கிரிக்கெட் ரசிகர்களுக்கான அடுத்த விருந்து.. இலங்கை டூர்-கான தேதிகள் வெளியானது.. ஷிகர் தவான் கேப்டன்?

டெஸ்ட் சாம்பியன்ஷிப்

தற்போது இங்கிலாந்து சென்றுள்ள இந்திய அணி, அங்கு முதலில் ஜூன் 18 - 22 வரை நியூசிலாந்து அணிக்கு எதிராக உலக டெஸ்ட் சாம்பியன்ஷிப் இறுதிப்போட்டியில் பங்கேற்கிறது. அதனை தொடர்ந்து இங்கிலாந்து அணிக்கு எதிராக ஆக.4ம் தேதி முதல் செப்.14ம் தேதி வரை 5 போட்டிகள் கொண்ட டெஸ்ட் தொடரில் பங்கேற்கிறது.

இலங்கை சுற்றுப்பயணம்

இது ஒருபுறம் இருக்க ஜூலை மாதத்தில் மற்றொரு இந்திய அணி இலங்கையில் சுற்றுப்பயணம் மேற்கொண்டு 3 ஒருநாள் போட்டி மற்றும் 3 டி20 போட்டிகள் கொண்ட தொடரில் பங்கேற்கிறது. சீனியர் வீரர்கள் அனைவரும் இங்கிலாந்து சுற்றுப்பயணம் சென்றுள்ளதால், இலங்கை தொடரில் ஐபிஎல் மற்றும் உள்நாட்டு தொடர்களில் கலக்கிய இளம் வீரர்கள் விளையாடவுள்ளனர்.

அட்டவணை வெளியீடு

இந்நிலையில் இந்த தொடருக்கான அட்டவணையை சோனி ஸ்போர்ட்ஸ் நிறுவனம் வெளியிட்டுள்ளது. அதன்படி, இரு அணிகளுக்கு இடையேயான ஒருநாள் போட்டி தொடர் ஜூலை 13ம் தேதி தொடங்குகிறது. 2 மற்றும் 3வது ஒரு நாள் போட்டி ஜூலை 16, 18 தேதிகளில் நடைபெறுகிறது. மேலும் டி20 போட்டிகள் ஜூலை 21, 23 மற்றும் 25ம் தேதிகளில் நடைபெறும் என அறிவிக்கப்பட்டுள்ளது.

முக்கிய போட்டி

இளம் வீரர்கள் அடங்கிய இந்த அணியை ஷிகர் தவான் தலைமை தாங்க அதிக வாய்ப்புள்ளதாக கூறப்படுகிறது. இந்திய அணியின் தலைமை பயிற்சியாளர் ரவிசாஸ்திரி இங்கிலாந்து சுற்றுப்பயணம் சென்றிருப்பதால், இலங்கை தொடருக்கான அணிக்கு ராகுல் டிராவிட் பயிற்சியாளராக செயல்படவுள்ளார். இலங்கை தொடரில் சிறப்பாக விளையாடும் வீரர்களுக்கு டி20 உலகக்கோப்பையில் வாய்ப்பு கிடைக்கும் என்பது குறிப்பிடத்தக்கது.