ஆர்சிபி அணியின் கடந்த கால உரிமையாளர்கள் யார்? சந்தித்த சர்ச்சைகள் என்ன?

பெங்களூரு: ஐபிஎல் வரலாற்றில் மிகவும் பிரபலமான, ரசிகர்களின் பெரும் ஆதரவைப் பெற்ற அணிகளில் ஒன்றாக ராயல் சேலஞ்சர்ஸ் பெங்களூரு (RCB) விளங்குகிறது. விராட் கோலி, டிவில்லியர்ஸ், கிறிஸ் கெயில் என பல ஜாம்பவான்கள் விளையாடிய இந்த அணி, தனது உரிமையாளர்கள் மாற்றம் மற்றும் பல்வேறு சர்ச்சைகளுக்காகவும் பலமுறை விவாதப் பொருளாக மாறியுள்ளது.

ஆர்சிபி அணியை தற்போது ஆதித்யா பிர்லா குழுமம் வாங்கியுள்ள நிலையில், கடந்த கால உரிமையாளர்கள் மற்றும் அந்த அணியைச் சுற்றி அரங்கேறிய முக்கிய சர்ச்சைகள் குறித்த தற்போது பார்க்கலாம்.

ஆர்சிபி அணியின் கடந்த கால உரிமையாளர்கள்

2008ஆம் ஆண்டு ஐபிஎல் தொடர் தொடங்கப்பட்டபோது, பெங்களூருவை மையமாகக் கொண்ட இந்த அணியை இந்தியாவின் பிரபல தொழிலதிபரான விஜய் மல்லையா தனது 'யுனைடெட் ஸ்பிரிட்ஸ்' (United Spirits Limited - USL) நிறுவனத்தின் மூலம் 111.6 மில்லியன் அமெரிக்க டாலர் கொடுத்து வாங்கினார். அப்போது மும்பை இந்தியன்ஸ் அணிக்கு அடுத்தபடியாக அதிக விலை கொடுத்து வாங்கப்பட்ட இரண்டாவது விலையுயர்ந்த அணியாக ஆர்சிபி இருந்தது.

IND vs ENG: வைபவ் சூர்யவன்ஷி தொடர்பான கேள்வி.. என் கைகள் கட்டப்பட்டு இருப்பதாக ஸ்ரேயாஸ் ஐயர் பேச்சு

விஜய் மல்லையாவின் நிதி நெருக்கடிகள் மற்றும் சட்ட ரீதியான சிக்கல்களுக்குப் பிறகு, பிரிட்டனைச் சேர்ந்த உலகின் மிகப்பெரிய மதுபான நிறுவனமான டயஜியோ (Diageo), யுனைடெட் ஸ்பிரிட்ஸ் நிறுவனத்தின் பெரும்பான்மை பங்குகளைக் கைப்பற்றியது. இதன் மூலம் ஆர்சிபி அணியின் முழுக் கட்டுப்பாடும் டயஜியோ நிறுவனத்தின் வசம் வந்தது.

2026ஆம் ஆண்டின் தொடக்கத்தில், ஆர்சிபி அணி ஆதித்யா பிர்லா குழுமம், டைம்ஸ் இன்டர்நெட், பிளாக்ஸ்டோன் மற்றும் போல்ட் வென்ச்சர்ஸ் ஆகிய நிறுவனங்கள் அடங்கிய ஒரு பெரிய கூட்டமைப்பிற்கு சுமார் 1.78 பில்லியன் அமெரிக்க டாலருக்கு (சுமார் ₹16,700 கோடி) விற்கப்படும் வரை டயஜியோ நிறுவனமே இதன் உரிமையாளராக நீடித்தது.

ஆர்சிபி அணியைச் சுற்றிய முக்கிய சர்ச்சைகள்

திறமையான பல வீரர்களைக் கொண்டிருந்தாலும், பல வருடங்களாக கோப்பையை வெல்ல முடியாமல் தவித்தது, மைதானத்திற்கு வெளியேயும் உள்ளேயும் நடந்த சம்பவங்கள் ஆர்சிபி அணியை சர்ச்சைகளின் மையமாக மாற்றின.

1. விஜய் மல்லையாவின் நிதி மோசடி மற்றும் தப்பியோட்டம்

ஆர்சிபி அணியின் அடையாளமாகத் திகழ்ந்த விஜய் மல்லையா, தனது கிங்ஃபிஷர் ஏர்லைன்ஸ் நிறுவனத்திற்காக இந்திய வங்கிகளில் வாங்கிய சுமார் ₹9,000 கோடிக்கும் அதிகமான கடனைத் திருப்பிச் செலுத்தாமல் 2016இல் லண்டனுக்குத் தப்பியோடினார். அவர் 'தேடப்படும் பொருளாதாரக் குற்றவாளி' என அறிவிக்கப்பட்டதால், ஆர்சிபி அணியின் பிம்பத்திற்கு பெரும் பாதிப்பு ஏற்பட்டது. இதன் காரணமாகவே அவர் யுனைடெட் ஸ்பிரிட்ஸ் வாரியத்தில் இருந்தும், ஆர்சிபி நிர்வாகத்தில் இருந்தும் கட்டாயமாக விலக நேரிட்டது.

IND vs ENG: திலக் வர்மா சுயநலமாக விளையாடினார்.. நடு ஓவர்களில் ஒரு பவுண்டரி கூட அடிக்கல.. ஸ்ரீகாந்த்

2. லூக் போமர்ஸ்பாக் விவகாரம் (2012)

2012ஆம் ஆண்டு ஐபிஎல் தொடரின் போது ஆர்சிபி அணியில் இடம் பெற்றிருந்த ஆஸ்திரேலிய வீரர் லூக் போமர்ஸ்பாக், டெல்லியில் உள்ள ஒரு நட்சத்திர ஹோட்டலில் அமெரிக்கப் பெண் ஒருவரிடம் தவறாக நடக்க முயன்றதாகவும், அதைத் தடுத்த அவரது காதலரைத் தாக்கியதாகவும் டெல்லி போலீசாரால் கைது செய்யப்பட்டார். இந்தச் சம்பவம் கிரிக்கெட் உலகில் பெரும் அதிர்ச்சியை ஏற்படுத்தியது. உடனடியாக அந்த வீரரை அணியில் இருந்து விஜய் மல்லையா சஸ்பெண்ட் செய்தார்.

3. சித்தார்த் மல்லையாவின் சர்ச்சை கருத்து

லூக் போமர்ஸ்பாக் சர்ச்சையின் போது, விஜய் மல்லையாவின் மகனான சித்தார்த் மல்லையா தனது ட்விட்டர் பக்கத்தில், பாதிக்கப்பட்ட பெண்ணின் நடத்தை குறித்து அவதூறான கருத்துக்களைப் பதிவிட்டார். இது பொதுமக்களிடையேயும் ஊடகங்களிடையேயும் கடுமையான கண்டனங்களை எதிர்கொண்டதுடன், ஆர்சிபி நிர்வாகத்திற்குப் பெரும் தலைவலியாக அமைந்தது.

4. மைதானத்தில் வீரர்களின் மோதல்கள் (விராட் கோலி - கௌதம் கம்பீர் மோதல்கள்)

ஆர்சிபி அணியின் முன்னாள் கேப்டன் விராட் கோலி எப்போதும் ஆக்ரோஷமான ஆட்டத்திற்குப் பெயர் பெற்றவர். 2013 ஐபிஎல்: கொல்கத்தா நைட் ரைடர்ஸ் அணியின் கேப்டன் கௌதம் கம்பீருக்கும் விராட் கோலிக்கும் இடையே மைதானத்தில் கடுமையான வாக்குவாதம் ஏற்பட்டு, மற்ற வீரர்கள் தலையிட்டு இருவரையும் விலக்கினர்.

2023 ஐபிஎல்: லக்னோ சூப்பர் ஜெயண்ட்ஸ் அணிக்கு எதிரான போட்டியின் போது, மீண்டும் விராட் கோலிக்கும் அப்போதைய லக்னோ ஆலோசகர் கௌதம் கம்பீர் மற்றும் ஆப்கானிஸ்தான் வீரர் நவீன்-உல்-ஹக் ஆகியோருக்கும் இடையே மைதானத்திலேயே கடுமையான வார்த்தை மோதல்கள் வெடித்தன. இது ஐபிஎல் ஒழுங்குமுறை விதிகளின்படி அபராதங்களுக்கு வழிவகுத்தது.

2025ஆம் ஆண்டு ஐபிஎல் தொடரை ஆர்சிபி அணி முதல் முறையாக வென்றதை கொண்டாட பெங்களூருவில் ஒரு நிகழ்ச்சி ஏற்பாடு செய்யப்பட்டிருந்தது. அதில் ஏற்பட்ட கூட்ட நெரிசலிலி சிக்கி 11 பேர் உயிரிழந்தனர். இதனால் விழா ஏற்பட்டாளர்கள் கைது செய்யப்பட்டனர். இதனால் பெங்களூரு சிக்கநாமி மைதானத்தில் 11 மாதங்கள் எந்தவித சர்வதேச போட்டியும் நடத்தப்படாமல் இருந்தது. இன்னும் சொல்ல போனால் இந்த பிரச்சினைக்கு பிறகு தான் ஆர்சிபியை விற்க டயஜியோ நிறுவனம் முடிவுக்கு வந்தது.

ஆர்சிபி அணி அதிகாரப்பூர்வமாக கைமாறியது.. ஒப்புதல் அளித்த மத்திய அரசு.. இனி புதிய நிர்வாகம் கீழ் RCB

விஜய் மல்லையாவின் காலத்திலிருந்த ஆடம்பரக் கொண்டாட்டங்கள், நிதி மோசடிச் சர்ச்சைகள் மற்றும் மைதானத்தில் அரங்கேறிய வீரர்களின் ஆக்ரோஷ மோதல்கள் என ஆர்சிபி அணியின் வரலாறு பல்வேறு திருப்பங்களைக் கொண்டது. இருப்பினும், கிறிஸ் கெயில், ஏபி டி வில்லியர்ஸ் மற்றும் விராட் கோலி போன்ற ஜாம்பவான்கள் உருவாக்கிய பிராண்ட் மதிப்பும், ரசிகர்களின் மாறாத விசுவாசமும் ஆர்சிபி அணியை உலகளவில் மிக மதிப்புமிக்க விளையாட்டு அணிகளில் ஒன்றாகத் தக்கவைத்துள்ளது. தற்போது புதிய நிர்வாகத்தின் கீழ் அணி மாறியிருந்தாலும், அதன் கடந்த காலச் சம்பவங்கள் ஐபிஎல் வரலாற்றின் பிரிக்க முடியாத பக்கங்களாகும்.