149 ஆண்டு டெஸ்ட் வரலாற்றில் புதிய உலக சாதனை.. 401 ரன்கள் குவித்து வெஸ்ட் இண்டீஸ் ஜோடி மிரட்டல்

நார்த் சவுண்ட்: இலங்கைக்கு எதிரான முதல் டெஸ்ட் போட்டியில் வெஸ்ட் இண்டீஸ் கிரிக்கெட் வீரர்களான அமீர் ஜாங்கூ மற்றும் ரோஸ்டன் சேஸ் ஆகியோர் 6-வது விக்கெட்டுக்கு 401 ரன்கள் குவித்து புதிய உலக சாதனை படைத்துள்ளனர். 149 ஆண்டு கால டெஸ்ட் கிரிக்கெட் வரலாற்றில், 6-வது விக்கெட்டுக்கு 400 அல்லது அதற்கு மேற்பட்ட ரன்கள் குவிக்கப்பட்டிருப்பது இதுவே முதல் முறையாகும்.

நார்த் சவுண்டில் நடைபெற்று வரும் இப்போட்டியில் வெஸ்ட் இண்டீஸ் அணி தனது முதல் இன்னிங்ஸை விளையாடியது. தனது இரண்டாவது டெஸ்ட் போட்டியில் மட்டுமே விளையாடும் இளம் வீரர் அமீர் ஜாங்கூ 373 பந்துகளில் 233 ரன்கள் குவித்தார். உலக டெஸ்ட் சாம்பியன்ஷிப் போட்டியில் வெஸ்ட் இண்டீஸ் வீரர் ஒருவரால் பதிவு செய்யப்பட்ட அதிகபட்ச தனிநபர் ஸ்கோர் இதுவாகும். மறுபுறம் வெஸ்ட் இண்டீஸ் அணியின் கேப்டன் ரோஸ்டன் சேஸ் 194 ரன்கள் எடுத்து ஆட்டமிழந்தார்.

இந்தப் போட்டியின் 6-வது விக்கெட்டுக்கு இந்த ஜோடி 602 பந்துகளில் 401 ரன்கள் குவித்தது. இதற்கு முன்பு, டெஸ்ட் கிரிக்கெட்டில் 6-வது விக்கெட்டுக்கு அதிகபட்ச ரன்கள் குவித்த சாதனையை இங்கிலாந்தின் ஜானி பேர்ஸ்டோ மற்றும் பென் ஸ்டோக்ஸ் ஜோடி வைத்திருந்தது. அவர்கள் 2016 ஜனவரியில் கேப் டவுனில் தென்னாப்பிரிக்காவுக்கு எதிராக 399 ரன்கள் குவித்ததே உலக சாதனையாக இருந்தது. தற்போது இந்த சாதனையை ஜாங்கூ மற்றும் ரோஸ்டன் சேஸ் ஜோடி முறியடித்துள்ளது.

மேலும், வெஸ்ட் இண்டீஸ் டெஸ்ட் கிரிக்கெட் வரலாற்றில் எந்தவொரு விக்கெட்டுக்கும் பதிவு செய்யப்பட்ட இரண்டாவது மிகப்பெரிய பார்ட்னர்ஷிப்பாக இது மாறியுள்ளது. இதற்கு முன்பு 1958-ல் பாகிஸ்தானுக்கு எதிராக கான்ராட் ஹண்ட் மற்றும் கேரி சோபர்ஸ் ஜோடி 465 ரன்கள் குவித்ததே முதலிடத்தில் உள்ளது. அதேபோல், இலங்கைக்கு எதிராக டெஸ்ட் போட்டிகளில் பதிவு செய்யப்பட்ட இரண்டாவது மிகப்பெரிய பார்ட்னர்ஷிப்பும் இதுவேயாகும். இந்த வரலாற்று சாதனையின் மூலம் அமீர் ஜாங்கூ மற்றும் ரோஸ்டன் சேஸ் ஜோடி கிரிக்கெட் உலகையே தங்களது பக்கம் திரும்பிப் பார்க்க வைத்துள்ளது.