்கள் நியூசிலாந்து அணிக்குச் சாதகமாக உள்ளன. ஐசிசி தொடர்களின் நாக் அவுட் சுற்றுகளில் நியூசிலாந்து அணி எப்போதும் தென்னாப்பிரிக்காவுக்கு எதிராகச் சிறப்பாகச் செயல்பட்டுள்ளது. 2011 உலகக் கோப்பை, 2015 உலகக் கோப்பை மற்றும் 2025 சாம்பியன்ஸ் டிராபி ஆகிய நாக் அவுட் போட்டிகளில் தென்னாப்பிரிக்காவை நியூசிலாந்து வீழ்த்தியுள்ளது.

T20 WC: பாகிஸ்தானை யாரும் மதிப்பதில்லை.. எங்களிடம் திறமையான வீரர்கள் இல்லை.. முகமது அமீர் கவலை

டி20 உலகக் கோப்பை நாக் அவுட் சுற்றில் இரு அணிகளும் மோதுவது இதுவே முதல்முறையாகும். முந்தைய நாக் அவுட் தோல்விகளுக்கு முற்றுப்புள்ளி வைத்து தென்னாப்பிரிக்கா இறுதிப்போட்டிக்கு முன்னேறுமா அல்லது நியூசிலாந்து மீண்டும் தனது நாக் அவுட் பலத்தை நிரூபிக்குமா என்பது போட்டியின் முடிவில் தெரிந்துவிடும்.