"புவனேஸ்வர் குமார் மீண்டும் வந்ததுக்கு காரணமே இந்த மோசமான நிலைமைதான்".. WV ராமன் அதிரடி கருத்து

சென்னை: நீண்ட இடைவெளிக்குப் பிறகு இந்திய டி20 அணியில் அனுபவ வேகப்பந்து வீச்சாளர் புவனேஸ்வர் குமார் மீண்டும் தேர்வு செய்யப்பட்டுள்ளார். கடந்த 2022 நவம்பர் மாதத்திற்குப் பிறகு இந்திய அணியில் இடம் கிடைக்காமல் தவித்த புவனேஸ்வர் குமார், நியூசிலாந்துக்கு எதிரான டி20 தொடரில் மீண்டும் இடம் பிடித்துள்ளார். ஐபிஎல் தொடரில் ஆர்சிபி அணி தனது முதல் கோப்பையை வெல்லவும், மீண்டும் 2026ஆம் ஆண்டில் சாம்பியன் பட்டத்தைத் தக்கவைக்கவும் முக்கிய காரணமாக இருந்தார்.

குறிப்பாக, 2026 ஐபிஎல் தொடரில் 16 போட்டிகளில் 28 விக்கெட்டுகளைக் குவித்து, அதிக விக்கெட் வீழ்த்தியவர்கள் பட்டியலில் 2-வது இடம் பிடித்து தேர்வுக்குழுவை திரும்பிப் பார்க்க வைத்தார். புவனேஸ்வர் குமாரின் இந்திய அணி வாய்ப்பு குறித்து இந்திய அணியின் முன்னாள் வீரரும் பயிற்சியாளருமான டபிள்யூ.வி. ராமன் சில வித்தியாசமான கருத்துக்களை முன்வைத்துள்ளார்.

"புவனேஸ்வர் குமாரின் அசாத்திய உழைப்பையும் கம்பேக்கையும் நாம் மனதாரப் பாராட்ட வேண்டும். ஆனால் இந்த நாணயத்திற்கு மற்றொரு பக்கமும் உள்ளது. புவனேஸ்வரின் சர்வதேச வாழ்க்கை முடிந்துவிட்டது என்று எல்லோரும் நினைத்த நிலையில் அவர் மீண்டும் அணிக்குள் வந்துள்ளார். இந்தியாவின் மற்ற இளம் வேகப்பந்து வீச்சாளர்கள் புவனேஸ்வரை அணியை விட்டு வெளியே நிறுத்தும் அளவிற்கு நிலையான ஆட்டத்தை வெளிப்படுத்தவில்லை என்பதையே இது வெட்டவெளிச்சமாக்குகிறது" என்றார்.

தற்காலத்தில் பேட்டர்களுக்கு மட்டுமே சாதகமான தட்டையான ஆடுகளங்கள் அமைக்கப்பட்டாலும், இளம் பந்துவீச்சாளர்கள் தொடர்ந்து ரன்களை வாரி வழங்குவது கவலையளிப்பதாக ராமன் சுட்டிக்காட்டினார். இந்திய அணியில் ரோஹித், கோலி, அஸ்வின் போன்ற பழைய வீரர்களை நீக்கி முக்கிய மாற்றங்கள் நிகழும் இந்தக் காலகட்டத்தில், வெறும் போட்டிகளை மட்டுமே நம்பியிருக்காமல் இளம் வீரர்களைப் பட்டை தீட்ட வேண்டும் என்றும், இதற்கு வேகப்பந்து வீச்சுப் பயிற்சியாளரின் கூடுதல் உழைப்பு மிக அவசியம் என்றும் அவர் குறிப்பிட்டார்.

"இந்தியாவுடன் விளையாடுவதால் ஒரு பைசா கூட லாபமில்லை".. கொந்தளித்த வெஸ்ட் இண்டீஸ் நிர்வாக அதிகாரி

இதுகுறித்து மேலும் பேசிய அவர், "இந்தியாவில் அபார வேகமும் அசாத்திய திறமையும் கொண்ட இளம் வேகப்பந்து வீச்சாளர்களுக்குப் பஞ்சமே இல்லை. ஆனால் அவர்கள் அனைவரும் சுழற்சி முறையில் வாய்ப்பு பெற்று அதிக ரன்களை வாரி வழங்குகின்றனர். தொடர் போட்டிகள் இல்லாத ஓய்வு நேரங்களில், பந்துவீச்சு பயிற்சியாளர் இந்த இளம் பந்துவீச்சாளர்களுடன் தனியாக நேரம் ஒதுக்கி தீவிரமாகப் பயிற்சி அளிக்க வேண்டும். சர்வதேச கிரிக்கெட்டின் கடுமையான அழுத்தங்களைச் சமாளிக்கும் வித்தையை அவர்களுக்குக் கற்றுக் கொடுத்தால் மட்டுமே இந்திய பந்துவீச்சு வலுப்பெறும்" என்று தெரிவித்தார்.