ஓவர் வீசவில்லை என்றால், வாசிங்டன் சுந்தர் எதற்கு? MI ஸ்டார் வீரரை சேர்க்க ஆகாஷ் சோப்ரா கோரிக்கை

மும்பை: இந்திய அணியின் முன்னாள் வீரர் ஆகாஷ் சோப்ரா, வாஷிங்டன் சுந்தரின் பந்துவீச்சு புள்ளிவிவரங்கள் மேம்படவில்லை என்றால், ஒருநாள் கிரிக்கெட்டில் அவர் தொடர்ந்து நீடிப்பது கடினம் என்று தெரிவித்துள்ளார். ஒரு சுழற்பந்து வீச்சு ஆல்-ரவுண்டராக அவரிடமிருந்து பந்துவீச்சை எதிர்பார்க்காத பட்சத்தில், அவருக்குப் பதிலாக திலக் வர்மாவை அணியில் தேர்வு செய்யலாம் என்று அவர் வலியுறுத்தியுள்ளார்.

இந்தியா மற்றும் இங்கிலாந்து அணிகளுக்கு இடையிலான மூன்று போட்டிகள் கொண்ட ஒருநாள் தொடரின் இறுதிப் போட்டி ஞாயிற்றுக்கிழமை லார்ட்ஸ் மைதானத்தில் நடைபெறவுள்ளது. இந்தத் தொடரின் முதல் இரண்டு ஒருநாள் போட்டிகளுக்கான இந்திய அணியின் பிளேயிங் லெவனில் வாஷிங்டன் சுந்தர் இடம் பெற்றிருந்த நிலையில், 15 பேர் கொண்ட அணியில் திலக் வர்மா இடம் பெறவில்லை.

தனது யூடியூப் சேனலில் பேசிய ஆகாஷ் சோப்ரா, "வாஷியின் பந்துவீச்சு புள்ளிவிவரங்கள் மேம்படவில்லை என்றால், நீங்கள் ஏன் அவரை அணியில் தொடர்ந்து வைத்திருக்க வேண்டும்? அவர் பந்து வீசவில்லை என்றால், அவர் ஒரு ஆல் ரவுண்டர் கிடையாது. அவர் பேட்டிங் மட்டுமே செய்ய வேண்டும் என்றால், அதை திலக் வர்மாவும் செய்யலாம் அல்லது வேறு யாராவது கூட செய்யலாம். பல விஷயங்கள் நடக்கலாம், ஆனால் இது ஒரு மோசமான ஆலோசனையல்ல," என்றார்.

விராட் கோலியை போல் 31 வயது வீரர் பேட்டிங் செய்கிறார்.. இது வேற லெவல்.. அஸ்வின் பாராட்டு

"திலக் விளையாடும் போது, அவர் ஏன் விளையாடுகிறார் மற்றும் அவர் ஏன் துணை கேப்டனாக நியமிக்கப்பட்டுள்ளார் என்று கேட்கப்படுவதால் எனக்கு மிகவும் ஆச்சரியமாக இருக்கிறது. சுழற்பந்து வீச்சுக்கு எதிரான அவரது புள்ளிவிவரங்கள் மோசமடைந்துள்ளதாகக் கூறி, அவரை நீக்கிவிட்டு அவருக்குப் பதிலாக ரஜத் படிதாரை கொண்டு வர வேண்டும் என்று கூறுகிறார்கள்," என்று அவர் குறிப்பிட்டார்.

சமீபத்தில் முடிவடைந்த இந்தியா மற்றும் இங்கிலாந்து இடையிலான ஐந்து போட்டிகள் கொண்ட டி20 தொடரில் திலக் வர்மா பெரிய அளவில் சோபிக்கவில்லை. இந்தத் தொடரின் ஐந்து இன்னிங்ஸ்களில் சராசரியாக 26.00 என்ற விகிதத்தில் 104 ரன்களை மட்டுமே எடுத்தார்.

"ஒருநாள் கிரிக்கெட்டில் திலக்கின் பெயர் இல்லை. வாஷியின் பெயர் இருக்கிறது, அவருக்கு விளையாட பல வாய்ப்புகளும் கிடைக்கின்றன. அவரிடமிருந்து பெரும்பாலும் பேட்டிங்கில் தான் பங்களிப்பு எதிர்பார்க்கப்படுகிறது, பந்துவீச்சாளராக அவரது பங்களிப்பு அந்த அளவுக்கு இருப்பதில்லை. எனவே, சில ஓவர்கள் வீசக்கூடிய ஒரு பேட்ஸ்மேனை நீங்கள் தேடுகிறீர்கள் என்றால், திலக் வர்மாவும் அதே அளவு ஓவர்களை வீசுவார், மேலும் அவர் வாஷியை விட சிறப்பாக பேட்டிங் செய்வார் என்பதால் இது ஒரு நியாயமான கேள்வி," என்று அவர் கூறினார்.

"அவர் உங்களது டி20 துணை கேப்டனாக இருக்கும்போது, திலக்கின் திறமை மீது இன்னும் கொஞ்சம் நம்பிக்கை வைத்து, அவரை ஒருநாள் போட்டிகளிலும் ஒரு அங்கமாக மாற்றலாமே? அதுவும் நடக்கலாம் என்று நான் நினைக்கிறேன். 2027-ஆம் ஆண்டுக்குள் அணியில் பல மாற்றங்களையும், வீரர்கள் வந்து செல்வதையும் நாம் காண்போம் என்று நான் உணர்கிறேன்," என்று சோப்ரா தெரிவித்தார்.

போதை பொருள் எடுத்த விவகாரம்.. பாகிஸ்தான் ஸ்டார் வீரருக்கு 3 மாதம் ஐசிசி தடை

திலக் வர்மா இதுவரை இந்திய அணிக்காக ஐந்து ஒருநாள் போட்டிகளில் விளையாடி, நான்கு இன்னிங்ஸ்களில் 22.67 சராசரியுடன் 68 ரன்கள் எடுத்துள்ளார். கடந்த ஆண்டு தென்னாப்பிரிக்காவுக்கு எதிரான மூன்றாவது ஒருநாள் போட்டியில் அவர் சேர்க்கப்பட்டார், ஆனால் அவருக்கு பேட்டிங் செய்ய வாய்ப்பு கிடைக்கவில்லை.