3டி வீரராக ஓய்வு பெற்ற விஜய் சங்கர் மனம் திறந்த பேட்டி.. தமிழ்நாடு அணிக்கு திரும்பாதது ஏன்?

சென்னை: தமிழகத்தை சேர்ந்த இந்திய கிரிக்கெட் வீரர் விஜய் சங்கர் நேற்று முன்தினம் அனைத்து விதமான கிரிக்கெட் போட்டிகளில் இருந்தும் ஓய்வு பெறுவதாக அறிவித்து இருந்தார். தமிழகத்தின் மைதானங்களில் தொடங்கி, உலகக் கோப்பை வரை நீண்ட அவரது கிரிக்கெட் பயணம் தற்போது முடிவுக்கு வந்துள்ளது. ஒரு ஸ்டைலான மிடில் ஆர்டர் பேட்ஸ்மேன், இக்கட்டான நேரத்தில் விக்கெட் வீழ்த்தும் பந்துவீச்சாளர் என அறியப்பட்ட விஜய் சங்கர், தனது ஓய்வு குறித்த முடிவையும், கடந்த கால நினைவுகளையும் மைகேல் (MyKhel) தளத்துடன் பகிர்ந்து கொண்டார்.

ஓய்வு முடிவின் பின்னணி

இன்னும் சில ஆண்டுகள் விளையாடும் தகுதி இருந்தும், 35 வயதிலேயே ஓய்வு பெற்றது ஏன் என்ற கேள்விக்கு விஜய் சங்கர் நிதானமாகப் பதிலளித்தார். "உண்மையைச் சொல்லப்போனால், என்னால் இன்னும் சில ஆண்டுகள் சிறப்பாக விளையாட முடியும். ஆனால், கிரிக்கெட்டைத் தாண்டி மற்ற விஷயங்களையும் ஆராய இதுவே சரியான நேரம் எனத் தோன்றியது. கடந்த 3 அல்லது 4 ரஞ்சி கோப்பை சீசன்களில் நான் நன்றாகவே விளையாடினேன். ஆனால், அதற்கடுத்த கட்டத்திற்கு எந்த முன்னேற்றமும் இல்லை. அங்கேயே தேங்கி நிற்பதை விட, வெளியே வந்து புதிய வாய்ப்புகளைத் தேடலாம் என முடிவு செய்தேன்" என்றார்.

25 ஆண்டுகால உழைப்பு

தன்னுடைய நீண்டகால கிரிக்கெட் பயணம் குறித்துப் பேசிய அவர், "கிரிக்கெட் எனக்கு எல்லாவற்றையும் கொடுத்துள்ளது. 10 வயதில் தொடங்கி 35 வயது வரை இந்த 25 ஆண்டுகள் மிகவும் ஸ்பெஷல். மாவட்ட அளவிலான போட்டிகளில் தொடங்கி மாநில அணி வரை வந்தேன். 21 வயது வரை ஆஃப்-ஸ்பின்னராக இருந்த நான், தமிழக ரஞ்சி அணியில் இடம் பிடிக்க வேண்டும் என்பதற்காகவே மீடியம் பேசராக மாறினேன். அது எனது வாழ்க்கையில் எடுத்த மிகப்பெரிய முடிவு. பல காயங்கள், அறுவை சிகிச்சைகளை நான் சந்தித்திருக்கிறேன். ஆனால் திரும்பிப் பார்க்கும்போது, எதற்கும் வருத்தமில்லை. கிரிக்கெட் எனக்குக் கொடுத்த மகுடங்களுக்கு நான் நன்றியுள்ளவனாக இருப்பேன்" என நெகிழ்ச்சியுடன் தெரிவித்தார்.

ஐபிஎல் ஏமாற்றம்

கடந்த சீசனில் சென்னை சூப்பர் கிங்ஸ் அணிக்காகச் சிறப்பாக விளையாடியும் (சராசரி 39, ஒரு அரைசதம்), இந்த ஆண்டு ஐபிஎல் ஏலத்தில் விஜய் சங்கரை எந்த அணியும் எடுக்கவில்லை. இது குறித்துப் பேசிய அவர், "ஏலத்தில் எவரும் என்னை எடுக்காதது சற்று ஏமாற்றமாக இருந்தது. ஐபிஎல் தொடரைத் தான் நான் பெரிதும் எதிர்பார்த்தேன். ஆனால், வாழ்க்கையில் இதையெல்லாம் கடந்துதான் போக வேண்டும். விளையாட்டை நேசிப்பவன் என்பதால், தொடர்ந்து களத்தில் இருப்பதுதான் எனக்கு முக்கியம்" என்றார்.

ரஞ்சி கோப்பை கனவு

உள்ளூர் போட்டிகள் குறித்துப் பேசிய அவர், "திரிபுரா அணிக்காக விளையாடிய பிறகு மீண்டும் தமிழக அணிக்குத் திரும்பலாமா என யோசித்தேன். ஆனால் சில நேரங்களில் பழைய இடத்திற்கே மீண்டும் செல்வது சரியாக இருக்காது. தமிழகத்திற்காக விளையாட வேண்டும் என்பதுதான் எனது தீராத ஆசை. 14 ஆண்டுகள் அந்தப் பெருமை எனக்குக் கிடைத்தது. ஆனால் ஒருமுறை கூட ரஞ்சி கோப்பையை வெல்ல முடியவில்லை என்பது ஒரு குறையாகவே உள்ளது. ரஞ்சி கோப்பை கனவும் இல்லை, ஐபிஎல் வாய்ப்பு இல்லை என்றால் உள்ளூர் போட்டிகளில் தொடர்ந்து ஆடுவதில் அர்த்தமில்லை எனத் தோன்றியது" எனக் குறிப்பிட்டார்.

'3டி' வீரர் சர்ச்சை

2019 உலகக் கோப்பை அணியில் அம்பதி ராயுடுவுக்குப் பதிலாக விஜய் சங்கர் சேர்க்கப்பட்டதும், அவர் ஒரு '3டி' (முப்பரிமாண) வீரர் என வர்ணிக்கப்பட்டதும் அப்போது பெரும் புயலைக் கிளப்பியது. இது குறித்து வெளிப்படையாகப் பேசிய அவர், "நிச்சயமாக அந்த விமர்சனங்கள் என் மீது ஒரு சதவீதமாவது தாக்கத்தை ஏற்படுத்தியது உண்மைதான். உலகக் கோப்பை அணியில் இடம் பிடித்து, பாகிஸ்தானுக்கு எதிராகச் சிறப்பாகப் பந்துவீசிய பிறகு காயம் ஏற்பட்டது துரதிர்ஷ்டவசமானது. 2020-ல் இந்தியா ஏ அணிக்காக விளையாடிய பிறகு எனக்கு மீண்டும் இந்திய அணியில் வாய்ப்பு கிடைக்கவில்லை. அது ஏமாற்றமாக இருந்தாலும், கிரிக்கெட்டை அனுபவித்து விளையாடுவதே எனக்குப் பிடிக்கும்" என்றார்.

மறக்க முடியாத தருணங்கள்

தன்னுடைய கிரிக்கெட் வாழ்க்கையின் முக்கியமான தருணங்கள் குறித்துப் பேசிய விஜய் சங்கர், "தமிழக அணிக்காகவும், இந்திய அணிக்காகவும் அந்தத் தொப்பியை (Cap) வாங்கிய தருணங்கள் இப்போதும் என் கண்முன்னே உள்ளன. உலகக் கோப்பையில் பாகிஸ்தானுக்கு எதிராக அறிமுகமானது, இந்தியாவின் 500-வது ஒருநாள் போட்டியில் கடைசி ஓவரில் 10 ரன்களைத் தடுத்து வெற்றி தேடித்தந்தது எனப் பல நினைவுகள் உள்ளன. இந்தப் பயணம் மிகவும் அழகானது" எனப் பெருமிதத்துடன் கூறினார்.

அடுத்த கட்டம்

வெளிநாட்டு லீக் மற்றும் பயிற்சி தனது எதிர்காலத் திட்டம் குறித்துப் பேசிய அவர், "வெளிநாட்டு டி20 லீக் தொடர்களில் விளையாட வாய்ப்பு கிடைத்தால் அதனைப் பயன்படுத்துவேன். அதே சமயம், பயிற்சியாளர் பணிக்கான லெவல் 2 உரிமத்தை (Coaching License) ஏற்கனவே முடித்துவிட்டேன். பயிற்சியாளர் ஆவதில் எனக்குப் பெரும் ஆர்வம் உண்டு. ஆனால் அதற்குத் தன்னை இன்னும் தகுதியாக்கிக் கொண்டு, முழுமையான ஈடுபாட்டுடன் அதில் இறங்க வேண்டும். அதுவரை விளையாட்டை அனுபவிப்பேன்" என்றார்.

CSK: தோனி சிஎஸ்கே-வில் இருக்கும் போது எதற்கு வேறு பயிற்சியாளர்? அஸ்வின் அதிரடி கருத்து

தனக்கு அளிக்கப்பட்ட '3டி கிரிக்கெட்டர்' என்ற முத்திரை குறித்துப் பேசிய அவர், "தெரிந்தோ தெரியாமலோ அந்தப் பெயர் எனக்கு நிலைத்துவிட்டது. அதனை நான் நேர்மறையாகவே எடுத்துக் கொள்கிறேன். ஒவ்வொருவரின் பயணமும் வித்தியாசமானது. என்னுடைய சவாலான பயணம் எனக்கு மனநிறைவைத் தந்துள்ளது" என விடைபெற்றார். திறமையான ஒரு ஆல்-ரவுண்டரை இந்திய கிரிக்கெட் இழந்திருந்தாலும், அவரது அனுபவம் அடுத்த தலைமுறை வீரர்களுக்குப் பயிற்சியாளர் வடிவில் கிடைக்கும் என எதிர்பார்க்கலாம்.