சூப்பர் 8இல் பாகிஸ்தானுக்கு ஜாலி.. மழை செய்த உதவி.. PAK vs NZ போட்டி நின்றதால் கிடைத்த லாபம்

கொழும்பு: பாகிஸ்தான் மற்றும் நியூசிலாந்து அணிகளுக்கு இடையிலான 2026 டி20 உலகக்கோப்பை சூப்பர் 8 சுற்றுப் போட்டி மழையால் ஒரு பந்து கூட வீசப்படாமல் கைவிடப்பட்டது. மாற்று நாள் இல்லாத காரணத்தால் இரு அணிகளும் தலா ஒரு புள்ளியைப் பகிர்ந்து கொண்டுள்ளன. இந்த முடிவால் பாகிஸ்தான் அணியின் அரையிறுதி வாய்ப்பு பாதிக்கப்பட்டுள்ளதா என்ற கேள்வி ரசிகர்களிடையே எழுந்துள்ளது. ஆனால், பாகிஸ்தான் மற்றும் நியூசிலாந்து அணிகளுக்கு இதனால் நன்மைதான் ஏற்பட்டு இருக்கிறது.

அரையிறுதிக்குச் செல்ல என்ன செய்ய வேண்டும்?

சூப்பர் 8 சுற்றில் ஒவ்வொரு அணிக்கும் தலா மூன்று போட்டிகள் உள்ளன. ஒரு போட்டியில் வெற்றி பெற்றால் 2 புள்ளிகள் வழங்கப்படும். தற்போது பாகிஸ்தான் மற்றும் நியூசிலாந்து அணிகள் தலா 1 புள்ளியுடன் உள்ளன. பாகிஸ்தான் அணி தனது அடுத்த இரண்டு போட்டிகளில் முறையே பிப்ரவரி 24 அன்று இங்கிலாந்தையும், பிப்ரவரி 28 அன்று இலங்கையையும் எதிர்கொள்கிறது. இனி பாகிஸ்தான் அணி அரையிறுதிக்குத் தகுதி பெற என்னென்ன வாய்ப்புகள் உள்ளன என்பதைப் பார்ப்போம்.

இங்கிலாந்து மற்றும் இலங்கை என அடுத்த இரண்டு போட்டிகளிலும் பாகிஸ்தான் வெற்றி பெற்றால், அந்த அணி மொத்தம் 5 புள்ளிகளைப் பெறும். சூப்பர் 8 சுற்றில் 5 புள்ளிகள் பெறுவது அரையிறுதி வாய்ப்பு உறுதியாக்கும்.

ஒரு போட்டியில் வெற்றி பெற்று, ஒன்றில் தோல்வியடைந்தால் பாகிஸ்தான் அணி 3 புள்ளிகளுடன் சூப்பர் 8 சுற்றை முடிக்கும். அப்போது மற்ற அணிகளின் போட்டி முடிவுகள் மற்றும் நிகர ரன் ரேட் அடிப்படையில் தான் அரையிறுதி வாய்ப்பு முடிவாகும். மூன்றும் புள்ளிகள் என்பது அரையிறுதிக்குச் செல்லப் போதுமானதாக இருந்தாலும், போட்டி கடுமையாக இருக்கும்.

பாகிஸ்தான் அணி அடுத்த இரண்டு சூப்பர் 8 போட்டிகளிலும் தோற்றால் 1 புள்ளியுடன் தொடரை விட்டு முழுமையாக வெளியேறும்.

மழையால் பாகிஸ்தானுக்கு லாபமா? நஷ்டமா?

புள்ளிவிவரங்களின் அடிப்படையில் பார்த்தால், இந்தப் போட்டி மழையால் கைவிடப்பட்டது பாகிஸ்தான் மற்றும் நியூசிலாந்து அணிகளுக்குச் சாதகமாகவே அமைந்துள்ளது. இந்தக் குழுவில் உள்ள நான்கு அணிகளும் சமபலம் வாய்ந்தவை என்று வைத்துக்கொண்டால், போட்டி தொடங்குவதற்கு முன் ஒவ்வொரு அணிக்கும் அரையிறுதிக்குச் செல்ல தலா 50 சதவீத வாய்ப்பு இருந்தது.

ஒரு வழக்கமான போட்டியில் விளையாடும்போது வெற்றி பெற்று 2 புள்ளிகள் பெற 50 சதவீத வாய்ப்பும், தோற்றுப் புள்ளிகள் ஏதுமின்றிப் போக 50 சதவீத வாய்ப்பும் இருக்கும். ஆனால், நேற்றைய போட்டி மழையால் கைவிடப்பட்டதால், பாகிஸ்தான் மற்றும் நியூசிலாந்து அணிகள் தோல்வியடையும் அபாயத்தைத் தவிர்த்து தலா ஒரு புள்ளியை உறுதி செய்துள்ளன.

ஒருவேளை நேற்றைய போட்டியில் பாகிஸ்தான் தோற்றிருந்தால் அந்த அணிக்குக் கடும் பின்னடைவு ஏற்பட்டிருக்கும். அந்த ஆபத்து தற்போது நீங்கியுள்ளது. அதே சமயம், இதே குழுவில் உள்ள இலங்கை மற்றும் இங்கிலாந்து அணிகள் தங்கள் மூன்று போட்டிகளிலும் வெற்றி பெற வேண்டும் என்ற கட்டாயத்தில் விளையாட வேண்டியுள்ளது.

சாத்தியமான அனைத்து முடிவுகளையும் கணக்கிட்டுப் பார்த்தால், பாகிஸ்தான் மற்றும் நியூசிலாந்து அணிகளின் அரையிறுதி வாய்ப்பு தற்போது 56 சதவீதமாக அதிகரித்துள்ளது. இலங்கை மற்றும் இங்கிலாந்து அணிகளின் வாய்ப்பு 43 சதவீதமாகக் குறைந்துள்ளது. எனவே, இந்த மழையால் எந்த நஷ்டமும் இல்லை என்றும், தோல்விக்கான வாய்ப்பைத் தவிர்த்து ஒரு புள்ளி கிடைத்துள்ளதால் பாகிஸ்தான் மற்றும் நியூசிலாந்து அணிகள் இதற்காகக் கவலைப்படத் தேவையில்லை என்றே கிரிக்கெட் விமர்சகர்கள் கருதுகின்றனர்.