ஜெய்ஸ்வால்.. உங்க கிட்ட ஒரே ஒரு கோரிக்கை மட்டும் வைக்கிறேன்.. ஆகாஷ் சோப்ரை அறிவுறுத்தல்

மும்பை: இந்திய அணியில் அனைத்து வடிவ போட்டிகளிலும் நிரந்தர இடம் பிடிக்க, யஷஸ்வி ஜெய்ஸ்வால் 2026 ஐபிஎல் தொடரில் 700 ரன்களுக்கு மேல் எடுக்க வேண்டும் என முன்னாள் வீரர் ஆகாஷ் சோப்ரா வலியுறுத்தியுள்ளார். ஐபிஎல் தொடர்களில் அவர் பெறும் சராசரி ரன்கள், இந்திய அணியில் அனைத்து விதமான கிரிக்கெட்டிலும் அவருக்கு சரியான வாய்ப்பை பெற்றுத்தர உதவாது என்றும் அவர் கருத்து தெரிவித்துள்ளார்.

இந்தியா - நியூசிலாந்து அணிகளுக்கு இடையே வரும் ஜனவரி 11 ஞாயிற்றுக்கிழமை வதோதராவில் தொடங்கவுள்ள மூன்று ஒருநாள் மற்றும் ஐந்து டி20 போட்டிகள் கொண்ட தொடரில், யஷஸ்வி ஒருநாள் அணிக்கு தேர்ந்தெடுக்கப்பட்டுள்ளார். ஆனால், அதிரடிக்கு பெயர் பெற்ற டி20 அணியில் அவருக்கு இடம்பெறாதது பல கேள்விகளை எழுப்பியுள்ளது. இதுபற்றி தனது யூடியூப் சேனலில், ஜெய்ஸ்வால் ஏன் இன்னும் மூன்று வடிவ வீரராக மாறவில்லை என்ற கேள்விக்கு சோப்ரா விளக்கம் அளித்தார்.

இந்தியாவின் வெள்ளைப்பந்து அணிகளில் நிரந்தர இடம்பெற, இடதுகை பேட்ஸ்மேனான ஜெய்ஸ்வால் ஒரு மாபெரும் ஐபிஎல் சீசனைப் பெற வேண்டும் என்று சோப்ரா குறிப்பிட்டார். "யஷஸ்வி, உங்களிடம் ஒரு வேண்டுகோள். நீங்கள் ஒரு 700 ரன் ஐபிஎல் சீசனைப் பெற வேண்டும் என்று நான் விரும்புகிறேன். 400 முதல் 450 ரன் சீசன்களைப் பெறுகிறீர்கள், ஆனால் அது போதாது. உங்களுக்குத் தரமானது இல்லை," என்று அந்த முன்னாள் வீரர் தெளிவாகக் கூறினார்.

"நீங்கள் கதவை உடைத்துக்கொண்டு உள்ளே செல்ல ஒரு 700 ரன் சீசன் தேவை என்று நான் நினைக்கிறேன். அதுதான் அவரிடமிருந்து நான் எதிர்பார்ப்பது. விரைவில், யஷஸ்வி கட்டாயம் மூன்று வடிவ அணியிலும் இடம்பிடிக்க வேண்டும்," என சோப்ரா மேலும் எடுத்துரைத்தார்.

கடந்த 2025 ஐபிஎல் தொடரில், யஷஸ்வி ஜெய்ஸ்வால் 14 இன்னிங்ஸ்களில் 43.00 சராசரியுடன் 559 ரன்கள் எடுத்தார். ஐபிஎல் வரலாற்றில் அவரது அதிகபட்ச ஸ்கோர், 2023 ஆம் ஆண்டு பதிவானது. அந்த சீசனில் அவர் 14 இன்னிங்ஸ்களில் 48.08 சராசரியுடன் 625 ரன்கள் குவித்தார்.

இந்திய அணியில் ஆழமான திறமை இருப்பதை ஜெய்ஸ்வால் அனைத்து வடிவ போட்டிகளிலும் இடம்பெறாதது காட்டுகிறது என்று ஆகாஷ் சோப்ரா ஆச்சரியம் தெரிவித்தார். "இது ஆச்சரியமானது. ஜெய்ஸ்வாலை மூன்று வடிவ போட்டிகளிலும் விளையாட வைக்க முடியாத நிலை, இந்தியாவில் எவ்வளவு ஆழமான திறமை இருக்கிறது என்பதைத்தான் சொல்கிறது," என்றும் அவர் விளக்கமளித்தார்.

"ஒருநாள் போட்டியில் சதம் அடித்த பிறகும்கூட, அவர் அமர வேண்டியிருக்கும். அதுதான் உண்மை," என சுட்டிக்காட்டிய சோப்ரா, தற்போது டி20 போட்டிகளில் ஜெய்ஸ்வாலுக்கு வாய்ப்பு இருப்பதாகவும் தெரியவில்லை என்றார். எனினும், ஒருநாள் போட்டிகளில் அவர் அணியில் உள்ளார் என்பதையும் அவர் குறிப்பிட்டார்.

"ஒருநாள் போட்டிகளில் அணியில் இருக்கிறார், ஆனால் டி20 அணியில் இல்லை. இருப்பினும், உலகக் கோப்பைக்குப் பிறகு இது மாறும். அதற்கு முன்பே மாறும் என்று நினைத்தேன், ஆனால் இப்போது அதுபோல் இல்லை. அதன்பிறகு மாறிவிடும், பிறகு அவர் மூன்று வடிவ வீரராக மாற வேண்டும்," என்று சோப்ரா கணித்தார்.

28 டெஸ்ட் போட்டிகளில் விளையாடியுள்ள யஷஸ்வி ஜெய்ஸ்வால், இந்தியாவுக்காக நான்கு ஒருநாள் போட்டிகள் மட்டுமே ஆடியுள்ளார். அவற்றில் 57.00 சராசரியுடன் 171 ரன்கள் எடுத்துள்ளார். ராஜஸ்தான் ராயல்ஸ் அணியின் இந்த தொடக்க ஆட்டக்காரர், 22 டி20 இன்னிங்ஸ்களில் 164.31 ஸ்ட்ரைக் ரேட்டுடன் 723 ரன்களை அடித்துள்ளார். இருப்பினும், ஜூலை 2024க்குப் பிறகு எந்தவொரு சர்வதேச டி20 போட்டியிலும் அவர் பங்கேற்கவில்லை.