IND vs NZ: விராட் கோலி மாறிட்டாரு.. இனி பவுலர்களுக்கு சங்கு தான்.. முன்னாள் ஆர்சிபி வீரர் கருத்து

வதோரா: நியூசிலாந்துக்கு எதிரான முதல் ஒருநாள் போட்டியில் விராட் கோலி தனது அதிரடி பேட்டிங் அணுகுமுறையை கையாண்டதற்காக முன்னாள் ராயல் சேலஞ்சர்ஸ் பெங்களூரு வீரர் வருண் ஆரோன் அவரைப் பாராட்டியுள்ளார். நவீன கிரிக்கெட்டின் தலைசிறந்த பேட்ஸ்மேனான கோலி, தனது அணி வெற்றி பெற வேண்டும் என்ற ஒரே குறிக்கோளுடன் சரியான மனநிலையில் உள்ளார் என்று ஆரோன் குறிப்பிட்டார்.

ஞாயிற்றுக்கிழமை வதோதராவில் நடைபெற்ற முதல் ஒருநாள் போட்டியில் நியூசிலாந்து அணி இந்தியாவுக்கு 301 ரன்கள் இலக்காக நிர்ணயித்தது. இந்த இலக்கை துரத்தி சென்ற இந்திய அணிக்கு, 91 பந்துகளில் 93 ரன்கள் குவித்த கோலியின் அதிரடி ஆட்டம் பெரிதும் உதவியது. இதன் மூலம் இந்திய அணி நான்கு விக்கெட்டுகள் மற்றும் ஒரு ஓவர் மீதமிருக்க இலக்கை எட்டியது.

ஸ்டார் ஸ்போர்ட்ஸ் நிகழ்ச்சியில் நடந்த உரையாடலின் போது, குமார் சங்கக்காராவை முந்தி சர்வதேச கிரிக்கெட்டில் இரண்டாவது அதிக ரன்கள் குவித்த வீரர் என்ற சாதனையை கோலி எட்டியது குறித்து ஆரோனிடம் கேட்கப்பட்டது. இதற்குப் பதிலளித்த முன்னாள் இந்திய வேகப்பந்து வீச்சாளர், "போட்டிக்குப் பிந்தைய பேட்டியில் விராட், எண்களைப் பற்றிக் கவலைப்படுவதில்லை என்றும், அணியை வெற்றிபெற வைப்பதற்காக மட்டுமே விளையாடுவதாகவும் கூறினார். அவர் தற்போது இருக்கும் நிலையில், பந்துக்கு பந்து மற்றும் சூழ்நிலைக்கு ஏற்ப மட்டுமே விளையாடுகிறார், வேறு எதையும் யோசிப்பதில்லை," என்று தெளிவுபடுத்தினார்.

மேலும் ஆரோன் கூறுகையில், "எந்தவொரு கிரிக்கெட் வீரருக்கும் இது ஒரு சரியான மனநிலை, விராட் முற்றிலும் வேறுபட்ட கியரில் பேட்டிங் செய்கிறார். அவர் தனது அதிரடி அணுகுமுறை குறித்து பேசினார். குறிப்பாக சேஸ்களில் விராட் கோலியிடம் இதை நாங்கள் பொதுவாகப் பார்த்ததில்லை," என்று குறிப்பிட்டார். அழுத்தத்தின் கீழ் தனது ஆட்டத்தின் வேறு ஒரு பரிமாணத்தை கோலி எப்போதும் காட்டுவார் என்பதையும் ஆரோன் சுட்டிக்காட்டினார். ஆரம்பத்தில் சேஸ்களில் சற்று கவனமாக அணுகும் கோலி, பின்னர் நிலைமைக்கு ஏற்ப தாக்கத் தொடங்குவார் என்றும் அவர் கூறினார்.

ரோஹித் சர்மா ஒன்பதாவது ஓவரில் 29 பந்துகளில் 26 ரன்களுடன் ஆட்டமிழந்த பிறகு விராட் கோலி களமிறங்கினார். சுப்மன் கில்லுடன் (71 பந்துகளில் 56) ஜோடி சேர்ந்து இரண்டாவது விக்கெட்டுக்காக 118 ரன்கள் குவித்து, அதிரடி வீரரின் பங்கை செய்தார். தனது 93 ரன்கள் ஆட்டத்தில் கோலி எட்டு பவுண்டரிகளையும் ஒரு சிக்ஸரையும் அடித்தார்.

அதே உரையாடலில், இந்திய அணி முதலில் பேட்டிங் செய்திருந்தால், தான் இன்னும் வேகமாக விளையாடியிருப்பேன் என்று கோலி போட்டிக்குப் பிந்தைய பேட்டியில் குறிப்பிட்டது குறித்து வருண் ஆரோனிடம் கேள்வி எழுப்பப்பட்டது. "விராட் தனது உணர்ச்சிகளைக் கட்டுப்படுத்துவதால் தான் அவர் ஒரு சேஸ் மாஸ்டர் என்று அழைக்கப்படுகிறார். குறிப்பாக சேஸிங்கில். விராட்டைப் போன்ற ஒரு திறமை இருக்கும்போது, அவரால் எந்த பந்துவீச்சாளரையும் எந்நேரமும் தாக்கி விளையாட முடியும் என்று அவர் மனதில் நினைத்திருக்கலாம்.

ஆனாலும், அவர் சூழ்நிலைக்கு ஏற்பவே விளையாடுகிறார், அதனால்தான் அவர் சேஸ்களில் இந்தியாவுக்கு பல வெற்றிகளைப் பெற்றுத் தந்துள்ளார்," என்று ஆரோன் பதிலளித்தார்.சுப்மன் கில் ஆட்டமிழந்த பிறகு, ஷ்ரேயாஸ் ஐயருடன் மூன்றாவது விக்கெட்டுக்காக விராட் கோலி 77 ரன்கள் சேர்த்தார். இந்திய துணை கேப்டனான ஷ்ரேயாஸ் ஐயர், 4 பவுண்டரிகள் மற்றும் ஒரு சிக்ஸருடன் 47 பந்துகளில் 49 ரன்கள் எடுத்தார்.