விராட் கோலி 16000 ரன்கள் தொட்டு சாதனை.. அவரை விட அதிக ரன்கள் குவித்த 7 வீரர்கள் யார்?

மும்பை: கிரிக்கெட் நட்சத்திரம் விராட் கோலி, லிஸ்ட் A கிரிக்கெட்டில் அதிவேகமாக 16,000 ரன்களை கடந்த வீரர் என்ற சாதனையைப் படைத்துள்ளார். பெங்களூருவில், ஆந்திரப் பிரதேச அணிக்கு எதிராக டெல்லி அணிக்காக நடைபெற்ற விஜய் ஹசாரே டிராபி 2025-26 தொடரின் முதல் போட்டியில் இந்த சாதனை நிகழ்ந்தது. கோலி தனது 131 ரன்கள் விளாசிய ஆட்டத்தின் போது இந்த இலக்கை அடைந்தார்.

இதுவரை 343 லிஸ்ட் A போட்டிகளில் கோலி மொத்தம் 16,130 ரன்கள் குவித்துள்ளார். எனினும், லிஸ்ட் A போட்டிகளில் அதிக ரன்கள் எடுத்தோர் பட்டியலில், ஏழு வீரர்கள் அவரை விட முன்னணியில் உள்ளனர். இந்தப் பட்டியலை தற்போது காணலாம்.

ஒருநாள் போட்டிகளில் இந்திய அணிக்காக 308 ஆட்டங்களில் 53 சதங்கள், 76 அரைசதங்களுடன் 14,557 ரன்களை எடுத்துள்ளார். டெல்லி அணிக்காக 14 விஜய் ஹசாரே டிராபி போட்டிகளில் களமிறங்கி, 5 சதங்கள், 3 அரைசதங்கள் உட்பட 950 ரன்களை விளாசியுள்ளார்.லிஸ்ட் A கிரிக்கெட்டில் அதிக ரன்கள் குவித்தோர் பட்டியலில் இங்கிலாந்தின் கிரஹாம் கூச் முதலிடம். 1973 முதல் 1997 வரை 613 போட்டிகளில் ஆடிய அவர் 22,211 ரன்கள் குவித்தார்.

அடுத்ததாக, இங்கிலாந்தைச் சேர்ந்த கிரஹாம் ஹிக் 651 லிஸ்ட் A போட்டிகளில் 22,059 ரன்களுடன் இரண்டாம் இடத்தைப் பிடித்தார்.இந்தியாவின் சச்சின் டெண்டுல்கர், 1989-2012 காலகட்டத்தில் 551 லிஸ்ட் A போட்டிகளில் 21,999 ரன்களை எடுத்தார். இவற்றுள் 18,426 ரன்கள் ஒருநாள் சர்வதேசப் போட்டிகளில் குவிக்கப்பட்டவை.

இலங்கையின் முன்னாள் கேப்டன் குமார் சங்கக்காரா 529 லிஸ்ட் A போட்டிகளில் 19,456 ரன்கள் சேர்த்துள்ளார். மேற்கிந்தியத் தீவுகளின் வீரர் விவ் ரிச்சர்ட்ஸ், 1973-1993 வரை 500 லிஸ்ட் A போட்டிகளில் விளையாடி 16,995 ரன்களுடன் ஓய்வு பெற்றார். ஆஸ்திரேலியாவின் முன்னாள் கேப்டன் ரிக்கி பாண்டிங் 456 லிஸ்ட் A போட்டிகளில் 16,363 ரன்கள் எடுத்தார்.மேற்கிந்தியத் தீவுகளின் கார்டன் கிரினிட்ஜ், 440 லிஸ்ட் A போட்டிகளில் (436 இன்னிங்ஸ்கள்) 16,349 ரன்கள் குவித்து இப்பட்டியலில் இடம்பிடித்தார். இத்துடன், விராட் கோலி எட்டாவது வீரராக உள்ளார்.