IND vs AUS: "கடைசி 5 ஓவர்களில் மேட்ச்சை இழந்துவிட்டோம்".. இந்திய அணி கேப்டன் ஹர்மன்பிரீத் கவுர் வேதனை

விசாகப்பட்டினம்: மகளிர் உலகக் கோப்பை வரலாற்றில் ஒரு பிரம்மாண்டமான இலக்கை விரட்டி, உலக சாம்பியனான ஆஸ்திரேலிய அணி, இந்தியாவை 3 விக்கெட் வித்தியாசத்தில் வீழ்த்தி அதிர்ச்சி வைத்தியம் அளித்துள்ளது. 331 ரன்கள் என்ற இமாலய இலக்கை நிர்ணயித்த பிறகும் இந்திய அணி தோல்வியைத் தழுவியதற்கு, கடைசி கட்டத்தில் ஏற்பட்ட பேட்டிங் சரிவே முக்கியக் காரணம் என்று கேப்டன் ஹர்மன்பிரீத் கவுர் வேதனையுடன் தெரிவித்துள்ளார்.

விசாகப்பட்டினத்தில் நடைபெற்ற உலகக்கோப்பை லீக் போட்டியில், முதலில் பேட்டிங் செய்த இந்திய அணி, ஒரு கட்டத்தில் 7 ஓவர்களுக்கும் மேல் மீதமிருந்த நிலையில், 4 விக்கெட் இழப்பிற்கு 294 ரன்கள் எடுத்து வலுவான நிலையில் இருந்தது. 350 ரன்களை எளிதில் கடக்கும் என்று எதிர்பார்க்கப்பட்ட நிலையில், இந்திய அணியின் கீழ் வரிசை பேட்டிங் சீட்டுக்கட்டுப் போலச் சரிந்தது. கடைசி 7 ஓவர்களில் வெறும் 36 ரன்களைச் சேர்ப்பதற்குள், இந்திய அணி தனது கடைசி 6 விக்கெட்டுகளையும் இழந்தது.

ஆஸ்திரேலியாவின் அனபெல் சதர்லேண்ட், தனது அபாரமான பந்துவீச்சால் இந்திய பேட்டிங் வரிசையைச் சிதைத்தார். 9.5 ஓவர்களில் 40 ரன்களை மட்டுமே விட்டுக்கொடுத்து, தனது முதல் 5 விக்கெட் வெற்றியைப் பதிவு செய்து, இந்தியாவின் இமாலய ஸ்கோர் கனவைத் தகர்த்தார்.

ஹர்மன்பிரீத் கவுர் வேதனை

தோல்வி குறித்துப் பேசிய கேப்டன் ஹர்மன்பிரீத் கவுர், "நாங்கள் ஆட்டத்தைத் தொடங்கிய விதத்திற்கு, இன்னும் ஒரு 30-40 ரன்களைக் கூடுதலாகச் சேர்த்திருக்க வேண்டும். கடைசி ஆறு ஓவர்களில் நாங்கள் ரன் குவிக்கத் தவறியதே தோல்விக்குக் காரணம். இது பேட்டிங்கிற்குச் சாதகமான ஆடுகளம்தான். ஆனால், கடைசி ஆறு ஓவர்களில் சரியாக பேட்டிங் செய்யாதது எங்களுக்குப் பெரும் பின்னடைவை ஏற்படுத்திவிட்டது" என்றார்.

முன்னதாக, தொடக்க வீராங்கனைகளான ஸ்மிருதி மந்தனா (80) மற்றும் பிரதிகா ராவல் (75) ஆகியோர் முதல் விக்கெட்டுக்கு 155 ரன்கள் சேர்த்து அபாரமான தொடக்கத்தை அளித்தனர். அவர்களைப் பாராட்டிய ஹர்மன்பிரீத், "எங்கள் தொடக்க வீராங்கனைகள் அற்புதமாக செயல்பட்டு வருகிறார்கள். அவர்களால்தான் எங்களால் 300 ரன்களைக் கடக்க முடிகிறது" என்றார்.

ஐந்து பந்துவீச்சாளர் வியூகம் மீண்டும் தோல்வியா?

பேட்டிங்கை வலுப்படுத்தும் நோக்கில், இந்திய அணி ஐந்து பந்துவீச்சாளர்களுடன் களமிறங்கும் வியூகம் இந்தப் போட்டியிலும் கைகொடுக்கவில்லை. இது, அணிக்கு ஏற்பட்ட இரண்டாவது தொடர் தோல்வியாகும். பந்துவீச்சாளர்கள் பற்றாக்குறையால், கேப்டன் ஹர்மன்பிரீத் கவுரே 6-வது பந்துவீச்சாளராகப் பந்துவீச வேண்டிய கட்டாயம் ஏற்பட்டது.

பந்துவீச்சில் ஸ்ரீ சரணி (3/41) மட்டுமே சிறப்பாகச் செயல்பட்டார். மற்ற பந்துவீச்சாளர்கள் ரன்களை வாரி வழங்கினர். முதல் 40 ஓவர்களில் சிறப்பாகச் செயல்பட்டும், கடைசி கட்டத்தில் ஏற்பட்ட சரிவால் இந்தியா சந்தித்த இந்தத் தோல்வி, உலகக் கோப்பைப் பயணத்தில் அணிக்கு ஒரு பெரும் பின்னடைவாகப் பார்க்கப்படுகிறது.