பாகிஸ்தான் தோல்வி இந்தியாவுக்கு லாபம்.. உலக டெஸ்ட் புள்ளிப்பட்டியலில் இந்திய அணி மூன்றாம் இடம்

மும்பை: பாகிஸ்தான் அணிக்கு எதிரான இரண்டாவது டெஸ்ட் போட்டியில் தென்னாப்பிரிக்கா அணி 8 விக்கெட் வித்தியாசத்தில் அபார வெற்றி பெற்றது. சொந்த மண்ணில் பாகிஸ்தான் அணி தோல்வி அடைந்தது. இது உலக டெஸ்ட் சாம்பியன்ஷிப் (WTC) 2025-27 புள்ளிப்பட்டியலில் பெரும் மாற்றங்களை ஏற்படுத்தியுள்ளது.

குறிப்பாக, பாகிஸ்தானின் இந்தத் தோல்வியால் இந்திய அணி நான்காம் இடத்திலிருந்து மூன்றாம் இடத்திற்கு முன்னேறி லாபம் அடைந்துள்ளது. அடுத்ததாக இந்திய அணி, தென்னாப்பிரிக்காவுக்கு எதிராக ஆட உள்ள டெஸ்ட் தொடரை வென்றால், முதல் இரண்டு இடங்களுக்குள் நுழையும் வாய்ப்பு உருவாகியுள்ளது. எப்படி இந்திய அணி மூன்றாம் இடத்திற்கு முன்னேறியது? அடுத்து எப்படி தென்னாப்பிரிக்க தொடரில் இரண்டாவது இடத்தை பிடிக்கலாம்? என்பது பற்றி இங்கே பார்க்கலாம்.

பாகிஸ்தான் மற்றும் தென்னாப்பிரிக்கா அணிகளுக்கு இடையேயான இரண்டாவது டெஸ்ட் போட்டி ராவல்பிண்டியில் நடைபெற்றது. இதில், தென்னாப்பிரிக்க அணி 8 விக்கெட் வித்தியாசத்தில் பாகிஸ்தானை தோற்கடித்து, தொடரை 1-1 என சமன் செய்தது. பாகிஸ்தான் நிர்ணயித்த 68 ரன்கள் என்ற எளிய இலக்கை, தென்னாப்பிரிக்கா 12.3 ஓவர்களிலேயே எட்டிப் பிடித்து வெற்றியைப் பதிவு செய்தது.

இந்தப் போட்டியின் இரண்டாவது இன்னிங்ஸில் தென்னாப்பிரிக்க சுழற்பந்து வீச்சாளர் சைமன் ஹார்மர் 6 விக்கெட்டுகளை வீழ்த்தி பாகிஸ்தானின் சரிவுக்கு முக்கிய காரணமாக அமைந்தார். முதல் இன்னிங்ஸில் 7 விக்கெட்டுகளை வீழ்த்திய கேசவ் மஹாராஜ், இரண்டாவது இன்னிங்ஸிலும் 2 விக்கெட்டுகளைக் கைப்பற்றினார்.

புள்ளிப்பட்டியல் மாற்றங்கள்

இந்த வெற்றி தென்னாப்பிரிக்க அணிக்கு பெரும் ஊக்கத்தை அளித்ததோடு, உலக டெஸ்ட் சாம்பியன்ஷிப் புள்ளிப்பட்டியலிலும் அவர்களை 7ஆம் இடத்திலிருந்து 5ஆம் இடத்திற்கு உயர்த்தியுள்ளது. ஆனால், இந்தத் தோல்வி பாகிஸ்தான் அணிக்குப் பெரும் பின்னடைவை ஏற்படுத்தியுள்ளது. அவர்கள் 2ஆம் இடத்திலிருந்து நேரடியாக 4ஆம் இடத்திற்குத் தள்ளப்பட்டனர்.

பாகிஸ்தானின் இந்தச் சரிவு, இந்திய அணிக்குச் சாதகமாக அமைந்துள்ளது. இதுவரை நான்காம் இடத்தில் இருந்த இந்திய அணி, இந்தப் போட்டியின் முடிவால் தற்போது மூன்றாம் இடத்திற்கு முன்னேறியுள்ளது. ஆஸ்திரேலியா 100% புள்ளிகளுடன் தொடர்ந்து முதலிடத்தில் ஆதிக்கம் செலுத்துகிறது. இலங்கை அணி 66.67% புள்ளிகளுடன் இரண்டாம் இடத்தில் உள்ளது.

உலக டெஸ்ட் சாம்பியன்ஷிப் 2025-27 புள்ளிப்பட்டியல்: (பாகிஸ்தான் - தென்னாப்பிரிக்கா 2வது டெஸ்ட்டுக்கு பின்):

1. ஆஸ்திரேலியா: வெற்றி சதவீதம் - 100.00, (3 போட்டிகள், 3 வெற்றி, 0 தோல்வி, 0 டிரா)
2. இலங்கை: வெற்றி சதவீதம் - 66.67, (2 போட்டிகள், 1 வெற்றி, 0 தோல்வி, 1 டிரா)
3. இந்தியா: வெற்றி சதவீதம் - 61.90, (7 போட்டிகள், 4 வெற்றி, 2 தோல்வி, 1 டிரா)
4. பாகிஸ்தான்: வெற்றி சதவீதம் - 50.00, (2 போட்டிகள், 1 வெற்றி, 1 தோல்வி, 0 டிரா)
5. தென்னாப்பிரிக்கா: வெற்றி சதவீதம் - 50.00, (2 போட்டிகள், 1 வெற்றி, 1 தோல்வி, 0 டிரா)
6. இங்கிலாந்து: வெற்றி சதவீதம் - 43.33, (5 போட்டிகள், 2 வெற்றி, 2 தோல்வி, 1 டிரா)
7. வங்கதேசம்: வெற்றி சதவீதம் - 16.67, (2 போட்டிகள், 0 வெற்றி, 1 தோல்வி, 1 டிரா)
8. வெஸ்ட் இண்டீஸ்: வெற்றி சதவீதம் - 0, (5 போட்டிகள், 0 வெற்றி, 5 தோல்வி, 0 டிரா)
9. நியூசிலாந்து: வெற்றி சதவீதம் - 0, (இதுவரை போட்டிகள் எதுவும் விளையாடவில்லை)

டாப் 2 இடத்தைப் பிடிக்க இந்தியா என்ன செய்ய வேண்டும்?

உலக டெஸ்ட் சாம்பியன்ஷிப் புள்ளிப்பட்டியலில் முன்னேறியுள்ள இந்திய அணிக்கு, அடுத்ததாக ஒரு மிக முக்கியமான தொடர் காத்திருக்கிறது. தென்னாப்பிரிக்க அணி, வரும் நவம்பர் மாதம் இந்தியாவில் சுற்றுப்பயணம் செய்து இரண்டு டெஸ்ட் போட்டிகள் கொண்ட தொடரில் விளையாட உள்ளது.

முதல் டெஸ்ட்: நவம்பர் 14 - 18, ஈடன் கார்டன்ஸ், கொல்கத்தா.
இரண்டாவது டெஸ்ட்: நவம்பர் 22 - 26, பர்சபரா ஸ்டேடியம், கவுகாத்தி.

இந்த தொடரில் இந்திய அணி தென்னாப்பிரிக்காவுக்கு எதிரான இரண்டு டெஸ்ட் போட்டிகளிலும் வெற்றி பெற்றால், இந்தியாவின் வெற்றி சதவீதம் (PCT) 61.90-லிருந்து 70.37 ஆக உயரும். இது இந்திய அணியை தற்போது இரண்டாம் இடத்தில் உள்ள இலங்கையைப் பின்னுக்குத் தள்ளி, புள்ளிப்பட்டியலில் இரண்டாவது இடத்திற்கு உயர்த்தும்.

எனவே, பாகிஸ்தானின் தோல்வி தற்காலிகமாக இந்தியாவிற்கு ஒரு வாய்ப்பை வழங்கியுள்ளது. ஆனால், உலக டெஸ்ட் சாம்பியன்ஷிப் இறுதிப்போட்டிக்குத் தகுதிபெறும் கனவை நனவாக்க, வரவிருக்கும் சொந்த மண் தொடரில் தென்னாப்பிரிக்காவை வீழ்த்துவது இந்திய அணிக்கு அவசியமாகும்.