போட்டியின் நடுவே அவசர அவசரமாக ரூமுக்கு சென்ற பும்ரா.. மைதானத்தில் கலாய்த்து ரசிகர்கள்.. காரணம் என்ன?

ரசிகர்கள் விமர்சனம்

இந்த போட்டியில் இந்திய அணியின் நம்பிக்கை நட்சத்திரமாக பார்க்கப்படும் ஜஸ்பிரித் பும்ரா பெரிய ஏமாற்றம் கொடுத்தார். ஜஸ்பிரித் பும்ரா பொதுவாக எந்த களமாக இருந்தாலும் மிக விரைவில் விக்கெட் எடுத்து கொடுக்க கூடியவர். ஆனால் சவுத்தாம்டன் பிட்ச் தற்போது வேகப்பந்துவீச்சாளர்களுக்கு சாதகமாக இருக்கும் போதிலும் சரியான லெந்தில் பந்துவீசுவதில் அவர் மிகவும் சிரமப்பட்டு வருகிறார். இதனால் ரசிகர்கள் அவரை விமர்சித்து வருகின்றனர்.

மீண்டும் பழைய ஃபார்ம்

இன்று தொடங்கிய 5வது நாள் ஆட்டத்திலும் முதலில் சில பந்துகளை மிக ஷார்ட் லெந்த்தில் அவர் வீசி சொதப்பினார். பின்னர் அதனை சரிசெய்துகொண்டு மீண்டும் ஃபார்முக்கு வந்துள்ளார். இந்நிலையில் ஜஸ்பிரித் பும்ராவை மீண்டும் ரசிகர்கள் கிண்டல் செய்து வருகின்றனர். விமர்சனங்களுக்கு இந்த முறை அவர் ஜெர்ஸியை தவறாக அணிந்து வந்தது தான் காரணம்.

பும்ரா செய்த தவறு

இன்றைய போட்டி தொடங்கும் போது ஜஸ்பிரித் பும்ரா, டெஸ்ட் சாம்பியன்ஷிப் தொடருக்காக பிரத்யேகமாக தயாரிக்கப்பட்ட ஜெர்ஸியை அணிந்து வராமல், இந்திய அணியின் வழக்கமான டெஸ்ட் ஜெர்ஸியை அணிந்து வந்து விளையாடினார். மேலும் அதே ஜெர்ஸியை அணிந்துக்கொண்டு ஒரு ஓவரும் வீசினார். பின்னர் ரசிகர்கள் பார்த்து கண்டுபிடித்தவுடன் போட்டிக்கு இடையே ஓய்வறைக்கு சென்று தனது ஜெர்ஸியை மாற்றி வந்தார். இந்த புகைப்படங்கள் இணையத்தில் வைரலாகி வருகிறது.

ஜெர்ஸியின் வித்தியாசம் என்ன?

ஒவ்வொரு அணியின் டெஸ்ட் ஜெர்ஸியிலும் நாடுகளின் பெயர் ஓரத்தில் அச்சிடப்பட்டு, ஸ்பான்சர்களின் பெயர் மையப்பகுதியில் இடம்பெற்றிருக்கும். ஆனால் ஐசிசி நடத்தும் அனைத்து தொடர்களிலும், வீரர்களின் ஜெர்ஸியின் மையப் பகுதியில் தான் நாடுகளின் பெயர் இடம்பெற்றிருக்க வேண்டும். ஸ்பான்சர்களின் பெயர்கள் ஜெர்ஸியின் வேறு ஏதாவது பகுதியில் தான் இடம்பெற்றிருக்க வேண்டும். டெஸ்ட் சாம்பியன்ஷிப் முதல் முறையாக நடப்பதால் பும்ரா தவறுதலாக வழக்கமான ஜெர்ஸியை அணிந்து வந்து விளையாடிவிட்டார்.