அதிக 'மதிப்புள்ள' டாப் 10 விளையாட்டு வீரர்கள் இவர்கள்தான்.. பட்டியலை வெளியிட்ட 'போர்ப்ஸ்'!

சச்சினுக்கு பிறகு கோஹ்லி

போர்ப்ஸ் இதழ் ஆண்டுதோறும் அதிக வருவாய் பெறும் விளையாட்டு வீரர்கள் குறித்த பட்டியலை வெளியிடுவது வழக்கம். இந்தியாவை பொறுத்தளவில் சச்சின் டெண்டுல்கர் எப்போதுமே இந்த பட்டியலில் ஆதிக்கம் செலுத்துவார். ஆனால் அவர் கிரிக்கெட்டிலிருந்து ஓய்வு பெற்ற பிறகு, அந்த இடத்தை கோஹ்லி பிடித்துள்ளார்.

ரோஜர் பெடரர்

விளையாட்டு வீரர்களுக்கான மார்க்கெட் மதிப்பு பட்டியலில் முதலிடத்தில் இருப்பவர் சுவிட்சர்லாந்து டென்னிஸ் வீரர் ரோஜர் பெடரர். இவரது மார்க்கெட் மதிப்பு 37.2 மில்லியன் டாலர்கள்.

கூடைப்பந்தாட்ட வீரர்

2வது இடத்தில் இருப்பவர் லீப்ரோன் ஜேம்ஸ். இவரது மதிப்பு 33.4 மில்லியன் டாலர்களாக உள்ளது. அமெரிக்காவை சேர்ந்த பிரபல கூடைப் பந்தாட்ட வீரர் இவர் என்பது அனைவரும் அறிந்ததே.

உசேன் போல்ட் கலக்கல்

சமீபத்தில் ஓய்வு பெற்ற தடகள வீரர் உசேன் போல்ட் 27 மில்லியன் டாலர்கள் மதிப்புள்ளவராக மூன்றாவது இடத்தையும், கால்பந்தாட்ட வீரர் கிறிஸ்டியானோ ரொனால்டோ 21.5 மில்லியன் டாலர் மதிப்புடன் 4வது இடத்திலும் உள்ளார்.

கோல்ப் விளையாட்டுக்கு மவுசு

அமெரிக்காவை சேர்ந்த கோல்ப் வீரர்களான பில் மிக்கெல்சன் 19.6 மில்லியன் டாலர் மதிப்புடனும், டைகர் உட்ஸ் 16.6 மில்லியன் டாலர் மதிப்புடனும் முறையே, ஐந்து மற்றும் 6வது இடங்களை பிடித்துள்ளனர்.

கோஹ்லி அசத்தல்

இந்த பட்டியலில் 7வது இடம் பிடித்து அசத்தியுள்ளார் விராட் கோஹ்லி. இவரது மார்க்கெட் மதிப்பு 14.5 மில்லியன் டாலர்களாகும். கோல்ப் வீரர் ரோரி மெக்கில்ராய் மதிப்பு 13.6 மில்லியன் டாலர்களாகும். கால்பந்தாட்ட வீரர் லியோனல் மெஸ்சி மதிப்பு அதைவிட சற்று குறைவாக 13.5 மில்லியன் டாலர்களாக உள்ளது. அமெரிக்காவின் கூடைப் பந்தாட்ட வீரர் ஸ்டெப் கர்ரி மார்க்கெட் மதிப்பு அதைவிட சற்று குறைவாக 13.4 மில்லியன் டாலர்களாக உள்ளது. இதனால் அவர் 10வது இடத்தை பிடித்துள்ளார்.