இந்திய அணியில் கம்பீர் சர்வாதிகாரி போல் செயல்படுகிறார்.. வைபவ் சூர்யவன்ஷி சிறுவயது கோட்ச் தாக்கு

மும்பை: இந்திய கிரிக்கெட் அணியின் இளம் பேட்டிங் நட்சத்திரமான வைபவ் சூர்யவன்சியின் சிறுவயது பயிற்சியாளர் மனீஷ் ஓஜா, கௌதம் கம்பீர் மற்றும் அணி நிர்வாகத்தை கடுமையாக விமர்சித்துள்ளார். வெஸ்ட் இண்டீஸ் அணிக்கு எதிரான டி20 தொடரில் வைபவ் தொடர்ந்து புறக்கணிக்கப்பட்டு வருவதைத் தொடர்ந்து, அணி நிர்வாகம் சர்வாதிகாரப் போக்கை கடைப்பிடிப்பதாக அவர் குற்றம் சாட்டியுள்ளார்.

ஊடகங்களுக்கு அளித்த பேட்டியில் பேசிய பயிற்சியாளர் மனீஷ் ஓஜா, 15 வயதான வைபவ் சூர்யவன்சி ஐந்து போட்டிகள் கொண்ட இந்த டி20 தொடரின் முதல் மூன்று போட்டிகளிலும் பெஞ்சில் அமரவைக்கப்பட்டிருப்பது குறித்து தனது அதிருப்தியை வெளிப்படுத்தினார்.

இது குறித்து பேசிய அவர், "தற்போதுள்ள அணி நிர்வாகம் தங்களுக்கு என்ன தோன்றுகிறதோ அதைச் செய்யும் ஒருவித சர்வாதிகாரப் போக்கைக் கடைப்பிடிக்கிறது என்று நான் உணர்கிறேன். வீரர்களை பெஞ்சில் அமர வைப்பதன் மூலம் அவர்களை உருவாக்கிவிடலாம் என இந்த நிர்வாகம் நினைக்கிறது. ஆனால், பெஞ்சில் உட்கார வைப்பதன் மூலம் எந்த வீரரும் உருவானதும் இல்லை, இனி உருவாக்கப்படப் போவதும் இல்லை" என்று ஓஜா தெரிவித்துள்ளார்.

ராகுல் டிராவிட் மகன் அன்வே டிராவிட் அபாரம்.. 41 பந்துகளில் 85 ரன்கள் குவிப்பு.. 5 சிக்சர் விளாசல்

உள்நாட்டு போட்டிகள் மற்றும் இளையோர் பிரிவில் பெற்ற வேகமான வளர்ச்சி மூலம் இந்திய அணியில் வாய்ப்பைப் பெற்ற இடதுகை தொடக்க ஆட்டக்காரரான வைபவ் சூர்யவன்சி, அபிஷேக் சர்மாவுடன் தொடக்க வீரராக களம் இறக்கப்படுவதில் அணி நிர்வாகம் மேற்கொண்டு வரும் சுழற்சி முறையில் சிக்கியுள்ளார். 2026 ஆசிய விளையாட்டுப் போட்டிக்கு முன்னதாக நடைபெற்ற பயிற்சி ஆட்டங்களில் விக்கெட் கீப்பர்-பேட்டர் சஞ்சு சாம்சன் தொடக்க வீரராகக் களம் இறங்கிய நிலையில், முதன்மைத் தொடரின் போது சாம்சன் 3-வது வரிசைக்கு மாற்றப்பட்டு, வைபவ் சூர்யவன்சி அபிஷேக்குடன் தொடக்க வீரராகக் களம் இறக்கப்பட்டார்.

இருப்பினும், தற்போதைய வெஸ்ட் இண்டீஸ் தொடரில் லக்னோ, ராஞ்சி மற்றும் இந்தூரில் நடைபெற்ற போட்டிகளில் சஞ்சு சாம்சனை மீண்டும் தொடக்க ஆட்டக்காரராக களமிறக்க அணி நிர்வாகம் முடிவெடுத்தது. இதனால் இளம் வீரர் வைபவ் சூர்யவன்சி மைதானத்திற்கு வெளியே தண்ணீர் எடுத்துச் செல்லும் நிலைக்குத் தள்ளப்பட்டுள்ளார்.

"இந்தச் சிறுவனுக்கு வாய்ப்பு வழங்கக் கூடாது என்பதில் அவர்கள் தெளிவாக இருக்கிறார்கள் போலத் தெரிகிறது. அவரை வெளியே அமர வைத்து எந்தளவுக்கு விரக்தியடையச் செய்ய முடியுமோ அந்தளவுக்குச் செய்கிறார்கள். அவர் வெளியே உட்கார்ந்து குடிநீர் விநியோகித்துக் கொண்டிருக்கிறார்" என்று ஓஜா மேலும் கூறியுள்ளார்.

Also Read

IND vs WI: இந்த 2 வீரரை நீக்கிய கம்பீர் முடிவு சரியானது தான்.. புஜாரா பாராட்டு

தற்போது ஐந்து போட்டிகள் கொண்ட இந்த டி20 தொடரில் இந்திய அணி 2-1 என்ற கணக்கில் முன்னிலை வகிக்கிறது. ஐதராபாத்தில் நடைபெறவுள்ள நான்காவது டி20 போட்டிக்கு முன்பாக, இந்தத் தொடர் முடிவதற்குள் இளம் திறமைசாலியான வைபவ் சூர்யவன்சிக்கு ஆடும் லெவனில் வாய்ப்பு கிடைக்குமா என்ற எதிர்பார்ப்பு எழுந்துள்ளது.