ஒரே போட்டியில் 3 பெரும் சாதனைகள்.. ஒருநாள் கிரிக்கெட்டில் வரலாறு படைத்த இந்தியா.. ரசிகர்கள் பாராட்டு

இந்திய இன்னிங்ஸ்

இந்திய அணித்தரப்பில் ஓப்பனிங் வீரர் ஷிகர் தவான் 74 பந்துகளில் 58 ரன்களை விளாசினார். மற்றொரு தொடக்க வீரரான சுப்மன் கில் 98 ரன்களை சேர்த்து அணியின் வெற்றிக்கு வித்திட்டார். மிடில் ஆர்டரை பொறுத்தவரையில் சூர்யகுமார் யாதவ் 8 ரன்களுக்கு வெளியேறி சொதப்ப, ஸ்ரேயாஸ் ஐயர் 44 ரன்களை குவித்தார்.

இந்தியா வெற்றி

கடின இலக்கை விரட்டிய வெஸ்ட் இண்டீஸ் அணி இந்திய பவுலிங்கை சமாளிக்க முடியாமல் அடுத்தடுத்து வெளியேறியது. அந்த அணியில் 4 வீரர்கள் டக் அவுட்டும் 3 பேர் ஒற்றை இலக்க ரன்களிலும் வெளியேறினர். கேப்டன் நிகோலஸ் பூரண் (42) - பிராண்டன் கிங் (42) ரன்கள் அமைத்து போராடியபோதும் அணியை காப்பாற்ற முடியவில்லை. இறுதியில் 26 ஓவர்களிலெல்லாம் அந்த அணி 137 ரன்கள் மட்டுமே எடுத்து ஆட்டமிழந்தது.

பிரமாண்ட சாதனை

இந்நிலையில் இந்த வைட் வாஷ் மூலம் இந்திய அணி பெரும் சாதனையை தனதாக்கியுள்ளது. இந்திய அணி கடந்த 1983ம் ஆண்டு முதல் வெஸ்ட் இண்டீஸ் அணிக்கு எதிராக 50 ஓவர் கிரிக்கெட் போட்டிகளில் மோதி வருகிறது. இந்த 39 ஆண்டுகளில் இந்திய மண்ணில் வைட் வாஷ் செய்திருந்தாலும், ஒரு முறை கூட வெஸ்ட் இண்டீஸ் மண்ணில் இந்தியா வைட் வாஷ் செய்ததில்லை. முதல் முறையாக அந்த பெருமையை தற்போது பெற்றுள்ளது.

4வது கேப்டன் தவான்

ஒருநாள் கிரிக்கெட் வரலாற்றில் இந்திய அணியின் 13வது வைட் வாஷ் இதுவாகும். குறிப்பாக அயல்நாட்டு மண்ணில் செய்யும் 5வது வைட் வாஷாகும். இதற்கு முன்பாக விராட் கோலி (2013), ரகானே (2015), தோனி (2016) ஆகியோர் ஜிம்பாவே மண்ணிலும், இலங்கையில் விராட் கோலி (2017) தலைமையில் ஒரு முறையும் இந்தியா வைட் வாஷ் செய்துள்ளது.

ஒரே ஆண்டில் 2 வைட் வாஷ்

நடப்பாண்டு தொடக்கத்தில் வெஸ்ட் இண்டீஸ் அணியை சொந்த மண்ணில் வைத்து இந்தியா வைட் வாஷ் செய்திருந்தது. தற்போது இதே ஆண்டில் அவர்கள் மண்ணில் சாய்த்துள்ளது. இதன் மூலம் ஒரு அணிக்கு எதிராக ஒரே ஆண்டில் 2 வைட் வாஷ்களை செய்த 3வது அணியாக இந்தியா பெருமை பெற்றுள்ளது.

இதற்கு முன்பாக வங்கதேசத்திற்கு எதிராக ஜிம்பாவே அணியும், கென்யாவுக்கு எதிராக வங்கதேசமும் செய்திருந்தது.