IPL 2026: தோனியை போல் ஹெலிகாப்டர் ஷாட் ஆடிய 15 வயது வைபவ் சூர்யவன்ஷி.. 5 சிக்சர், 3 பவுண்டரி விளாசல்

சந்திகார்: ஐபிஎல் 2026 தொடரில், ராஜஸ்தான் ராயல்ஸ் வீரர் வைபவ் சூரியவன்ஷி பஞ்சாப் கிங்ஸ் அணிக்கு எதிராக 16 பந்துகளில் வேகமான 43 ரன்கள் விளாசினார். சண்டிகரில் உள்ள பிசிஏ மைதானத்தில் 223 ரன்கள் இலக்கை துரத்தியபோது, ஐந்து சிக்ஸர்கள் மற்றும் மூன்று பவுண்டரிகள் உட்பட அவரது அதிரடி, அர்ஷ்தீப் சிங் மற்றும் லோக்கி பெர்குசன் பந்துவீச்சை கலங்கடித்தது.

டாஸ் வென்ற ராஜஸ்தான் கேப்டன் ரியான் பராக் பந்துவீச்சைத் தேர்வு செய்ய, பஞ்சாப் துவக்க ஆட்டக்காரர்களான பிரப்சிம்ரன் சிங் , ஆர்யா ஜோடி அதிரடியாக 37 ரன்கள் சேர்த்தது. ஆர்யா ஆர்ச்சரால் வெளியேற, கூப்பர் கானோலி 14 பந்துகளில் 30 ரன்கள் எடுத்து வேகத்தைத் தொடர்ந்தார். யாஷ் பூஞ்சா கானோலியின் விக்கெட்டைக் கைப்பற்றினார்.

ஸ்ரேயாஸ் ஐயர், பிரப்சிம்ரனுடன் இணைந்து இன்னிங்ஸை நிலைப்படுத்தினார். பிரப்சிம்ரன் (44 பந்துகளில் 59 ரன்கள்) பூஞ்சாவால் வீழ்த்தப்பட, 27 பந்துகளில் 30 ரன்கள் எடுத்த ஸ்ரேயாஸ் ஐயரை பர்கர் அவுட்டாக்கினார். மார்கஸ் ஸ்டோனிஸ் ஆட்டமிழக்காமல் 62 ரன்கள் சேர்த்து, பஞ்சாப் கிங்ஸ் 20 ஓவர்களில் 4 விக்கெட்டுக்கு 222 ரன்கள் குவிக்க உதவினார்.

இலக்கை துரத்திய ராஜஸ்தான் ராயல்ஸ் அணிக்காக, யஷஸ்வி ஜெய்ஸ்வாலுடன் களமிறங்கிய சூரியவன்ஷி அதிரடியைக் காட்டினார். இவர்களது 51 ரன்கள் பார்ட்னர்ஷிப்க்கு பிறகு, இளம் வீரரான சூரியவன்ஷி அர்ஷ்தீப் சிங் பந்துவீச்சில் ஆட்டமிழந்து வெளியேறினார். இந்த இன்னிங்சில் தோனியை போல் ஹெலிகாப்டர் ஷாட் ஆடி ஒட்டுமொத்த ரசிகர்களையும் ஆச்சரியப்படுத்தினார்.

சூரியவன்ஷிக்குப் பின் வந்த துருவ் ஜூரல், ஜெய்ஸ்வாலுடன் இணைந்து ஒன்பதாவது ஓவருக்குள் அணியின் ஸ்கோரை மூன்று இலக்கத்தை எட்டச் செய்தார். யுஸ்வேந்திர சஹால், ஜூரலை 16 ரன்களிலும், பிறகு அற்புதமான அரைசதம் அடித்த ஜெய்ஸ்வாலையும் அடுத்தடுத்து வெளியேற்றினார்.சஹால், ராஜஸ்தான் கேப்டன் ரியான் பராக்கையும் வீழ்த்தி மூன்று விக்கெட்டுகளைக் கைப்பற்றி, ராஜஸ்தான் அணியைக் கடும் நெருக்கடிக்கு உள்ளாக்கினார்.