விஜய் ஹசாரே தொடரில் பங்கேற்கிறார்களா விராட் கோலி, ஸ்ரேயாஸ் ஐயர்.. வெளியான அப்டேட்

மும்பை: இந்திய கிரிக்கெட் அணியின் நட்சத்திர வீரரான விராட் கோலி, செவ்வாய்க்கிழமை நடைபெறவுள்ள ரயில்வேஸ் அணிக்கு எதிரான விஜய் ஹசாரே டிராபி தொடரின் டெல்லி அணிக்காக பங்கேற்க மாட்டார் என்ற தகவல் வெளியாகியுள்ளது. பிசிசிஐயின் அறிவுறுத்தலின்படி, கோலி ஏற்கனவே ஆந்திரப் பிரதேசம் மற்றும் குஜராத்துக்கு எதிரான இரண்டு போட்டிகளில் டெல்லி அணிக்காக விளையாடினார்.

அந்த இரண்டு போட்டிகளிலும் கோலி சிறப்பான பார்மில் இருந்தார், முறையே 131 மற்றும் 77 ரன்களைக் குவித்தார். நியூசிலாந்துக்கு எதிரான ஒருநாள் தொடரில் தேசிய அணியுடன் இணைவதற்கு முன், டெல்லி அணிக்காக இன்னும் ஒரு போட்டியில் விளையாட திட்டமிட்டிருந்த கோலி, தற்போது பங்கேற்கவில்லை என்று டெல்லி அணியின் பயிற்சியாளர் சரன்தீப் சிங் உறுதிப்படுத்தினார்.

இது குறித்து பேசிய அவர், "இல்லை, அவர் பங்கேற்க மாட்டார்" என்றார். முன்னதாக, டெல்லி மற்றும் மாவட்ட கிரிக்கெட் சங்க தலைவர் ரோஹன் ஜேட்லி, விஜய் ஹசாரே டிராபியில் மூன்று போட்டிகளுக்கு கோலி தனது விருப்பத்தை தெரிவித்திருந்தார் என்று தெரிவித்திருந்தார். இது தொடர்பாக பேசிய ஜேட்லி, "தற்போது அவர் விளையாடி வருகிறார். விராட் மூன்று போட்டிகளுக்கு விளையாட ஒப்புதல் அளித்துள்ளார்" என்று கூறினார்.

விஜய் ஹசாரே டிராபியின் எலைட் சி குரூப் பிரிவில் மும்பை அணிக்காக இத்தொடரின் எஞ்சிய போட்டிகளில் ஷ்ரேயாஸ் ஐயர் கேப்டனாக நியமிக்கப்பட்டுள்ளார் என்று மும்பை கிரிக்கெட் சங்கம் அறிவித்தது. காயம் காரணமாக தொடரிலிருந்து விலக்கப்பட்டுள்ள வழக்கமான கேப்டன் ஷர்துல் தாக்கூருக்குப் பதிலாக ஷ்ரேயாஸ் ஐயர் பொறுப்பேற்பார்.

மும்பை அணி தற்போது சி குரூப்பில் இரண்டாவது இடத்தில் உள்ளது. செவ்வாய்க்கிழமை இமாச்சலப் பிரதேசத்துடனும், ஜனவரி 8-ஆம் தேதி பஞ்சாபுடனும் மோதும். எம்.சி.ஏ. செயலாளர் பேராசிரியர் டாக்டர் உன்மேஷ் கான்வில்கர் வெளியிட்ட அறிக்கையில், "விஜய் ஹசாரே டிராபியின் எஞ்சிய லீக் போட்டிகளுக்கு மும்பை அணியின் கேப்டனாக ஷ்ரேயாஸ் ஐயர் நியமிக்கப்பட்டுள்ளார் என்பதை அறிவிப்பதில் மும்பை கிரிக்கெட் சங்கம் மகிழ்ச்சி அடைகிறது" என்று குறிப்பிட்டிருந்தார்.

"காயம் காரணமாக தொடரிலிருந்து விலக்கப்பட்ட ஷர்துல் தாக்கூருக்குப் பதிலாக ஷ்ரேயாஸ் ஐயர் தலைமைப் பொறுப்புகளை ஏற்பார். அனுபவமிக்க சர்வதேச கிரிக்கெட் வீரரான ஸ்ரேயாஸ் ஐயர், திறனும், அமைதியையும், விளையாட்டைப் பற்றிய ஆழமான புரிதலையும் கொண்டுள்ளார்."

அவரது தலைமையில் மும்பை அணி தொடர்ந்து உறுதியுடன் செயல்படும் என்றும், மும்பை கிரிக்கெட்டின் பாரம்பரியத்தைப் பேணி பாதுகாக்கும் என்றும் சங்கம் நம்பிக்கை கொண்டுள்ளது. மும்பை கிரிக்கெட் சங்கம் ஷர்துல் தாக்கூர் விரைந்து குணமடைய வாழ்த்துகிறது, மேலும் ஷ்ரேயாஸ் ஐயர் மற்றும் முழு மும்பை அணியினருக்கும் வரவிருக்கும் போட்டிகளுக்கு வாழ்த்துக்களை தெரிவிக்கிறது," என்று அந்த அறிக்கையில் கூறப்பட்டுள்ளது.

ஜனவரி 11-ஆம் தேதி வதோதராவில் தொடங்கும் நியூசிலாந்துக்கு எதிரான மூன்று போட்டிகள் கொண்ட ஒருநாள் தொடருக்கான அணியில் ஐயர் இடம்பெற்றுள்ளார். இருப்பினும், மும்பை அணிக்காக விஜய் ஹசாரே டிராபி போட்டிகளில் விளையாடிய பிறகு அவரது உடல் தகுதி பரிசோதனை முடிவைப் பொறுத்தே இந்த தொடருக்கான அவரது சேர்க்கை அமையும்.

ஐயர் தனது உடல் தகுதிப் பரிசோதனைகளை வெற்றிகரமாக முடித்தால், ஜனவரி 12-ஆம் தேதி பெங்களூரில் உள்ள பிசிசிஐ ஆய்வு மைய மைதானங்களில் தொடங்கும் விஜய் ஹசாரே டிராபியின் நாக் அவுட் சுற்றுப் போட்டிகளுக்கு எம்.சி.ஏ. ஒரு புதிய கேப்டனை நியமிக்க வேண்டியிருக்கும். கடந்த ஆண்டு அக்டோபரில் சிட்னி கிரிக்கெட் மைதானத்தில் நடந்த மூன்றாவது ஒருநாள் போட்டியில் ஆஸ்திரேலிய விக்கெட் கீப்பர் பேட்ஸ்மேன் அலெக்ஸ் கேரியின் கேட்ச்சை பிடிக்க முயன்றபோது ஏற்பட்ட மண்ணீரல் காயம் காரணமாக ஸ்ரேயாஸ் ஐயர் விளையாடாமல் இருந்தார்.