செப்டம்பர் மாதம் வைபவ் சூர்யவன்ஷி இந்திய அணியில் ஆடுவது உறுதி.. பிசிசிஐ உத்தேச பட்டியலில் இடம்

மும்பை: 2026 செப்டம்பர் மாதம் நடைபெறவுள்ள ஆசிய விளையாட்டுப் போட்டிகளுக்கான இந்திய கிரிக்கெட் அணியின் உத்தேசப் பட்டியலை பிசிசிஐ தயார் செய்துள்ளது. இதில் 15 வயது இளம் வீரர் வைபவ் சூர்யவன்ஷிக்கு இடம் கிடைத்துள்ளது உறுதி செய்யப்பட்டுள்ளது. அதே நேரத்தில், நட்சத்திர வீரர் சூர்யகுமார் யாதவ் இந்தப் பட்டியலில் இடம்பெறாதது ரசிகர்களிடையே விவாதத்தை ஏற்படுத்தியுள்ளது.

ஆசிய விளையாட்டுப் போட்டிகள்

ஜப்பானில் வரும் செப்டம்பர் 24 முதல் அக்டோபர் 3 வரை ஆசிய விளையாட்டுப் போட்டிகள் நடைபெறவுள்ளன. இந்தப் போட்டியில் பங்கேற்கும் 15 பேர் கொண்ட இறுதி அணியைத் தேர்வு செய்வதற்காக 30 வீரர்கள் அடங்கிய உத்தேசப் பட்டியலை பிசிசிஐ அமைப்பாளர்களிடம் பகிர்ந்துள்ளது. கடந்த 2023-ம் ஆண்டு ஆசிய விளையாட்டில் தங்கம் வென்ற இந்திய அணியில் இருந்த 9 வீரர்கள் இந்தப் பட்டியலிலும் இடம் பெற்றுள்ளனர்.

நடப்பு 2026 ஐபிஎல் தொடரில் ராஜஸ்தான் ராயல்ஸ் அணிக்காக விளையாடிய வைபவ் சூர்யவன்ஷி, தனது அசுர வேக ஆட்டத்தால் உலகையே திரும்பிப் பார்க்க வைத்தார். 16 போட்டிகளில் 776 ரன்கள் குவித்த அவர், கிறிஸ் கெய்லின் சாதனையை முறியடித்து ஒரே சீசனில் 72 சிக்ஸர்களை விளாசி சாதனை படைத்தார். அவரது இந்தச் சிறப்பான செயல்பாட்டிற்குப் பரிசாக இந்திய அணியில் விளையாடும் வாய்ப்பு தேடி வந்துள்ளது.

இந்திய டி20 அணியின் கேப்டன் சூர்யகுமார் யாதவ் இந்தப் பட்டியலில் இடம்பெறவில்லை. அதே நேரத்தில், கடந்த முறை இந்திய அணியைத் தலைமை தாங்கி ஆசிய விளையாட்டில் தங்கம் வென்று கொடுத்த ருதுராஜ் கெய்க்வாட் மற்றும் ஸ்ரேயாஸ் ஐயர் ஆகியோருக்கு இடம் கிடைத்துள்ளது. அந்தச் சமயத்தில் இந்திய அணி வெஸ்ட் இண்டீஸ் அணிக்கு எதிரான ஒருநாள் தொடரில் விளையாடவுள்ளது. மூத்த வீரர்கள் அந்த ஒருநாள் தொடரில் பங்கேற்பதால், இளம் வீரர்கள் பலருக்கு ஆசிய விளையாட்டில் வாய்ப்பு வழங்கப்பட்டுள்ளது.

பயிற்சியாளர் மாற்றம்

ஆசிய விளையாட்டுப் போட்டிகள் நடைபெறும் அதே காலக்கட்டத்தில் (செப்டம்பர் 27 முதல் அக்டோபர் 3 வரை), இந்திய அணி சொந்த மண்ணில் வெஸ்ட் இண்டீஸ் அணிக்கு எதிராக 3 போட்டிகள் கொண்ட ஒருநாள் தொடரில் விளையாடுகிறது. இதனால் தலைமைப் பயிற்சியாளர் கௌதம் கம்பீர் ஒருநாள் அணியுடன் இருப்பார். இதன் காரணமாக, ஜப்பானுக்குச் செல்லும் இந்திய அணிக்கு வி.வி.எஸ். லக்ஷ்மன் பயிற்சியாளராகச் செயல்படுவார் என்று எதிர்பார்க்கப்படுகிறது.

IPL 2026: வைபவ் சூர்யவன்ஷியை திட்டிய ரியான் பராக்.. டிரெஸ்ஸிங் ரூமில் என்ன நடந்தது? ரசிகர்கள் ஆவேசம்

15 வயதிலேயே இந்திய அணியின் கதவைத் தட்டியுள்ள வைபவ் சூர்யவன்ஷி, செப்டம்பர் மாதம் சர்வதேச போட்டியில் களமிறங்குவது கிட்டத்தட்ட உறுதியாகியுள்ளது. ஆசிய விளையாட்டுப் போட்டிக்கு முன்பாக அயர்லாந்து மற்றும் இங்கிலாந்துக்கு எதிரான டி20 தொடர்களிலும் அவருக்கு வாய்ப்பு வழங்கப்படலாம் எனத் தகவல்கள் தெரிவிக்கின்றன. இதன் மூலம் இந்திய கிரிக்கெட்டின் அடுத்த நட்சத்திரம் அதிகாரப்பூர்வமாகத் தனது சர்வதேசப் பயணத்தைத் தொடங்கவுள்ளார்.