கிரிக்கெட் உலகமே அதிர்ச்சி.. ஆஸ்திரேலியாவை பந்தாடிய ஜிம்பாப்வே அணி.. புதிய சரித்திரம் படைப்பு!

ஆஸ்திரேலிய போட்டி

இந்த போட்டியில் டாஸ் வென்ற ஜிம்பாப்வே அணி பந்துவீச்சை தேர்வு செய்தது. இதனையடுத்து களமிறங்கிய ஆஸ்திரேலிய அணியில் வார்னர், ஸ்மித், ஃபிஞ்ச், ஹாசல்வுட், ஸ்டார்க் என அசுர பலமான வீரர்கள் இருந்தனர். எனினும் அவர்களால் ஜிம்பாப்வே பந்துவீச்சை சமாளிக்க முடியவில்லை. தொடக்க வீரர் ஆரோன் ஃபிஞ்ச் 5 ரன்களுக்கும், ஸ்டீவ் ஸ்மித் 1 ரன்னுக்கும் வெளியேறி அதிர்ச்சி தந்தனர்.

குறைவான இலக்கு

இதன்பின்னர் வந்த அலெக்ஸ் கேரி (4), மார்கஸ் ஸ்டோய்னிஸ் (4), மேக்ஸ்வெல் (19), ஆஸ்டன் ஆகர் (0) என அடுத்தடுத்து வெளியேறி ஏமாற்றினர். மறுமுனையில் தூண் போன்று நின்ற வார்னர் மட்டும் 94 ரன்கள் அடித்து வந்தார். ஆனால் அவராலும் சதம் அடிக்க முடியவில்லை. இதனால் 31 ஓவர்களில் ஆஸ்திரேலிய அணி 141 ரன்களுக்கு அனைத்து விக்கெட்களையும் இழந்தது.

நிதானமான தொடக்கம்

குறைந்த இலக்கை நோக்கி களமிறங்கிய ஜிம்பாப்வே அணிக்கு நிதானமான தொடக்கம் கிடைத்தது. ஓப்பனிங் வீரர்கள் கைடானோ (19), மருமானி (35) ரன்கள் அடித்து அடித்தளம் அமைத்தனர். எனினும் மிடில் ஆர்டர் வீரர்கள் ஏமாற்றியதால் அந்த அணி 66 ரன்களுக்கு 4 விக்கெட்களை இழந்து தடுமாறியது. இதனால் ஜிம்பாப்வே தோற்றுவிடும் என்றே ரசிகர்கள் நினைத்தனர்.

கேப்டனின் இன்னிங்ஸ்

ஆனால் அதனை மாற்றி அமைத்தார் கேப்டன் ரேகிஸ் சகாப்வா நிதானமாக ஸ்கோரை உயர்த்தினார். ஒருபுறம் விக்கெட்கள் சரிந்தாலும், மறுமுனையில் பொறுப்புடன் விளையாடிய அவர் 72 பந்துகளில் 37 ரன்களை அடித்தார். இதனால் 39 ஓவர்களில் ஜிம்பாப்வே அணி 7 விக்கெட்கள் இழப்புக்கு 142 ரன்களை எடுத்து வெற்றி பெற்றது.

சரித்திர வெற்றி

இந்த வெற்றியின் மூலம் முதல் முறையாக சர்வதேச ஒருநாள் கிரிக்கெட்டில் ஆஸ்திரேலிய அணியை அதன் மண்ணிலேயே ஜிம்பாப்வே வீழ்த்தியுள்ளது. ஐசிசி தரவரிசையில் 13வது இடத்தில் உள்ள ஜிம்பாப்வே, 5 முறை உலகக்கோப்பை சாம்பியனான ஆஸ்திரேலியாவை வீழ்த்தியது ஆச்சரியத்தை ஏற்படுத்தியுள்ளது. ஜிம்பாப்வேயின் முன்னணி வீரர்கள் காயத்தினால் இந்த போட்டியில் ஆடவில்லை என்பது குறிப்பிடத்தக்கது.