1992 உலக கோப்பைக்கு பிறகு இதுவரை எழுந்திருக்காத இங்கிலாந்து கிரிக்கெட் அணி!

பைனலுக்குள் இங்கிலாந்து

1979ம் ஆண்டு 2வது உலக கோப்பையில் இங்கிலாந்து-நியூசிலாந்து அணிகள் அரையிறுதியில் மோதின. இங்கிலாந்து 9 ரன்னில் வெற்றி பெற்று முதல்முறையாக பைனலுக்குள் சென்றது. இறுதி போட்டியில் வெஸ்ட்இண்டீஸ் 92 ரன் வித்தியாசத்தில் இங்கிலாந்தை வென்று மீண்டும் சாம்பியன் பட்டம் பெற்றது.

இந்தியாவிடம் தோல்வி

1983ம் ஆண்டு அரை இறுதியில் இந்தியா 6 விக்கெட் வித்தியாசத்தில் இங்கிலாந்தை வீழ்த்தியது. வெஸ்ட் இண்டீஸ் அணி பாகிஸ்தானை தோற்கடித்தது. இந்தியா-வெஸ்ட் இண்டீஸ் அணிகள் பைனலில் மோதின. அதில் இந்தியா வெற்றி பெற்று கோப்பையை முத்தமிட்டது.

2வது முறை பைனல்

1987ல், 4வது உலக கோப்பை போட்டி முதல் முறையாக இங்கிலாந்துக்கு வெளியே நடந்தது. இந்தியா, ஆஸ்திரேலியா, இங்கிலாந்து, பாகிஸ்தான் அணிகள் அரைஇறுதிக்கு தகுதி பெற்றன. அரை இறுதியில் இந்தியா 35 ரன்னில் இங்கிலாந்திடம் தோற்றது. எனவே, இங்கிலாந்து 2வது முறையாக, பைனலுக்குள் சென்றது. பைனலில்ஸ ஆஸ்திரேலியா-இங்கிலாந்து அணிகள் கொல்கத்தா ஈடன் கார்டன் மைதானத்தில் மோதின. முதலில் ஆடிய ஆஸ்திரேலியா 5 விக்கெட் இழப்புக்கு 253 ரன் எடுத்தது. இங்கிலாந்து அணி 8 விக்கெட் இழப்புக்கு 246 ரன்தான் எடுத்தது. இதனால் ஆலன் பார்டர் தலைமையிலான ஆஸ்திரேலியா 7 ரன்னில் வென்று முதல் முறையாக உலக கோப்பையை கைப்பற்றியது.

3வது முறையாக பைனல்

1992ல் இங்கிலாந்து-பாகிஸ்தான் அணிகள் இறுதிப்போட்டியில் மோதின. முதலில் ஆடிய பாகிஸ்தான் 249 ரன் எடுத்தது. இங்கிலாந்து 227 ரன்னில் ‘ஆல் அவுட்' ஆனது. இதனால் இம்ரான்கான் தலைமையிலான பாகிஸ்தான் 22 ரன்னில் வென்று முதல் முறையாக உலக கோப்பையை கைப்பற்றியது. 3 முறை பைனலுக்கு சென்றும், கோப்பையை வெல்ல முடியாத அணி என்ற மோசமான சாதனை இங்கிலாந்துக்கு கிடைத்தது.

சொதப்பல் ஆரம்பம்

ஆனால் 1992க்கு பிறகு இங்கிலாந்து பிற அணிகளுக்கு பெரும் சவாலாக இருக்கவில்லை என்பது புள்ளி விவரத்தை பார்த்தால் தெரியும். 1996 உலக கோப்பையின் லீக் சுற்றில், பாகிஸ்தான், தென் ஆப்பிரிக்கா, நியூசிலாந்து ஆகிய பெரிய அணிகளிடம் இங்கிலாந்து தோற்றது. இருப்பினும், காலிறுதியில், இலங்கையிடம் தோற்று வெளியேறியது.

சொந்த மண்ணிலும் சொதப்பல்

1999ல் இங்கிலாந்தில் மீண்டும் கிரிக்கெட் போட்டி நடந்தது. ஆனால் சொந்த மண்ணில்கூட 2வது ரவுண்டுக்கு தகுதி பெற முடியவில்லை இங்கிலாந்தால்.

குட்டி அணிகளிடம் கெத்து

2003ல், முதல் ரவுண்டுக்கு பிறகு வெளியேற்றப்பட்டது இங்கிலாந்து. பாகிஸ்தானுடன் மட்டுமே அப்போது நல்லபடியாக வெற்றி பெற்றது இங்கிலாந்து. மற்ற வெற்றிகள் குட்டி அணிகளுடன் மட்டுமே.

அரையிறுதி இல்லை

2007ல், வெஸ்ட் இண்டீசில் நடந்த உலக கோப்பையில், கென்யா, கனடா, அயர்லாந்து போன்ற குட்டி அணிகளையும், இலங்கையையும் வீழ்த்தியது இங்கிலாந்து. ஆனாலும், அரையிறுதிக்குள் நுழைய முடியவில்லை.

காலிறுதியில் கடும் அடி

2011ல் தென் ஆப்பிரிக்கா, வெஸ்ட் இண்டீசுடன் சிறிய வித்தியாசத்தில் இங்கிலாந்து வெற்றி பெற்றது. இந்தியாவுடனான போட்டி டிராவில் முடிவடைந்தது. ஆனால் காலிறுதியில், 10 விக்கெட்டுகள் வித்தியாசத்தில் இலங்கையால் துவம்சம் செய்து வெளியேற்றப்பட்டது.

இது மகா மோசம்

இதோ, இப்போது 2015 உலக கோப்பையில், காலிறுதிக்கு போககூட தகுதி பெற முடியாமல் குட்டி அணியான வங்கதேசத்துடன் உதைபட்டு வெளியேறியுள்ளது, ஜென்டில்மேன் கேமை கண்டுபிடித்த இங்கிலாந்து.