24 பந்தில் 10 சிக்சர்கள் விளாசிய 14 வயது வீரர் வைபவ் சூர்யவன்ஷி.. SA U19 அணியை சூப்பு வைத்த இந்தியா

டர்பன்: தென் ஆப்பிரிக்கா U-19 அணிக்கு எதிரான இரண்டாவது இளையோர் ஒருநாள் போட்டியில் இந்திய U-19 அணி எட்டு விக்கெட் வித்தியாசத்தில் டக்வொர்த் லூயிஸ் ஸ்டெர்ன் (DLS) முறைப்படி வெற்றி பெற்றது. இதன் மூலம் 3 போட்டிகள் கொண்ட தொடரை 2-0 என்ற கணக்கில் கைப்பற்றியது. கேப்டன் வைபவ் சூர்யவன்ஷி வெறும் 24 பந்துகளில் 10 சிக்ஸர்கள் உட்பட அதிரடியாக 68 ரன்கள் குவித்து வெற்றிக்கு முக்கியப் பங்காற்றினார்.

இந்த வெற்றியின் மூலம் இந்திய U-19 அணி தென்னாப்பிரிக்காவுக்கு எதிராக அசைக்க முடியாத 2-0 முன்னிலையைப் பெற்றது. இப்போட்டிக்கு முன், நடந்த முதல் ஒருநாள் போட்டியையும் இந்திய அணி DLS முறைப்படி 25 ரன்கள் வித்தியாசத்தில் வென்றிருந்தது. முதலில் பேட் செய்த தென்னாப்பிரிக்கா, ஜேசன் ரௌல்ஸின் சிறப்பான 114 ரன்கள் (117 பந்துகள்; 7 பவுண்டரிகள், 3 சிக்ஸர்கள்) உதவியுடன் 49.3 ஓவர்களில் 245 ரன்கள் குவித்தது.

தென்னாப்பிரிக்கா U-19 அணியின் டேனியல் போஸ்மேன் 31 ரன்கள் எடுத்தார். இந்திய பந்துவீச்சில், கிஷான் சிங் 8.3 ஓவர்களில் 46 ரன்களுக்கு 4 விக்கெட்டுகளையும், ஆர்.எஸ். அம்ப்ரிஷ் 47 ரன்களுக்கு 2 விக்கெட்டுகளையும் வீழ்த்தி சிறப்பாக செயல்பட்டனர்.

தொடரில் இரண்டாவது முறையாக, பெனோனியில் நடந்த இப்போட்டியில் மோசமான வானிலை மற்றும் மின்னல் காரணமாக ஆட்டம் தடைபட்டது. இதனால் ஏற்பட்ட தாமதத்தால், இந்தியாவின் இலக்கு DLS முறைப்படி 27 ஓவரில் 174 ரன்களாக திருத்தப்பட்டது. ஆட்டம் நிறுத்தப்படுவதற்கு முன், இந்திய U-19 அணி 12.5 ஓவர்களில் 2 விக்கெட் இழப்பிற்கு 115 ரன்கள் எடுத்திருந்தது.

மழை இடைவேளைக்கு முன், சூர்யவன்ஷி 24 பந்துகளில் 68 ரன்கள் விளாசி ஆட்டத்தின் போக்கை மாற்றினார். பின்னர், வேதாந்த் திரிவேதி ஆட்டமிழக்காமல் 31 ரன்களும் (57 பந்துகள்), அபிஞான குண்டு ஆட்டமிழக்காமல் 48 ரன்களும் (42 பந்துகள்) எடுத்து இந்தியாவை வெற்றிப் பாதைக்கு அழைத்துச் சென்றனர். இந்திய அணி 23.3 ஓவர்களில் 2 விக்கெட் இழப்பிற்கு 176 ரன்கள் எடுத்து எட்டு விக்கெட் வித்தியாசத்தில் வென்றது. மைக்கேல் க்ரூஸ்காம்ப் 23 ரன்களுக்கு 2 விக்கெட்டுகள் வீழ்த்தினார்.