மகளிர் ஐபிஎல் வரலாற்றிலேயே பிரம்மாண்ட சாதனை படைத்த கிரிக்கெட் குயின்.. கலங்கிய மும்பை இந்தியன்ஸ்

டெல்லி : 2024 மகளிர் ஐபிஎல் தொடரில் மும்பை இந்தியன்ஸ் - ராயல் சேலஞ்சர்ஸ் பெங்களூர் மகளிர் அணிகள் இடையே நடந்த லீக் போட்டியில் ஆஸ்திரேலிய வீராங்கனை எல்லிஸ் பெர்ரி ஆல் - ரவுண்டராக சிறப்பாக செயல்பட்டு பெங்களூர் அணியை வெற்றி பெறச் செய்தார்.

மகளிர் ஐபிஎல் தொடரின் சிறந்த பந்துவீச்சை பதிவு செய்து சாதித்த அவர் பேட்டிங்கிலும் தனி ஆளாக நின்று மும்பை இந்தியன்ஸ் அணியை வீழ்த்தினார். இந்தப் போட்டியில் வென்றால் தான் பிளே- ஆஃப் செல்ல முடியும் என்ற நிலையில் இருந்தது பெங்களூர் அணி. எல்லிஸ் பெர்ரியின் அபாரமான ஆட்டத்தால் பெங்களூர் அணி பிளே-ஆஃப் சுற்றுக்கு முன்னேறி இருக்கிறது.

இந்தப் போட்டியில் மும்பை இந்தியன்ஸ் அணி முதலில் பேட்டிங் செய்தது. அந்த அணியின் துவக்க ஆட்டக்காரர்கள் ஹேலி மேத்யூஸ் 26, சஞ்சீவ் சாஜனா 30 ரன்கள் எடுத்தனர். மற்றவர்கள் சொற்ப ரன்களில் ஆட்டமிழந்தனர். எல்லிஸ் பெர்ரி 4 ஓவர்கள் பந்து வீசி 15 ரன்கள் கொடுத்து 6 விக்கெட் வீழ்த்தினார். கடந்த லீக் போட்டிகளில் எல்லிஸ் பெர்ரி ஒரு விக்கெட் கூட வீழ்த்தாத நிலையில் இந்த போட்டியில் 6 விக்கெட் வீழ்த்தி சாதனை படைத்தார். மகளிர் ஐபிஎல் தொடரில் இதுவே சிறந்த பந்துவீச்சாகும்.

அவரது விக்கெட் வேட்டையால் மும்பை அணி 113 ரன்களுக்கு ஆல் - அவுட் ஆனது. அடுத்து பெங்களூர் அணியின் சேஸிங்கில் எல்லிஸ் பெர்ரி 40 ரன்கள் எடுத்து கடைசி வரை ஆட்டமிழக்காமல் நின்று அணியின் வெற்றியை உறுதி செய்தார். 6 விக்கெட் மற்றும் 40 ரன்கள் குவித்து ஆல் - ரவுண்டராக கலக்கினார் எல்லிஸ் பெர்ரி. தற்போது பெங்களூர் அணி பிளே-ஆஃப் சுற்றின் எலிமினேட்டர் போட்டிக்கு முன்னேறி இருக்கிறது.