போட்டி விவரங்கள்
இரு அணிகளும் மோதும் இந்த 2வது ஒருநாள் போட்டி ஹாமில்டனில் உள்ள செடோன் பார்க் மைதானத்தில் நடைபெறவிருக்கிறது. இந்திய நேரப்படி காலை 7 மணிக்கு தொடங்கும் என அறிவிக்கப்பட்டுள்ளது. இதில் இந்தியா கம்பேக் கொடுக்கும் என எதிர்பார்க்கப்படும் சூழலில் ஹாமில்டன் மைதானம் இந்தியாவுக்கு எமனாக வந்து நின்றுள்ளது.
காரணம் என்ன
நியூசிலாந்திலேயே இந்தியாவுக்கு மிகவும் மோசமான மைதானம் என்றால் அது ஹாமில்டன் தான். இங்கு இதுவரை 7 ஒருநாள் போட்டிகளில் விளையாடியுள்ள இந்தியா ஒரே ஒரு முறை மட்டுமே வெற்றிகண்டுள்ளது. மற்ற அனைத்திலும் தோல்வி தான். அந்த ஒரே ஒரு வெற்றி கடந்த 2009ம் ஆண்டு தோனி கேப்டனாக இருந்த போது வந்தது. 1981ம் ஆண்டு முதல் 2020ம் ஆண்டு வரை இந்தியாவால் இங்கு சோபிக்கவே முடியவில்லை.
மிக மோசம்
கடைசியாக கடந்த 2020ம் ஆண்டு இங்கு நடந்த போட்டியில் இந்திய அணி 4 விக்கெட்கள் இழப்புக்கு 347 ரன்களை குவித்தது. இந்த இமாலய இலக்கை கூட கட்டுப்படுத்த முடியாமல் 4 விக்கெட்கள் வித்தியாசத்தில் மோசமாக தோற்றிருந்தது. தற்போது நடந்து வரும் முதல் ஒருநாள் போட்டியில் 306 ரன்களே அடித்தும் தோற்ற இந்தியா, ஹேமில்டனில் 350 அடித்தாலும் போதாது.
பவுலிங் பிரச்சினை
இந்திய அணியின் பேட்டிங்கை பொறுத்தவரையில் மிகச்சிறப்பானதாக இருக்கிறது. ஆனால் நியூசிலாந்தில் உள்ள சிறிய மைதானங்களில் வெற்றி பெற வேண்டுமென்றால் பவுலிங் மிக சிறப்பாக இருந்தால் மட்டுமே முடியும். அதற்கு அனுபவம் வாய்ந்த தீபக் சஹார் உள்ளிட்ட வீரர்களை உள்ளே கொண்டு வர வேண்டும்.