உலகக்கோப்பை இந்திய அணியில் அதிரடி ராணி ஷஃபாலி வர்மா சேர்ப்பு.. ஆஸ்திரேலிய அரையிறுதிக்கு முன் மாற்றம்

மும்பை: 2025 ஐசிசி மகளிர் கிரிக்கெட் உலகக் கோப்பை தொடரின் அரையிறுதிப் போட்டிக்கு முன்னதாக, இந்திய அணிக்கு பெரும் பின்னடைவு ஏற்பட்டுள்ளது. அணியின் முக்கியத் தொடக்க வீராங்கனை பிரதிகா ராவல், காயம் காரணமாகப் போட்டியிலிருந்து முழுவதுமாக விலகியுள்ளார். அவருக்குப் பதிலாக, அதிரடி ஆட்டக்காரர் ஷஃபாலி வர்மா அணியில் சேர்க்கப்பட்டுள்ளார்.

இந்திய சொந்த மண்ணில் நடைபெற்று வரும் இந்த உலகக் கோப்பைத் தொடரில், இந்திய அணி அரையிறுதிக்கு முன்னேறியுள்ளது. இந்நிலையில், வங்கதேசத்திற்கு எதிரான கடைசி லீக் போட்டியின்போது ஃபீல்டிங் செய்துகொண்டிருந்தபோது, தொடக்க வீராங்கனை பிரதிகா ராவலுக்குக் கணுக்காலில் பலத்த காயம் ஏற்பட்டது. பந்தைத் தடுக்க முயன்றபோது, அவரது கணுக்கால் எதிர்பாராதவிதமாகத் திரும்பியதால் வலியால் துடித்தார்.

உடனடியாக மைதானத்தை விட்டு வெளியேறிய அவருக்கு, மருத்துவப் பரிசோதனைகள் மேற்கொள்ளப்பட்டன. அவரது காயம் குணமடைய கால அவகாசம் தேவைப்படும் என்பதால், உலகக் கோப்பையின் எஞ்சிய போட்டிகளில் இருந்து அவர் விலகுவதாக அதிகாரப்பூர்வமாக அறிவிக்கப்பட்டுள்ளது. இது இந்திய அணிக்கு பெரும் இழப்பாகக் கருதப்படுகிறது.

ஏனெனில், இந்தத் தொடரில் பிரதிகா ராவல் அபாரமான ஃபார்மில் இருந்தார். 6 போட்டிகளில் விளையாடிய அவர், 51.33 என்ற சராசரியுடன் 308 ரன்கள் குவித்திருந்தார். இதில் நியூசிலாந்துக்கு எதிராக அடித்த 122 ரன்களும் அடங்கும். தொடரின் அதிக ரன்கள் எடுத்த வீராங்கனைகள் பட்டியலில் அவர் இரண்டாவது இடத்தில் இருந்தார். ஸ்மிருதி மந்தனாவுடன் இணைந்து அவர் அளித்த சிறப்பான தொடக்கம், இந்தியாவின் பல வெற்றிகளுக்கு முக்கியக் காரணமாக அமைந்தது.

மீண்டும் அணியில் ஷஃபாலி:

பிரதிகா ராவல் விலகியதையடுத்து, அவருக்கு மாற்று வீராங்கனையாக ஷஃபாலி வர்மா அணியில் சேர்க்கப்பட்டுள்ளார். ஐசிசியின் உலகக்கோப்பை தொழில்நுட்பக் குழு இதற்கான ஒப்புதலை அளித்துள்ளது. முதலில் அறிவிக்கப்பட்ட உலகக் கோப்பை அணியில் ஷஃபாலி வர்மாவுக்கு இடம் கிடைக்காதது பெரும் விவாதத்தை ஏற்படுத்தியிருந்தது. தற்போது முக்கியக் கட்டத்தில், அணியின் தேவை கருதி அவர் மீண்டும் அழைக்கப்பட்டுள்ளார்.

21 வயதான ஷஃபாலி, தனது அதிரடியான பேட்டிங்கிற்குப் பெயர் பெற்றவர். சமீபத்தில் நடந்து முடிந்த உள்ளூர் போட்டிகள் மற்றும் மகளிர் ஐபிஎல் (WPL) தொடரில் சிறப்பான ஆட்டத்தை வெளிப்படுத்தியிருந்தார். குறிப்பாக, 2024-25 உள்ளூர் ஒருநாள் சீசனில், ஹரியானா அணிக்காக 75.28 சராசரியுடன் 527 ரன்களைக் குவித்தார். மகளிர் ஐபிஎல் தொடரில், டெல்லி கேப்பிட்டல்ஸ் அணிக்காக 304 ரன்கள் விளாசினார். அவரது அதிரடி ஆட்டம், அரையிறுதியில் பலம் வாய்ந்த ஆஸ்திரேலிய அணிக்கு எதிராக இந்தியாவிற்குக் கைகொடுக்கும் என எதிர்பார்க்கப்படுகிறது.

வியாழக்கிழமை (அக்டோபர் 30) நவி மும்பையில் நடைபெறும் அரையிறுதிப் போட்டியில் இந்திய அணி, ஆஸ்திரேலிய அணியை எதிர்கொள்கிறது. பிரதிகா ராவல் இல்லாதது பின்னடைவாக இருந்தாலும், ஷஃபாலி வர்மாவின் வருகை அணிக்கு புதிய உத்வேகத்தை அளித்துள்ளது. இந்த முக்கியமான போட்டியில் அவர் உடனடியாக பிளேயிங் லெவனில் தேர்வு செய்யப்படுவார் என எதிர்பார்க்கப்படுகிறது.