"கன்னடம்" தெரியுமா? - சமாளித்த விராட் கோலி.. ஆர்சிபி ரசிகர்கள் "ஷாக்"

தோனி நட்பு

இந்த நிலையில், கேப்டன் விராட் கோலி இன்ஸ்டாகிராம் வாயிலாக ரசிகர்களின் கேள்விகளுக்கு பதில் அளித்தார். அதில், வாசிம் அக்ரம் தொடங்கி, தோனி வரை பலர் தொடர்பான கேள்விகளுக்கு அவர் பதில் அளித்திருக்கிறார். குறிப்பாக, கடந்த கால பவுலர்களில், யார் உங்களை அதிகம் பாடுபடுத்தியிருப்பார்? என்ற கேள்விக்கு வாசிம் அக்ரம் என்று பதில் அளித்த கோலி, தோனியுடனான தனது நட்பு நம்பிக்கை, மரியாதை கொண்டது என்று விளக்கமளிக்க அவரது பதில் வைரலானது.

டிவி ஷோ

அதேபோல், உங்களின் ஓய்வு நேரத்தில் என்ன செய்வீர்கள் என்று கேட்டதற்கு, மனைவி அனுஷ்காவுடன் அமர்ந்து நல்ல டிவி ஷோ பார்ப்பேன் என்று கூறினார். மேலும், அவரது உணவுப் பழக்கம் குறித்து கேட்டதற்கு, இந்திய, சீன உணவுகளும் பழங்கள், பாதாம்பருப்பு போன்றவற்றை எடுத்துக் கொள்வேன் என்றார்.

கன்னடம் புரியுமா?

இதில் ரசிகர் ஒருவர், 'உங்களுக்கு கன்னடம் பேச தெரியுமா? பேசினால் புரிந்து கொள்வீர்களா?' என்று கேள்வி எழுப்பினார். காரணம், பரம்பரை பரம்பரையாக ஆர்சிபி அணிக்காக ஆடி வருபவர் விராட் கோலி. ஒருமுறை கூட கோப்பை வெல்லவில்லை என்றாலும், அந்த அணி மீது வெறித்தனமான அன்பை கன்னட ரசிகர்கள் பொழிவார்கள். குறிப்பாக கோலி மீது. இந்த நிலையில், ரசிகரின் கேள்விக்கு விராட் கோலி, "ஸ்வல்பா, ஸ்வல்பா சார். ஆனால், எனக்கு பேசினால் புரியாது' என்று பதில் அளித்துள்ளார்.

இன்னமும் புரியலையா

இத்தனை ஆண்டுகளாக ஆர்சிபி அணிக்காக விளையாடுகிறார். அணியின் கேப்டன். பெங்களூர் வந்தால் ராஜ மரியாதை. இவ்வளவு இருந்தும், கன்னடம் பேசினால் கொஞ்சம் கூட புரிந்து கொள்ள முடியாது என்று கோலி கூறுகிறாரே என்று ஆர்சிபி ரசிகர்கள் சமூக தளங்களில் புலம்புவதை பார்க்க முடிகிறது. சரி.. அது என்ன 'ஸ்வல்பா'?... 'கொஞ்சம் கொஞ்சம்' பேச தெரியும் என்று கூறியிருக்கிறார் கோலி.