வைபவ் சூர்யவன்ஷி-யை இந்திய அணியில் சேர்க்க வேண்டும்.. முன்னாள் கேப்டன் கவாஸ்கர் கருத்து

மும்பை: இந்திய ஆடவர் கிரிக்கெட் அணி ஜூலை 2026 இல் இங்கிலாந்துக்கு சுற்றுப்பயணம் மேற்கொள்ளவுள்ளது. இச்சுற்றுப்பயணத்தில் ஐந்து போட்டிகள் கொண்ட டி20 மற்றும் மூன்று போட்டிகள் கொண்ட ஒருநாள் போட்டித் தொடரில் பங்கேற்கிறது. ஜூலை 1 முதல் ஜூலை 19 வரை நடைபெறவுள்ள இத்தொடருக்கான இந்திய அணியில், 15 வயதான இளம் வீரர் வைபவ் சூர்யவன்ஷியை சேர்க்க வேண்டும் என இந்திய கிரிக்கெட் ஜாம்பவான் சுனில் கவாஸ்கர் தெரிவித்துள்ளார்.

இந்த ஒரு மாத கால வெளிநாட்டுச் சுற்றுப்பயணம் ஜூலை 1 ஆம் தேதி செஸ்டர்-லெ-ஸ்ட்ரீட்டில் டி20 தொடருடன் தொடங்குகிறது. தொடர்ந்து, ஒருநாள் போட்டிகள் ஜூலை 14, 16, 19 ஆகிய தேதிகளில் முறையே பர்மிங்காம், கார்டிஃப் மற்றும் லார்ட்ஸ் ஆகிய மைதானங்களில் நடைபெறவுள்ளன. மூத்த வீரர்கள் தேர்வுக் குழு, அடுத்த மாதம் இந்திய அணியின் வெள்ளைப்பந்து தொடர்களுக்கான அணியை அறிவிக்க உள்ளது. இந்த சூழலில் கவாஸ்கரின் கருத்து முக்கியத்துவம் பெறுகிறது.

முன்னாள் இந்திய கேப்டனும், தலைசிறந்த தொடக்க ஆட்டக்காரருமான சுனில் கவாஸ்கர், வைபவ் சூர்யவன்ஷி இந்திய அணிக்காக டி20 போட்டிகளில் விளையாட "முழுமையாகத் தயாராக" இருப்பதாகத் தெரிவித்துள்ளார். 15 வயதே ஆனாலும், இரண்டு முறை டி20 உலகக் கோப்பையை வென்ற இங்கிலாந்து அணியுடனான இந்த முக்கியமான தொடருக்கான இந்திய அணியில் அவர் இடம்பெற வேண்டும் என்று கவாஸ்கர் நம்பிக்கையுடன் உள்ளார்.

IPL 2026: குவாலிபையர் 2வில் ராஜஸ்தான், குஜராத் போட்டி மழையால் தடை, டை ஆனால் என்ன ஆகும்? விதி என்ன?

சமீபத்தில் அவர் அளித்த பேட்டியில், நடப்பு 2026 ஐபிஎல் தொடரில் அனுபவமுள்ள பந்துவீச்சாளர்களுக்குச் சவால் அளித்து வருவதால், வைபவின் வயதைக் காரணம் காட்டி அவரை சர்வதேச கிரிக்கெட்டிலிருந்து விலக்கி வைக்கக்கூடாது என கவாஸ்கர் தெரிவித்தார். "அவன் (வைபவ்) டி20 போட்டிகளுக்கு முழுமையாகத் தயார்" என்று அவர் உறுதியாகக் கூறினார்.

மேலும், "இங்கிலாந்து சுற்றுப்பயணத்திற்கான இந்திய டி20 அணி தேர்வு செய்யப்படும்போது, அவருக்கு அணியில் இடம் கிடைக்கும் என்று நம்புகிறேன். ஏனெனில், இத்தகைய அற்புதமான வெளிப்பாட்டிற்குப் பிறகு, இப்போதும் நீங்கள் அவரைத் தேர்வு செய்யவில்லை என்றால், வேறு எப்போது செய்வீர்கள்? அவருக்கு நிச்சயம் இடம் கிடைக்க வேண்டும்” என்று கவாஸ்கர் வலியுறுத்தினார்.

வைபவின் திறனைப் பாராட்டிய கவாஸ்கர், அவரது வயதைக் கருத்தில் கொள்ள வேண்டாம் எனக் கேட்டுக்கொண்டார். “அவரது வயதைக் கணக்கில் கொள்ளாதீர்கள். ஒரு துளிகூட அதைப் பார்க்காதீர்கள். ஏனெனில், அவரைவிட 15 வயது மூத்த, அதிக சர்வதேச அனுபவம் கொண்ட பந்துவீச்சாளர்களுக்கு எதிராக அவர் பவுண்டரிகளை விளாசி, பந்துகளை கேலரிகளுக்கு விரட்டும் விதத்தைப் பார்த்தால், அவரது வயது ஒரு பொருட்டே அல்ல” என்று கவாஸ்கர் மேலும் குறிப்பிட்டார்.

1971 முதல் 1987 வரை இந்தியாவுக்காக டெஸ்ட் மற்றும் ஒருநாள் போட்டிகளில் விளையாடிய கவாஸ்கர், மக்கள் வைபவின் வயதை விட்டுவிட்டு அவரது பேட்டிங்கில் மட்டுமே கவனம் செலுத்த வேண்டும் என்று அறிவுறுத்தினார். “சூர்யவன்ஷியின் வயதைப் பார்க்காதீர்கள். அவர் விளையாடும் விதம், அணுகுமுறை ஆகியவற்றை மட்டும் பாருங்கள். அவரிடம் ஒரு துளிகூட பயமில்லை. சுத்தமாகப் பயமில்லை."

தொடர்ந்து அவர், "சிறுவர்கள் எப்படி விளையாடுவார்கள் என்பது உங்களுக்குத் தெரியும். எந்தத் தெருவுக்கோ அல்லது எந்த மைதானத்துக்கோ செல்லுங்கள். நாங்கள் குழந்தைகளாக இருந்தபோது, தற்காப்புடன் விளையாடினோமா? வயதாகும்போதுதான் நாங்கள் தற்காப்புடன் விளையாடக் கற்றுக்கொண்டோம். டென்னிஸ் பந்து கிரிக்கெட்டில் கூட, நாங்கள் எப்போதுமே பெரிய ஷாட்களை அடிக்க முயற்சிப்போம். சூர்யவன்ஷி செய்வதும் இதுதான்” என்று விளக்கினார்.

வைபவ் சூர்யவன்ஷிக்கு சத்குரு வாழ்த்து.. இளம் தலைமுறை வந்து கொண்டிருக்கிறது என பாராட்டு

கவாஸ்கர் தனது விருப்பத்தை வெளிப்படுத்தியபோது, “மேலும், இதற்காகவே நான் கடவுளைப் பிரார்த்திக்கிறேன். அவரது விளையாட்டிலும், அவரது அணுகுமுறையிலும் உள்ள குழந்தைத்தனம் ஒருபோதும் மாறக்கூடாது. அந்தக் குழந்தைத்தனம் எப்போதும் அவரிடம் உயிருடன் இருக்க வேண்டும், ஏனெனில் அந்த உற்சாகத்தின் மூலம் அவர் தொடர்ந்து நம் அனைவருக்கும் மகிழ்ச்சியைத் தருவார்” என்று கூறினார்.