உலக கோப்பை தொடர்களில் 'தனக்கு தானே ஆப்பு' வைத்துக் கொண்ட வீரர்கள்!

முதல் வீரர்

முதல்முதலில் உலக கோப்பையில் ஹிட்விக்கெட் ஆகி விக்கெட்டை பறிகொடுத்த மோசமான நிகழ்வை பதிவு செய்தவர் மேற்கிந்திய தீவுகளின் ராய் பிரெட்ரிக்ஸ். 1975ம் ஆண்டு ஆஸ்திரேலியாவுக்கு எதிரான போட்டியில் 7 ரன்கள் எடுத்திருந்தபோது, இதுபோல அவர் அவுட் ஆனார்.

கனடா வீரர்

1979ம் ஆண்டு இங்கிலாந்துக்கு எதிரான போட்டியின்போது கனடா வீரர் டென்னிஸ், 21 ரன்களில் ஹிட்விக்கெட்டாகி நடையை கட்டினார்.

கென்யாவின் ஒடும்பே

1996ல் கென்ய நாட்டு வீரர் மவுரிஸ் ஒடும்பே, மே.இ.தீவுகளுக்கு எதிரான போட்டியில் 6 ரன்கள் எடுத்திருந்தபோது ஹிட்விக்கெட் ஆனார்.

கேரி கிறிஸ்டன்

1996 உலக கோப்பையின்போது மற்றொருவரும் அதேபோல அவுட் ஆனார். அவர், இந்திய கிரிக்கெட் அணியின் முன்னாள் பயிற்சியாளரான கேரி கிறிஸ்டன். மே.இ.தீவுகளுக்கு எதிரான போட்டியில் 3 ரன்கள் எடுத்திருந்த நிலையில் இவ்வாறு அவுட் ஆனார்.

மீண்டும் ஒரு கனடா வீரர்

2003 உலக கோப்பையின்போது இலங்கைக்கு எதிரான போட்டியில் கனடாவின் ஜோ ரூஸ் 9 ரன்கள் எடுத்திருந்த நிலையில் ஹிட்விக்கெட்டானார்.

2வது முறையாக ஒடும்பே

2003 உலக கோப்பையில் மே.இ.தீவுகளுக்கு எதிரான போட்டியில் கென்ய வீரர் மவுரிஸ் ஒடும்பே ஹிட்விக்கெட் ஆகி டக் அவுட் ஆனார். 1996லும் இதேபோல மே..இ.தீவுகளுக்கு எதிராகத்தான் ஒடும்பே அவுட் ஆகியிருந்தார். உலக கோப்பையில் இருமுறை ஹிட்விக்கெட் ஆனவர் என்ற மோசமான பதிவும் இவரின் பெயர் பின்னால்தான் இன்னமும் நீடிக்கிறது.

ஜிம்பாப்வே வீரர்

2007ல் ஜிம்பாப்வேயின் வுசி சிபாண்டா, அயர்லாந்துக்கு எதிராக 67 ரன்கள் எடுத்து ஹிட்விக்கெட் ஆனார்.

இப்போதும் ஜிம்பாப்வே

இந்த வரிசையில் தற்போது இணைந்துள்ளவர் ரேகிஸ் சக்கப்வா. இன்றைய யூ.ஏ.இ அணிக்கு எதிரான போட்டியில் 35 ரன்கள் எடுத்து ஹிட்விக்கெட் ஆனார்.