வைபவ் சூர்யவன்ஷிக்கு காத்திருக்கும் மிகப் பெரிய சவால்.. நியூசிலாந்து பயிற்சியாளர் கருத்து

மும்பை: வரும் டி20 தொடரில், நியூசிலாந்தின் வேகமும் பவுன்ஸும் நிறைந்த ஆடுகளங்களில் தனது திறமையை நிரூபிக்குமாறு இந்திய இளவீரர் வைபவ் சூர்யவன்ஷிக்கு நியூசிலாந்து அணியின் தலைமைப் பயிற்சியாளர் ராப் வால்டர் சவால் விடுத்துள்ளார். 15 வயதான வைபவ், 2026 ஐபிஎல் தொடரிலும், சமீபத்திய ஜிம்பாப்வேக்கு எதிரான டி20 தொடரிலும் சிறப்பான ஆட்டத்தை வெளிப்படுத்தி இந்த ஆண்டு டி20 கிரிக்கெட் உலகில் பெரும் கவனத்தை ஈர்த்துள்ளார்.

ஐபிஎல் 2026 தொடரில் 237-க்கும் அதிகமான ஸ்ட்ரைக் ரேட்டுடன் 776 ரன்கள் குவித்து ஆரஞ்சு தொப்பியை சூர்யவன்ஷி வென்றார். இதைத் தொடர்ந்து, அயர்லாந்து மற்றும் இங்கிலாந்து சுற்றுப்பயணங்களுக்கான இந்திய டி20 அணியில் அவருக்கு வாய்ப்பு கிடைத்தது. இங்கிலாந்திற்கு எதிரான அறிமுகத் தொடரில் அவர் தடுமாறினாலும், இடதுகை பேட்டரான அவர் ஜிம்பாப்வே தொடரில் தொடர் நாயகன் விருது பெற்று தன் திறமையை நிரூபித்தார்.

நெருக்கடியான சூழ்நிலையில் இருக்கும் சூர்யவன்ஷியை எதிர்கொள்வது குறித்து பேசிய நியூசிலாந்து அணி பயிற்சியாளர் வால்டர் "ஆம், வேகமும் பவுன்ஸும் நிறைந்த ஆடுகளங்களில் அவர் எப்படி விளையாடுகிறார் என்பதைப் பார்க்க நான் விரும்புகிறேன். அவர் ஒரு சிறந்த வீரர். ஐபிஎல் தொடரில் உலகின் சிறந்த பந்துவீச்சாளர்களுக்கு எதிராக அவர் ஆதிக்கம் செலுத்தியதை நாம் பார்த்திருக்கிறோம்.

17 ஆண்டுகள் அல்ல.. 17 மாதத்தில் அடுத்த உலககோப்பையை வென்று கொடுத்தேன்.. கம்பீர் காட்டம்

வெவ்வேறு சூழ்நிலைகளுக்கு அவர் எவ்வாறு பழகுகிறார் மற்றும் எங்கள் நாட்டு ஆடுகளங்களில் அவருக்கு எதிராக நாங்கள் எப்படி பந்துவீசுகிறோம் என்பதைப் பார்ப்பதே இப்போதுள்ள சவாலாகும். ஒரு பயிற்சியாளராக, நமது வீரர்கள் சற்று நெருக்கடியான சூழ்நிலைக்கு தள்ளப்படும்போது அவர்கள் அதற்கு எப்படி எதிர்வினையாற்றுகிறார்கள் என்பதைப் பார்க்கவே நான் எப்போதும் விரும்புவேன்.

எனவே, இந்த சவாலை ஆவலுடன் எதிர்பார்க்கிறேன். ஒருவேளை அவர் இந்தத் தொடரில் விளையாடாவிட்டாலும், இந்திய அணியில் அவரைத் தவிர பல சிறந்த வீரர்கள் உள்ளனர்" என்று குறிப்பிட்டார். இங்கிலாந்திற்கு எதிரான தனது அறிமுக டி20 தொடரில் ஜோஃப்ரா ஆர்ச்சரின் வேகத்தில் தடுமாறிய சூர்யவன்ஷி, மூன்று இன்னிங்ஸ்களில் 14 என்ற சராசரியுடன் வெறும் 42 ரன்கள் மட்டுமே எடுத்திருந்தார் என்பது குறிப்பிடத்தக்கது.

2026 டி20 உலகக் கோப்பை இறுதிப் போட்டியில் இந்தியாவின் கைகளில் அடைந்த அதிர்ச்சித் தோல்விக்கு பழிவாங்குவதே நியூசிலாந்து அணியின் முதன்மை நோக்கம் என்பதை ராப் வால்டர் மறுத்துள்ளார். இது குறித்து பேசிய அவர், "அந்த எண்ணம் மனதில் இருக்கும் என்பதை நான் ஒப்புக்கொள்கிறேன். இறுதிப் போட்டியில் தோற்பதை யாரும் விரும்ப மாட்டார்கள். நான் அதை இரண்டு முறை அனுபவித்திருக்கிறேன்,

எனவே அதன் வலி எனக்கு நன்றாகத் தெரியும். ஆனால், எல்லாவற்றிற்கும் மேலாக பிளாக் கேப்ஸ் அணியையும் நியூசிலாந்து நாட்டையும் சிறப்பாகப் பிரதிநிதித்துவப்படுத்துவதே எங்கள் முக்கிய நோக்கமாக இருக்கும். எங்கள் அணியைச் சேர்ந்த வீரர்கள் எப்போதும் அதைத்தான் முதலில் செய்ய முயல்வார்கள். சொந்த மண்ணில் சில வெற்றிகளைப் பெற்றால் அது எங்களுக்கு மிகவும் மகிழ்ச்சியாக இருக்கும்" என்று கூறினார்.

Also Read

வைபவ் சூர்யவன்ஷியால் என் தூக்கம் போச்சு.. நான் எடுத்ததில் கடினமான முடிவு அது.. கம்பீர் பேச்சு

2026 டி20 உலகக் கோப்பை இறுதிப் போட்டி உட்பட, இந்தியாவுக்கு எதிரான தங்களது கடைசி எட்டு டி20 போட்டிகளில் ஏழில் நியூசிலாந்து அணி தோல்வியடைந்துள்ளது. இரு அணிகளுக்கும் இடையிலான ஐந்து போட்டிகள் கொண்ட டி20 தொடர் அக்டோபர் 22 அன்று நியூசிலாந்தில் தொடங்குகிறது.