WTC Final: தென்னாப்பிரிக்க அணியில் தமிழக கிரிக்கெட் வீரர்.. யார் இந்த சேனுரான் முத்துசாமி?

டர்பன்: தென்னாப்பிரிக்க கிரிக்கெட் அணியில் தமிழ்நாட்டை பூர்வீகமாகக் கொண்ட சேனுரான் முத்துசாமி, உலக டெஸ்ட் சாம்பியன்ஷிப் இறுதிப் போட்டிக்கான அணியில் இடம்பெற்று பெருமை சேர்த்துள்ளார். 31 வயதாகும் இந்த இடது கை சுழற்பந்து வீச்சாளர், ஆல்-ரவுண்டராக தனது திறமையை வெளிப்படுத்தி வருகிறார்.

நாகப்பட்டினத்தைப் பூர்வீகமாகக் கொண்ட முத்துசாமியின் குடும்பம், தென்னாப்பிரிக்காவில் வாழ்ந்தாலும், இந்தியாவுடனான தொடர்பைப் பேணி வருகிறது. இவர் இரண்டு முறை இந்தியாவுக்கு வந்து தனது உறவினர்களைச் சந்தித்துள்ளார்.சேனுரான் முத்துசாமி 2019ஆம் ஆண்டு இந்தியாவுக்கு எதிரான டெஸ்ட் போட்டியில் அறிமுகமானார். அவரது முதல் சர்வதேச விக்கெட்டாக இந்திய அணியின் நட்சத்திர வீரர் விராட் கோலியை வீழ்த்தியது அனைவரையும் ஆச்சரியத்தில் ஆழ்த்தியது.

இதுவரை நான்கு டெஸ்ட் போட்டிகளில் விளையாடியுள்ள முத்துசாமி, முதல் தர கிரிக்கெட்டில் 262 விக்கெட்டுகளும், 9 சதங்களுடன் 5111 ரன்களும் எடுத்து தனது ஆல்-ரவுண்ட் திறனை நிரூபித்துள்ளார்.சமீபத்தில், 2025 மே 13 அன்று அறிவிக்கப்பட்ட தென்னாப்பிரிக்க அணியில், டெம்பா பவுமா தலைமையிலான 15 பேர் கொண்ட அணியில் முத்துசாமி இடம்பெற்றுள்ளார்.

ஆஸ்திரேலியாவுக்கு எதிராக நடைபெறவுள்ள WTC இறுதிப் போட்டியில், கேசவ் மகாராஜுடன் இணைந்து சுழற்பந்து வீச்சில் முக்கியப் பங்காற்றுவார் என எதிர்பார்க்கப்படுகிறது. இந்த அணியில் ககிசோ ரபாடா, மார்கோ ஜான்சன், வியான் முல்டர் ஆகியோரும் இடம்பெற்றுள்ளனர்.முத்துசாமி சமீப காலமாக உள்நாட்டு கிரிக்கெட் போட்டியில் சிறப்பாக விளையாடி வருகிறார். . ஏப்ரல் 2025இல், வாரியர்ஸ் அணிக்காக விளையாடிய அவர், டால்பின்ஸ் அணிக்கு எதிராக 35 ஓவர்களில் 5 விக்கெட்டுகளை வீழ்த்தினார். பேட்டிங்கிலும் சதம் விளாசி அசத்தினார்.

இந்த ஆட்டத்தில் அவரது தலைமையும், பந்து வீச்சும் பாராட்டப்பட்டன.தென்னாப்பிரிக்காவில் தமிழ் வம்சாவளியினரின் பிரதிநிதியாக விளங்கும் முத்துசாமி, தனது கடின உழைப்பு மற்றும் திறமையால் உலக அரங்கில் கவனம் பெற்றுள்ளார். WTC இறுதிப் போட்டியில் அவரது ஆட்டம், தமிழ் சமூகத்திற்கு மட்டுமல்லாமல், தென்னாப்பிரிக்க கிரிக்கெட் ரசிகர்களுக்கும் பெருமை சேர்க்கும் என நம்பப்படுகிறது. இந்த இளம் வீரரின் எதிர்கால பயணம், மேலும் பல வெற்றிகளைப் பதிவு செய்யும் என எதிர்பார்க்கலாம்.