விராட் கோலி யாருக்கும் திறமையை நிரூபிக்க தேவையில்லை.. தமிழக வீரர் அஸ்வின் கருத்து

மும்பை: சர்வதேச கிரிக்கெட் போட்டிகளில் தனது எதிர்காலம் குறித்து முன்னாள் இந்திய அணியின் கேப்டன் விராட் கோலி தெரிவித்த கருத்துகளுக்கு, இந்திய சுழற்பந்து வீச்சாளர் ரவிச்சந்திரன் அஷ்வின் தனது ஆதரவை வெளிப்படுத்தியுள்ளார். அணியின் நிர்வாகம் தனது பங்களிப்பையும் மதிப்பையும் அங்கீகரித்தால் மட்டுமே தொடர்ந்து விளையாடுவேன் என கோலி கூறியது, வரவிருக்கும் 2027 ஒருநாள் உலகக் கோப்பையில் அவரது பங்கேற்பு குறித்து கிரிக்கெட் வட்டாரத்தில் விவாதத்தை எழுப்பியுள்ளது.

ராயல் சேலஞ்சர்ஸ் பெங்களூருவின் அதிகாரபூர்வ போட்காஸ்டில் பேசிய கோலி, அணியின் கலாச்சாரம், வீரர்கள் தேர்வு குறித்த தெளிவு மற்றும் 2027 ஒருநாள் உலகக் கோப்பையில் பங்கேற்கும் வாய்ப்புகள் குறித்து விவாதித்தார். தான் இன்னும் விளையாட்டை ரசிப்பதாகவும், அணி நிர்வாகம் தனது பங்களிப்பையும் மதிப்பையும் உண்மையாக நம்பினால் மட்டுமே தொடர்ந்து பங்களிப்பேன் என்றும் அவர் தெரிவித்தார்.

தனது நிலைப்பாட்டைத் தெளிவுபடுத்திய அவர், "என் பார்வை மிகவும் தெளிவானது. நான் இருக்கும் சூழலுக்கு நான் மதிப்பு கூட்ட முடிந்தால், அச்சூழல் நான் எனக்கு மதிப்பு சேர்க்கிறேன் என்று உணர்ந்தால், நான் தொடர்ந்து விளையாடுவேன். என் திறமையை நான் நிரூபிக்க வேண்டும் என்று நான் உணரும்படி செய்யப்பட்டால், நான் அந்த நிலையில் இல்லை," என்றார்.

IPL 2026: இன்றைய ஆட்டத்தில் யார் வென்றால், சிஎஸ்கே அணிக்கு சாதகம்? ஆர்சிபிக்கு சென்னை ரசிகர்கள் ஆதரவு

"நீங்கள் ஒரு பணிக்களத்தில் வேலை செய்யும்போது, உங்கள் திறமைகளில் நம்பிக்கை இருப்பதாக மக்கள் கூறி, ஒரு வாரத்திற்குப் பிறகு உங்கள் செயல்பாடுகளைக் கேள்வி கேட்கத் தொடங்கினால், அது 'ஏன்' என்று தோன்றும்," என அவர் இந்த நிலையை விளக்கினார்.

மேலும், "ஒன்று, என் முதல் நாளிலேயே நான் போதாது அல்லது தேவை இல்லை என்று சொல்லுங்கள். ஆனால் நான் நல்லது என்று நீங்கள் கூறி, வேறுவிதமாக சிந்திக்கவில்லை என்றால், அமைதியாக இருங்கள்," என்றும் தனது கருத்தை ஆணித்தரமாகப் பதிவு செய்தார்.

கோலியின் இந்தக் கருத்துகளுக்குச் சுழற்பந்து வீச்சாளர் ரவிச்சந்திரன் அஷ்வின் வலுவான ஆதரவைத் தெரிவித்தார். சர்வதேச கிரிக்கெட்டில் கோலி சாதிக்க வேண்டிய அனைத்தையும் சாதித்துவிட்டதாகவும், அவருக்கு எந்தவொரு வெளி அங்கீகாரமும் தேவையில்லை என்றும் அஸ்வின் குறிப்பிட்டார்.

"விராட் கோலி தான் யாருக்கும் தன் திறமையை நிரூபிக்கத் தேவையில்லை என்று சொன்னால், அது சரிதான். அவருக்கு யாருக்கும் நிரூபிக்க எதுவுமே இல்லை. என்னுடைய சிந்தனையும் அதுவே. இத்தனை ஆண்டுகளாக விளையாடி, இந்தியாவுக்காகப் பல போட்டிகளில் வென்ற பிறகு, அவர் யாருக்கு இன்னும் நிரூபிக்க வேண்டும்?" அஷ்வின் கேள்வி எழுப்பினார்.

தோனி, கெயில் கிடையாது.. ஐபிஎல் வரலாற்றில் ஆல் டைம் சிறந்த வீரர் இவர் தான்.. அம்பத்தி ராயூடு புகழாரம்

கிரிக்கெட் வரலாற்றின் மிகச்சிறந்த ஒருநாள் பேட்ஸ்மேன்களில் ஒருவரான கோலி, 311 போட்டிகளில் 14,797 ரன்கள், 58.71 சராசரியுடன் 54 சதங்கள் என சாதனைகள் படைத்துள்ளார். டி20 மற்றும் டெஸ்ட் கிரிக்கெட்டில் இருந்து விலகிய நிலையில், 2027 ஒருநாள் உலகக் கோப்பை அவரது புகழ்பெற்ற சர்வதேச வாழ்க்கையின் இறுதி கட்டமாக அமையலாம்.