டாப் 5 குறைந்த ஸ்கோர்.. இந்தியா எடுத்த 36 ரன்களை விட டெஸ்ட்டில் மிக மோசமாக ஆடிய 3 அணிகள்

மும்பை: டெஸ்ட் கிரிக்கெட் போட்டிகளில் அதிக ரன்கள் குவிப்பது சுவாரசியமான சாதனையாக பார்க்கப்படும் நிலையில், சில நேரங்களில் முன்னணி அணிகள் மிகக் குறைந்த ரன்களுக்குச் சுருண்டு ரசிகர்களுக்கு அதிர்ச்சி அளித்துள்ளன. குறிப்பாக இந்திய அணி 2020இல் ஆஸ்திரேலியாவுக்கு எதிராக 36 ரன்களுக்கு ஆல் - அவுட் ஆகி இருந்தது. ஆனால் டெஸ்ட் கிரிக்கெட் வரலாற்றில் இதை மிகக் குறைந்த 5 இன்னிங்ஸ் ஸ்கோர்கள் உள்ளன.

இந்தப் பட்டியலில் நியூசிலாந்து அணி முதலிடத்தில் உள்ளது. கடந்த 1955 ஆம் ஆண்டு ஆக்லாந்தின் ஈடன் பார்க் மைதானத்தில் இங்கிலாந்துக்கு எதிரான டெஸ்ட் போட்டியின் முதல் இன்னிங்ஸில் நியூசிலாந்து அணி 200 ரன்கள் எடுத்திருந்தது. ஆனால் இரண்டாவது இன்னிங்ஸில், அந்த அணி வெறும் 26 ரன்களுக்கு அனைத்து விக்கெட்டுகளையும் இழந்தது. இங்கிலாந்தின் பாப் ஆப்பிள்யார்ட் மற்றும் பிரையன் ஸ்டாத்தம் ஆகியோரின் பந்துவீச்சை எதிர்கொள்ள முடியாமல் அந்த அணி 27 ஓவர்களில் சுருண்டது. ஒரு பேட்ஸ்மேன் கூட இரட்டை இலக்க ரன்னைத் தொடவில்லை என்பது குறிப்பிடத்தக்கது.

அடுத்ததாக, வெஸ்ட் இண்டீஸ் அணி இரண்டாவது இடத்தில் உள்ளது. கடந்த 2025 ஜூலை 12 அன்று கிங்ஸ்டன் மைதானத்தில் ஆஸ்திரேலியாவுக்கு எதிராக நடைபெற்ற போட்டியில், நான்காவது இன்னிங்ஸில் வெஸ்ட் இண்டீஸ் அணி 1.86 ரன் ரேட் வீதத்தில் 14.3 ஓவர்களில் வெறும் 27 ரன்களுக்குச் சுருண்டது. இது டெஸ்ட் வரலாற்றில் அந்த அணியின் மிக மோசமான சாதனையாகப் பதிவானதுடன், ஆஸ்திரேலியா எளிதாக வென்றது.

தென்னாப்பிரிக்க அணி இப்பட்டியலில் அடுத்த மூன்று இடங்களை ஆக்கிரமித்துள்ளது. கடந்த 1896 பிப்ரவரி 13 அன்று போர்ட் எலிசபெத் மைதானத்தில் இங்கிலாந்துக்கு எதிரான நான்காவது இன்னிங்ஸில், தென்னாப்பிரிக்கா வெறும் 30 ரன்களுக்கு ஆட்டமிழந்தது. அப்போது 5 பந்துகள் கொண்ட ஓவர்கள் வீசப்பட்ட நிலையில், 18.4 ஓவர்களில் அந்த அணி சுருண்டது.

இதேபோல், 1924 ஜூன் 14 அன்று பர்மிங்காம் மைதானத்தில் இங்கிலாந்துக்கு எதிராக நடைபெற்ற போட்டியின் இரண்டாவது இன்னிங்ஸிலும் தென்னாப்பிரிக்கா 12.3 ஓவர்களில் மீண்டும் 30 ரன்களுக்குச் சுருண்டு அதிர்ச்சி அளித்தது.

தென்னாப்பிரிக்காவின் மற்றொரு மோசமான ஸ்கோர் 1899 ஏப்ரல் 1 அன்று கேப்டவுன் மைதானத்தில் பதிவானது. இங்கிலாந்துக்கு எதிரான இந்த போட்டியின் நான்காவது இன்னிங்ஸில், தென்னாப்பிரிக்கா 22.4 ஓவர்களில் வெறும் 35 ரன்களுக்கு அனைத்து விக்கெட்டுகளையும் இழந்தது. இந்த ஐந்து இன்னிங்ஸ்களும் டெஸ்ட் கிரிக்கெட்டில் பேட்டிங் செய்வது எவ்வளவு கடினமானது என்பதை சுட்டிக்காட்டுகின்றன.