T20 WC: விராட் கோலி, தோனியை பார்த்து திருந்துங்க சார்.. சூர்யகுமாரை சாடிய EX- ஆர்சிபி வீரர்

மும்பை: 2026 டி20 உலகக் கோப்பை சூப்பர் 8 போட்டியில் தென்னாப்பிரிக்காவுக்கு எதிரான தோல்வியில் அக்சர் படேலை நீக்கிய இந்திய அணியின் தலைமை முடிவை முன்னாள் இந்திய கிரிக்கெட் வீரர் முகமது கைஃப் கடுமையாக விமர்சித்துள்ளார். இது பதற்றத்தில் எடுக்கப்பட்ட ஒரு நடவடிக்கை என்று அவர் சாடியுள்ளார்.

அகமதாபாத்தில் உள்ள நரேந்திர மோடி மைதானத்தில் நடைபெற்ற சூப்பர் 8 போட்டியில் இந்திய அணி 76 ரன்கள் வித்தியாசத்தில் தோல்வியடைந்தது. தென்னாப்பிரிக்கா அணி எடுத்த 188 ரன்களுக்கு எதிராக இந்திய அணியால் 111 ரன்கள் மட்டுமே எடுக்க முடிந்தது. அக்சருக்கு பதிலாக அணியில் சேர்க்கப்பட்ட சுழற்பந்து வீச்சாளர் வாஷிங்டன் சுந்தர், 2 ஓவர்களில் 17 ரன்கள் கொடுத்து விக்கெட் எடுக்கவில்லை, மேலும் பேட்டிங்கில் 11 பந்துகளில் 11 ரன்கள் மட்டுமே சேர்த்தார்.

அக்சருக்கு பதிலாக சுந்தரை சேர்த்தது ஒரு யுத்தி என சூர்யகுமார் யாதவ் குறிப்பிட்டிருந்தார். தென்னாப்பிரிக்காவின் இடது கை பேட்ஸ்மேன்களை எதிர்கொள்ளவே இந்த மாற்றம் செய்யப்பட்டது என்று பேட்டிங் பயிற்சியாளர் சிதன்ஷு கோட்டக் தெரிவித்திருந்தார். இது குறித்து பேசிய முகமது கைஃப் “எம்.எஸ்.தோனி மற்றும் ரோஹித் ஷர்மா போன்ற அனைத்து சிறந்த கேப்டன்களும் அனைத்து அம்சங்களையும் உள்ளடக்கிய ஒரு பிளேயிங் லெவனை உருவாக்குவதையே நோக்கமாகக் கொண்டிருந்தனர்."

"எதிரணியில் நிறைய இடது கை பேட்ஸ்மேன்கள் உள்ளனர் என்பதால் எங்கள் இடது கை சுழற்பந்து வீச்சாளர் விளையாடமாட்டார் என்பது போல இல்லை. இது உங்களுக்கு போதிய முறையில் தயாராக இல்லை என்பதைக் காட்டுகிறது. 2024 டி20 உலகக் கோப்பையை நாம் வென்றபோது எங்கள் அணியில் யார் ஆஃப் ஸ்பின்னர்கள் இருந்தனர்? வாஷிங்டன் சுந்தரோ அல்லது அஸ்வினோ இல்லை” என்று கூறினார்.

“அக்சர் அரையிறுதியில் இங்கிலாந்துக்கு எதிராக 'போட்டியின் சிறந்த வீரர்’ விருதை வென்றார். ஜானி பேர்ஸ்டோ, ஜோஸ் பட்லர் மற்றும் மொயீன் அலி ஆகியோரை அவர் ஆட்டமிழக்கச் செய்தார். மொயீன் அலி ஒரு இடது கை வீரர். அவர் எப்படி அவருக்கு எதிராக ஆட்டமிழந்தார்? சார், இது இப்படி நடக்காது. கேசவ் மகாராஜ் விக்கெட்டுகளை வீழ்த்தினார். நீங்கள் ஒருவருக்கு வாய்ப்பளித்து, அவருக்கு நம்பிக்கை கொடுத்தால், அவர் எதையும் செய்ய முடியும்.”

“ஐ.சி.சி. போட்டிகளில் அக்சர் படேல் ஒரு நிரூபிக்கப்பட்ட சாம்பியன். என் கருத்துப்படி, 2024 டி20 உலகக் கோப்பை இறுதிப் போட்டியில் அவரது கேமியோவுக்காக அவர் 'போட்டியின் சிறந்த வீரர்’ ஆக இருந்திருக்க வேண்டும். விராட் கோலியின் ஸ்ட்ரைக் ரேட் 128, அக்சர் படேலின் ஸ்ட்ரைக் ரேட் 150. அவர் அந்த போட்டியில் நான்கு சிக்ஸர்கள் அடித்தார். நீங்கள் அவரால்தான் அரையிறுதி மற்றும் இறுதிப் போட்டியில் வென்றீர்கள், ஆனால் அவரை ஓரங்கட்டிவிட்டீர்கள்.”

“இடது கை பேட்ஸ்மேன்களுக்கு எதிராக அவர் சிறந்து விளங்க அவரை விளையாட வையுங்கள். அவர் நிச்சயமாக அதைச் செய்ய முடியும். கடைசி நேர முடிவு எனக்கு ஆச்சரியத்தை அளித்தது. நாம் பீதியில் இருந்ததைக் காட்டியது. எங்களுக்கு எதிராக இறுதிப் போட்டியில் தோற்ற போதிலும் அவர்கள் இயல்பாக இருந்தார்கள், ஆனால் நாங்கள் பீதியடைந்து மாற்றங்களைச் செய்தோம்,” என்று முன்னாள் கிரிக்கெட் வீரர் கைஃப் தனது பேச்சை நிறைவு செய்தார்.