"வைபவ் சூர்யவன்ஷிக்காக அவங்க 2 பேரையும் அணியில் இருந்து நீக்க முடியாது".. ஸ்ரேயாஸ் ஐயர் ஓபன் டாக்

பெங்களூர்: இந்திய டி20 கிரிக்கெட் அணியில் அதிரடி தொடக்க வீரர்களான சஞ்சு சாம்சன் மற்றும் அபிஷேக் சர்மா தங்களது இடத்தை அசைக்க முடியாதபடி பிடித்துவிட்டதால், இளம் வீரர் வைபவ் சூர்யவன்ஷி தனது வாய்ப்புக்காகப் பொறுமையுடன் காத்திருக்க வேண்டும் என கேப்டன் ஸ்ரேயாஸ் ஐயர் கூறி இருக்கிறார். பெங்களூருவில் வெஸ்ட் இண்டீசுக்கு எதிரான 5-வது டி20 போட்டி மழையால் கைவிடப்பட்டு தொடர் 2-2 என சமனில் முடிந்தது. இந்தப் போட்டிக்குப் பிந்தைய நிகழ்வில் பேசிய கேப்டன் ஸ்ரேயாஸ் ஐயர் இந்த விளக்கத்தை அளித்தார்.

இதுகுறித்து விரிவாகப் பேசிய ஸ்ரேயாஸ் ஐயர், "அபிஷேக் சர்மா மற்றும் சஞ்சு சாம்சன் இருவரும் இந்திய அணிக்கு டி20 உலகக் கோப்பையை வென்று தந்தவர்கள். அவர்கள் இருவரும் தொடர்ந்து சீரான ஆட்டத்தை வெளிப்படுத்தி ரன்களைக் குவித்து வருகின்றனர். இந்த வெஸ்ட் இண்டீஸ் தொடரிலும் சஞ்சு சாம்சன் 5 போட்டிகளில் 33.6 சராசரி மற்றும் 195.34 ஸ்ட்ரைக் ரேட்டுடன் 168 ரன்கள் குவித்து அசத்தியுள்ளார். எனவே, தற்போது அணியில் உள்ள இரண்டு சிறந்த தொடக்க வீரர்களை யாராலும் அசைக்க முடியாது" என்றார்.

2026 ஐபிஎல் தொடரில் ராஜஸ்தான் ராயல்ஸ் அணிக்காக விளையாடிய வைபவ் சூர்யவன்ஷி 776 ரன்களைக் குவித்து உலகையே திரும்பிப் பார்க்க வைத்தார். மேலும் ஜிம்பாப்வே தொடரில் தொடர் நாயகன் விருதையும் வென்றார். இருப்பினும் தற்போது வரை 8 சர்வதேச டி20 போட்டிகளில் மட்டுமே அவர் விளையாடியுள்ளார். முன்னதாக அயர்லாந்து மற்றும் இங்கிலாந்து தொடர்களில் சஞ்சு சாம்சன் அடுத்தடுத்து சொதப்பியபோது வைபவுக்கு வாய்ப்புக் கிடைத்தது. ஆனால் இங்கிலாந்துக்கு எதிரான 3 போட்டிகளில் வைபவ் சூர்யவன்ஷியால் தனது அதிரடி ஃபார்மை வெளிப்படுத்த முடியவில்லை. இதனால் கடைசி போட்டியில் மீண்டும் சஞ்சு சாம்சனே இடம்பிடித்தார்.

IND vs WI:

வைபவுக்கு அறிவுரை கூறிய ஸ்ரேயாஸ் ஐயர், "ஒரு பிரம்மாண்டமான ஐபிஎல் சீசனுக்குப் பிறகு வாய்ப்புக்காகக் காத்திருப்பது எவ்வளவு வேதனையானது என்பது எனக்குப் புரிகிறது. ஆப்கானிஸ்தான் தொடர் முதலே நான் அவரிடம் இதைத்தான் பேசி வருகிறேன். அணியின் நலனுக்காக சில சமயங்களில் நாம் காத்திருந்துதான் ஆக வேண்டும். வாய்ப்பை பற்றி அதிகம் யோசிக்காமல் வழக்கமான பயிற்சிகளில் கவனம் செலுத்துமாறு அவரிடம் கூறியுள்ளேன். சரியான நேரம் வரும்போது அவருக்கும் கதவுகள் திறக்கும்" என்றார்.