டெஸ்ட் விட்டு போக போறீங்களா? அப்போ, உங்க கனவு என்ன ஆச்சு.. 12 ஆண்டுக்கு முன் கோலி சொன்ன வார்த்தை

மும்பை: விராட் கோலி சர்வதேச டெஸ்ட் கிரிக்கெட்டில் இருந்து ஓய்வு பெற விரும்புவதாக பிசிசிஐ-யிடம் தெரிவித்ததாக தகவல்கள் வெளியாகியுள்ளன. ஆனால், பிசிசிஐ இதனை ஏற்காமல், வரவிருக்கும் இங்கிலாந்து டெஸ்ட் தொடரில் அவர் விளையாட வேண்டும் என கோரிக்கை விடுத்துள்ளதாக தெரிகிறது.

நவீன கிரிக்கெட்டின் மாமேதையாக விளங்கும் கோலி, இதுவரை 123 டெஸ்ட் போட்டிகளில் விளையாடி 9,230 ரன்கள் குவித்துள்ளார். அவரது சராசரி 46.85 ஆக உள்ளது. உலக அளவில், ஒருநாள் மற்றும் டெஸ்ட் கிரிக்கெட்டில் 10,000 ரன்களை கடந்த பேட்ஸ்மேன்கள் வெறும் ஏழு பேர் மட்டுமே உள்ளனர். கோலி ஒருநாள் போட்டிகளில் இந்த இலக்கை எட்டியுள்ளார் மற்றும் டெஸ்டில் இதற்கு மிக அருகில் உள்ளார்.

இந்திய கிரிக்கெட்டில், சச்சின் டெண்டுல்கர், ராகுல் டிராவிட் மற்றும் சுனில் கவாஸ்கர் மட்டுமே டெஸ்டில் 10,000 ரன்களை கடந்துள்ளனர். கோலியும் இந்த உயரிய பட்டியலில் இடம்பெறுவார் என எதிர்பார்க்கப்படுகிறது. ஆனால், அவர் இப்போது ஓய்வு பெற்றால், இந்த சாதனையை எட்ட முடியாமல் போகலாம். பன்னிரண்டு ஆண்டுகளுக்கு முன், 10,000 டெஸ்ட் ரன்கள் குறித்து பேசிய கோலி, சாதனைகளை பின்தொடர்வது தனது பாணி இல்லை என கூறியிருந்தார்.

"நான் எந்த சாதனைகளை செய்கிறேன் என பார்ப்பதில்லை," என்று கோலி கூறினார். "ஒரு சதம் அடித்த பிறகு அல்லது போட்டி முடிந்த பிறகு யாராவது சொல்லும்போது தான் ஒரு சாதனை செய்ததை உணர்வேன். போட்டிக்கு முன் இதைப் பற்றி சிந்திப்பதில்லை."

"சில சமயங்களில், இன்னும் சில இன்னிங்ஸ்களில் அல்லது இரண்டு சதங்களால் ஒரு சாதனையை எட்டலாம் என செய்திகள் வரும். ஆனால், அதைப் பற்றி நான் கவலைப்படுவதில்லை. அது என் வழிமுறையும் இல்லை. ஆனாலும், சர்வதேச டெஸ்ட் கிரிக்கெட்டில் 10,000 ரன்கள் எடுப்பது எனது இலக்கு. அதை அடைய நான் முயற்சிப்பேன்," என்று கோலி தெரிவித்திருந்தார்.
12 ஆண்டுகளுக்குப் பிறகு, இந்த மாபெரும் சாதனைக்கு மிக அருகில் இருக்கும் கோலி, தற்போது டெஸ்ட் கிரிக்கெட்டில் இருந்து ஓய்வு பெறுவது குறித்து ஆலோசித்து வருவது குறிப்பிடத்தக்கது.