டி20 உலககோப்பைக்கு முன்பான இலங்கை தொடர்.. பாகிஸ்தான் அணியிலிருந்து பாபர் அசாம், அப்ரிடி நீக்கம்

கராச்சி: இலங்கை அணிக்கு எதிரான மூன்று டி20 போட்டிகள் கொண்ட தொடரில் சல்மான் அலி ஆகா தலைமையிலான பாகிஸ்தான் அணி அறிவிக்கப்பட்டுள்ளது. ஜனவரி 7, 9 மற்றும் 11 ஆகிய தேதிகளில் தம்புள்ளாவில் இப்போட்டிகள் நடைபெற உள்ளன. இந்தத் தொடருக்கான அணியில், முன்னணி வீரர்களான பாபர் அசாம், ஷாஹீன் ஷா அப்ரிடி, ஹாரிஸ் ரவுஃப் மற்றும் முகமது ரிஸ்வான் ஆகியோர் அணியில் இடம்பெறவில்லை.

பிக் பாஷ் லீக் தொடரில் விளையாடி வருவதால், இவர்கள் ஆஸ்திரேலியாவிலேயே இருப்பார்கள்.டி20 போட்டிகளில் அதிக ரன்கள் குவித்த பாபர் அசாம், ஒருநாள் அணி கேப்டன் ஷாஹீன் ஷா அப்ரிடி, மற்றும் அதிக விக்கெட்டுகள் வீழ்த்திய ஹாரிஸ் ரவுஃப் போன்ற முக்கிய வீரர்கள் அணியிலிருந்து நீக்கப்பட்டுள்ளனர்.

மறுபுறம், பிக் பாஷ் லீக்கில் சிட்னி தண்டர் அணிக்காக விளையாடி வரும் சுழற்பந்து வீச்சு ஆல்ரவுண்டர் ஷதாப் கான் அணியில் சேர்க்கப்பட்டுள்ளார். அவர் 2025 ஜூன் 1-க்குப் பிறகு அணிக்குத் திரும்பியுள்ளார். சர்வதேசப் போட்டிகளில் அறிமுகமாகாத விக்கெட் கீப்பர்-பேட்ஸ்மேன் குவாஜா நஃபேவுக்கு முதல் முறையாக வாய்ப்பு வழங்கப்பட்டுள்ளது. டி20 உலககோப்பைக்கு முன் பாபர் அசாம் உள்ளிட்டோர் நீக்கப்பட்டிருப்பது ரசிகர்களை அதிர்ச்சி அடைய வைத்திருக்கிறது.

இந்த இலங்கைக்கு எதிரான டி20 தொடர் 2026 டி20 உலகக் கோப்பைக்கு பாகிஸ்தான் அணியைத் தயார்படுத்த உதவும். 2026 பிப்ரவரி 7 முதல் மார்ச் 8 வரை நடைபெறும் ஐசிசி ஆண்கள் டி20 உலகக் கோப்பை தொடரில் 20 அணிகள் பங்கேற்கின்றன. இதன் போட்டிகள் இந்தியாவில் ஐந்து இடங்களிலும், இலங்கையில் மூன்று இடங்களிலும் நடத்தப்பட உள்ளன.

இந்தியா, பாகிஸ்தான் இடையேயான அரசியல் உறவுகளில் உள்ள பதற்றம் காரணமாக, பாகிஸ்தான் அணி இந்தியாவுக்குப் பயணம் செய்யாது. கொழும்பு மற்றும் பல்லேகலேயில் மட்டுமே அனைத்துப் போட்டிகளையும் விளையாடும். அரையிறுதி மற்றும் இறுதிப் போட்டிகளுக்கும் அவர்கள் தகுதி பெற்றால், அப்போட்டிகள் இலங்கையிலேயே நடக்கும்.

2026 உலகக் கோப்பையில், பாகிஸ்தான் 'ஏ' பிரிவில் இந்தியா, நெதர்லாந்து, நமீபியா மற்றும் அமெரிக்காவுடன் களம் காண்கிறது. மிகவும் எதிர்பார்க்கப்படும் இந்தியா-பாகிஸ்தான் போட்டி பிப்ரவரி 15 அன்று கொழும்பின் ஆர். பிரேமதாச மைதானத்தில் நடைபெற திட்டமிடப்பட்டுள்ளது.

இலங்கை தொடருக்கான பாகிஸ்தான் அணி விபரம்: சல்மான் அலி ஆகா (கேப்டன்), அப்துல் சமாத், அப்ரார் அகமது, ஃபஹீம் அஷ்ரஃப், ஃபகர் ஜமான், குவாஜா நஃபே, முகமது நவாஸ், முகமது சல்மான் மிர்சா, முகமது வசிம் ஜுனியர், நசீம் ஷா, சாஹிப்சாதா ஃபர்ஹான், சையாம் அயூப், ஷதாப் கான், உஸ்மான் கான், உஸ்மான் தாரிக்.