"எங்க ஆசிய கோப்பையைத் திருடலாம் ஆனா.." பாகிஸ்தான் அமைச்சருக்கு வருண் சக்கரவர்த்தி பதிலடி

மும்பை: 2025 ஆசிய கோப்பை இறுதிப் போட்டியில் பாகிஸ்தானை வீழ்த்தி இந்தியா சாம்பியன் பட்டம் வென்றது. ஆனால், வெற்றி பெற்ற இந்திய அணிக்குக் கோப்பையை வழங்காமல், பாகிஸ்தான் கிரிக்கெட் வாரியத் தலைவர் மோஷின் நக்வி நடத்திய 'கோப்பை நாடகம்', இந்திய ரசிகர்கள் மத்தியில் பெரும் கோபத்தை ஏற்படுத்தியது. இந்த நிலையில், இந்திய சுழற்பந்து வீச்சாளர் வருண் சக்கரவர்த்தி, "கோப்பையை நீங்கள் பறிக்கலாம், ஆனால் நாங்கள் தான் சாம்பியன்கள்," என்று நறுக்கென்று பதிலடி கொடுத்து, இந்தச் சர்ச்சையை மீண்டும் தூண்டி இருக்கிறார்.

பிரபல தொகுப்பாளர் கௌரவ் கபூர் நடத்தும் "பிரேக்ஃபாஸ்ட் வித் சாம்பியன்ஸ்" நிகழ்ச்சியில் பேசிய வருண் சக்கரவர்த்தி, இந்த விவகாரம் குறித்து முதல் முறையாக மௌனம் கலைத்தார். "நாங்கள் எல்லாப் போட்டிகளிலும் வெல்வோம் என்று எனக்குத் தெரியும். அது ஒரு நல்ல உணர்வைக் கொடுத்தது. நாங்கள் தான் உலகின் நம்பர் 1 அணி. கோப்பையை நீங்கள் பறிக்கலாம், ஆனால் நாங்கள் தான் சாம்பியன்கள்" என்று மோஷின் நக்வியை நேரடியாகச் சாடும் வகையில் வருண் சக்கரவர்த்தி பதிலடி கொடுத்தார்.

துபாயில் அரங்கேறிய கோப்பை நாடகம்

துபாயில் நடந்த 2025 ஆசிய கோப்பை இறுதிப் போட்டியில், பாகிஸ்தானை வீழ்த்தி இந்தியா கோப்பையை வென்றது. ஆனால், பரிசளிப்பு விழாவில், ஆசிய கிரிக்கெட் கவுன்சில் தலைவரான மோஷின் நக்வியிடம் இருந்து கோப்பையைப் பெற, இந்திய வீரர்கள் மறுத்துவிட்டனர். அரசியல் பதற்றம் மற்றும் நக்வியின் முந்தைய சர்ச்சைக்குரிய கருத்துக்களால், இந்திய வீரர்கள் இந்த முடிவை எடுத்ததாகக் கூறப்படுகிறது. இதனால், கோபமடைந்த நக்வி, கோப்பையை வழங்காமல் மேடையிலிருந்து எடுத்துச் செல்ல, இந்திய அணிக்குக் கோப்பையுடன் புகைப்படம் எடுக்கும் வாய்ப்பு மறுக்கப்பட்டது.

காபி கோப்பையுடன் வைரலான புகைப்படம்!

இந்தச் சம்பவத்தின் குறியீடாக, வருண் சக்கரவர்த்தி தனது இன்ஸ்டாகிராம் பக்கத்தில் வெளியிட்ட ஒரு புகைப்படம், சமூக வலைதளங்களில் காட்டுத்தீயாகப் பரவியது. "நான் எல்லாவற்றையும் திட்டமிட்டிருந்தேன். நாங்கள் வெல்வோம் என்று எனக்குத் தெரியும். அதனால், கோப்பையுடன் நான் உறங்குவது போல ஒரு புகைப்படம் வெளியிட நினைத்தேன். ஆனால், போட்டிக்குப் பிறகு, எனக்கு அருகில் கோப்பை இல்லை; வெறும் ஒரு காபி கோப்பைதான் இருந்தது. அதனால், அதையே வைத்துக்கொண்டேன்" என்று வருண் அந்தப் புகைப்படம் குறித்து விளக்கினார்.

'டீ அருமையாக இருந்தது' - மீம்-க்கு பதிலடி!

வருணின் இந்தப் பதிவு, வெறும் கோப்பை நாடகத்தைக் கிண்டலடிப்பது மட்டுமல்ல; அதற்குப் பின்னால் ஒரு பெரிய 'மீம்' மோதல் உள்ளது. 2019-ல், இந்திய விமானப்படை வீரர் அபிநந்தன் வர்த்தமான் பாகிஸ்தானால் சிறைபிடிக்கப்பட்டபோது, அவர் டீ அருந்தும் வீடியோவை பாகிஸ்தான் வெளியிட்டது. அப்போது, "டீ அருமையாக இருந்தது" என்று அவர் கூறியதாக ஒரு மீம், இரு நாடுகளிலும் வைரலானது.

சமீபத்தில், ஒரு பாகிஸ்தான் பத்திரிகையாளர், அபிநந்தனின் உருவ பொம்மை இருக்கும் புகைப்படத்தைப் பகிர்ந்து, "அவர் கையில் ஒரு அருமையான டீ கோப்பையை வைத்தால் இன்னும் சுவாரஸ்யமாக இருக்கும்" என்று நக்கலடித்திருந்தார். வருண் சக்கரவர்த்தியின் இந்த 'காபி கோப்பை' புகைப்படம், பாகிஸ்தானின் அந்த 'டீ' மீம்-க்கு, இந்தியாவின் பதிலடியாகவே பார்க்கப்படுகிறது.

கோப்பை முக்கியமல்ல, வெற்றியே முக்கியம்!

ஆசிய கோப்பை கிடைக்காததால், இந்திய அணியின் கொண்டாட்டம் சற்றும் குறையவில்லை. கேப்டன் சூர்யகுமார் யாதவ், ஒரு கற்பனைக் கோப்பையுடன், ரோஹித் சர்மாவின் 'ஐகானிக்' நடையை மீண்டும் செய்து காட்ட, மற்ற வீரர்களும் அந்தக் கொண்டாட்டத்தில் இணைந்தனர். "நாங்கள் நாட்டிற்காக விளையாடுகிறோம், போட்டோ எடுப்பதற்காக அல்ல. நாங்கள் கோப்பையை வைத்திருந்தாலும், இல்லாவிட்டாலும், உண்மையான சாம்பியன்கள் யார் என்பது உலகிற்கே தெரியும்" என்று அணி வட்டாரங்கள் தெரிவித்தன.

இந்தத் தொடரில் 6 போட்டிகளில் 7 விக்கெட்டுகளை வீழ்த்தி, இந்தியாவின் வெற்றிக்கு முக்கியப் பங்காற்றிய வருண் சக்கரவர்த்தியின் இந்த வார்த்தைகள், கோப்பை துபாய் அலுவலகத்தில் பூட்டி வைக்கப்பட்டிருக்கலாம், ஆனால் உண்மையான சாம்பியன்கள் யார் என்பதை மீண்டும் ஒருமுறை உலகிற்குக் காட்டியுள்ளது.